Mateyo 13
Cikozyanyo casikuminza
1 Mubuzuba oobo mbubonya Jesu wakazwa muŋanda akukkala kumbali aalwizi.
2 Nkamu mpati yabantu yakamubunganina cakuti wakanjila mubwato akukkala, pele bantu bakaliimvwi ankomwe yalwizi. 3 Wakabaambila zintu zinji muzikozyanyo wakati, “Muntu umwi wakainka kuyoominza. 4 Lino naakali kuminza, mbuto zimwi zyakawida munzila, eelyo bayuni bakaboola bazilya. 5 Mbuto zimwi zyakawida mulubwe-lubwe, mwatakalivu linji, cakufwambaana zyakamena nkaambo vu lyakali syoonto. 6 Pele zuba nilyakabala zyakapusama, zyayuma nkaambo tiizyakana simpisya miyanda. 7 Mbuto zimwi zyakawida mumamvwa, naakakomena akaziyasa akuzifundilizya. 8 Mbuto zimwi zyakawida muvu bbotu, akuzyala micelo. Zimwi zyakavuzyanya akuba mwaanda, zimwi makumi aali cisambomwe, azimwi makumi otatwe.” 9 Aboobo Jesu wakati, “Ooyo ulaamatwi amvwisye.”
Bupanduluzi bwa zikozyanyo
10 Lino basikwiiya bakasika kuli Jesu akuti, “Ino nkaambo nzi ncobaambilila muzikozyanyo?” 11 Mpawo wakabaingula kuti, “Nywebo mulipedwe luzibo lwamaseseke aabwami bwakujulu, pele balo tabapedwe pe. 12 Nkaambo ooyo uujisi uyooyungizizilwa, nkabela ziyooba zinji, pele ooyo uujisi kuce uyoonyangilwa limwi. 13 Ncencico ncebaambilila muzikozyanyo, nkaambo nikuba kuti balabona, pele tababonesesyi, nikuba kuti balamvwa pele tabamvwisisyi, alimwi tabaswiililisyi. 14 Mbubonya mbuli bwakasinsima Izaya zyambabo naakati,
‘Ncobeni muyoomvwa pele tamukooyoomvwisisya,
akubona muyoobona pele tamukooyoobonesesya.
15 Kayi maanu aabantu aaba mafwiifwi,
aalo matwi aabo baasinka cakuti tabakonzyi kuziba ameso aabo.
Tabakonzyi kwiingasila amyoyo yabo, nikuba kusandukila kuli ndime kutegwa ndibaponye.’
16 Pele nywebo mulilelekedwe nkaambo meso aanu alabona, aalo matwi aanu alamvwa. 17 Ncobeni ndamwaambila kuti basinsimi abalulami banji bakali kuyandisya kubona zintu nzomubona, pele taakwe nibakazibona pe. Alimwi bakali kuyandisya kumvwa zintu nzomumvwa, pele taakwe nibakazimvwa.
Bupanduluzi bwini-bwini bwacikozyanyo casikuminza
18 “Lino amuswiilile kubupanduluzi bwacikozyanyo casikuminza. 19 Ciindi bantu nibamvwa majwi aaamba zya bwami bwa Leza bamana tabaabambi, Siluuni ulasika akugwisya eeco cisyangidwe mumyoyo yabo. Nzembuto zyakaminzidwe mumbali aanzila. 20 Lino eezyo zyakawida muvu lyalubwe-lubwe, mbabaabo banga bamvwa majwi aa Leza, cakufwambaana baatambula akukondwa. 21 Nikuba boobo tabajisi miyanda mulimbabo, mbayumu kwakaindi kaniini, pele ciindi makatazyo alimwi a mapenzi naabasikila akaambo kakucita zyaamba majwi aaya inga ndilyonya balebwa. 22 Lino eezyo zyakawida akati kamamvwa, mbabaabo banga bamvwa majwi, pele nkaambo balayandisisya zintu zyamunyika abuvubi, eezyo zilaasyanikizya majwi, nkabela taazyali micelo. 23 Pele eezyo zyakawida muvu bbotu, mbabaabo banga bamvwa majwi aa Leza akwaabamba. Aboobo balazyala micelo cakuvuzyanya akuba mwaanda, bamwi makumi aali cisambomwe, bamwi makumi otatwe.”
Cikozyanyo camaila amisonde
24 Alimwi Jesu wakabaambila acimwi cikozyanyo wakati, “Bwami bwakujulu buli mbuli muntu wakasyanga maila mumuunda. 25 Pele ciindi bantu nibakacili koona, sinkondonyina wakasika akusyanga misonde mumaila, wainka. 26 Nkabela zisyango nizyakakula akuzyala nseke, mpoonya misonde ayalo yakalibonya. 27 Lino babelesi bamukamwini muunda bakasika akumwaambila kuti, ‘Mwami, sena taakwe nookasyanga maila mumuunda wako? Ino kayi yazwayi misonde?’ 28 Wakati kulimbabo, ‘Sinkondoma nguwacita eeci!’ Mpoonya babelesi bakati kulinguwe, ‘Sena ulayanda kuti tuunke tukainonkole?’ 29 Pele walo wakati, ‘Peepe, antela mwaakwiinonkola mukagwisilizye amaila. 30 Amuzileke zyoonse zikulile aamwi mane kusikila ciindi cakutebula. Nkabela ndendilyo basikutebula ninjoobaambila kuti, Amusaangune kubungika misonde mwiiange mumisunta kuti itentwe. Pele amubikke maila mubutala bwangu.’”
Zikozyanyo zimwi
31 Alimwi Jesu wakaamba acimwi cikozyanyo wakati, “Bwami bwakujulu buli mbuli kaseke kamasitadi, aako muntu nkasyanga mumuunda wakwe. 32 Nkaseke kaniini kapati, pele inga kakomena zisyango akuba cisamu. Nkabela bayuni balaboola akuyaka ziteente mumitabi yaco.”
Cikozyanyo camimena
33 Lino Jesu wakabaambila acimbi cikozyanyo wakati, “Bwami bwakujulu buli mbuli mimena mukaintu njaakavwela muzisuwo zyotatwe zyabusu bwamaila akwiisisa, mane kusikila mulwi woonse wafufumuka.”
34 Eezi zyoonse Jesu wakabaambila muzikozyanyo. Taakwe naakali kubaiisya buyo ccita muzikozyanyo. 35 Eezi wakazicita kweendelana abwakaamba musinsimi kuti,
“Njooisya muzikozyanyo,
njoolungulula eezyo zyakasisidwe kuzwa kumalengelo aanyika.”
Jesu mbwaakapandulula cikozyanyo camaila amisonde
36 Mpoonya Jesu wakasiya makamu aabantu akunjila muŋanda. Basikwiiya bakwe bakaboola kulinguwe akuti, “Tupandulwide ncocaamba cikozyanyo camisonde yamumuunda.” 37 Wakabaingula kuti, “Ooyo wakasyanga ngu Mwanaa Muntu. 38 Muunda uulya nduundu, maila aamba bantu babwami bwa Leza. Misonde mbantu ba Mubi. 39 Ngosinkondoma wakaisyanga Siluuni. Kutebula nciindi cakumana kwanyika. Batebuzi mbangelo. 40 Mbubonya mbuli misonde mbwiibunganyizigwa akutentwa, mbubonya oobo mbokuyooba akumamanino aanyika. 41 Mwanaa Muntu uyootuma bangelo bakwe, kuti bazoogwisye mubwami bwakwe bantu balebya bamwi abasizibi boonse, 42 akuyoobasowela mubbibi lyamulilo. Mwalo oomo mobayoolila akuluma ntwino. 43 Balo baluleme bayoobala mbubonya mbuli zuba mubwami bwa Wisi. Ooyo ulaamatwi amvwisye.
Azimwi zikozyanyo
44 “Alimwi bwami bwakujulu buli mbuli lubono lwakasisidwe mumuunda, oolo muntu ndwaakabbunukila akulusisa aambi. Mukukondwa wakainka akuyoouzya zyoonse nzyajisi akuula muunda ooyo.
45 “Alimwi bwami bwakujulu buli mbuli musambazi uuyandaula ngale zibotu. 46 Naakajana mbotu kwiinda wakainka waakuuzya zyoonse eezyo nzyaakajisi akwiiula.
47 “Alimwi bwami bwakujulu buli mbuli kanyandi kakawaalwa mulwizi kaakujata nswi zyamisyobo-misyobo. 48 Lino nikakazula bakakakwelela kunkomwe. Bakakkala ansi akusala nswi mbotu bazibikka muzisuwo, zibi bakazisowa. 49 Mbubonya oobo mbokuyooba kumamanino aanyika. Bangelo bayoosika akwaandaanya babi kuzwa kubaluleme, 50 babi bayoobasowela mubbibi lyamulilo. Mwalo oomo bantu mobayoolila akuluma ntwino mukuusa.” 51 Jesu wakabuzya basikwiiya kuti, “Mwati mwazimvwa eezi zyoonse?” Bakati kulinguwe, “Iiyi.” 52 Mpoonya wakati kulimbabo, “Nkaako mwiiyi uuli woonse wamulawo wakaiisigwa makani aabwami bwakujulu uli mbuli mwiniŋanda ooyo uugwisya muciyobwedo cakwe zintu zipya azintu zikulukulu.”
Jesu mbwaakakakwa ku Nazaleta
53 Lino Jesu naakamana kwaamba zikozyanyo eezi, wakazwa ooko, 54 wakaboola kucisi cokwabo ooko wakabaiisya bantu mucikombelo cakunga mane bakagambwa akwaamba kuti, “Ino ooyu muntu wabujana kuli busongo amilimo eeyi mipati iitondezya nguzu? 55 Sena ooyu tali mwana wamubezi uulya? Banyina, tee kayi ngu Maliya? Sena abalo bana bokwabo tabali Jemusi, Josefa, Saimoni a Judasi? 56 Sena abalo bacizi bakwe tatulaabo aano? Ino kayi muntu ooyu wazijana kuli eezi zyoonse?” 57 Aboobo bakamukaka. Pele Jesu wakati kulimbabo, “Musinsimi ulalemekwa kuli koonse, pele kutali kwabo naa kumukwasyi wakwe pe.” 58 Nkabela Jesu taakwe naakacita milimo minji yanguzu oomo, nkaambo tiibakamusyoma.