Matalikilo 39
Makani aa Josefa amukaintu wa Potifaa
1 Lino Josefa wakatolwa ku Ijipiti, ooko nkwaakaakuulwa a Potifaa kuzwa ku Baisyimayeli bakamuleta ku Ijipiti. Ooyu Potifaa wakali umwi wabalupati-pati ba Falo, alimwi wakali ngomupati wabalindizi baŋanda yabwami. 2 Pele mwami Leza wakali aa Josefa, wakacita kuti zintu zyoonse zimweendele kabotu. Wakali kukkala muŋanda yasimalelo wakwe. 3 Awalo simalelo wakwe wakabona kuti Mwami Leza wakali aa Josefa alimwi akuti Mwami Leza wakaleleka milimo Josefa njaakali kucita. 4 Potifaa wakabotelwa amilimo ya Josefa anzila njaakali kubelekela milimo yakwe. Nkaako wakamucita kuti abe ngomupati wamuŋanda akulanga zintu zyoonse nzyaakajisi. 5 Kuzwa ciindi eeco Mwami Leza wakaleleka zyoonse zyakajisi Potifaa muŋanda alimwi amumyuunda yakwe akaambo ka Josefa. 6 Abone boobo Potifaa wakabikka zintu zyoonse nzyaakajisi mumaanza aa Josefa kuti azyeendelezye zyoonse cakuti walo taakacili aalubazu acintu niciba comwe ccita buyo cakulya.
Josefa wakali mukubusi mubotu, waciwa ceebeka. 7 Ncenciceeco mukasimalelo wakwe ncaakatalika kumunyomenena. Bumwi buzuba wakati kuli nguwe, “Koza tuswaangane.” 8 Pele Josefa wakakaka wati, “Simalelo wangu tacikwe lubazu acintu cili muŋanda muno akaambo kandime. Wakandipa kuti nkezilanga zyoonse. 9 Ndijisi nguzu muŋanda muno zili mbuli zyasimalelo wangu, alimwi taakwe cintu ncaatakapa mumaanza aangu, kuleka buyo nduwe omukaintu wakwe. Ino nkaambo nzi nceticite cintu cibi cili boobu, akubisizya Leza?” 10 Nikuba kuti mukaintu ooyu wakali kusola buzuba abuzuba kuti baswaangane, pele Josefa walo taakwe naakaswiilila pe.
11 Lino buzuba bumwi Josefa wakanjila muŋanda kuti abeleke mulimo wakwe, taakwe muntu uumbi wakalimo. 12 Aawo mukaintu ooyo wakajata Josefa kujansi akumwaambila kuti, “Koza tuswaangane.” Pele Josefa wakapuzuka, akutijila anze, wasiya jansi mujanza lyamukaintu ooyo. 13 Ucibona buyo kuti Josefa watija akusiya jansi, awalo wakazuzaanina anze, 14 wakaita baalumi muŋanda akwaamba kuti, “Amubone makani aaya! Mulumaangu wakaleta Muhibulu ooyu muŋanda yesu, pele lino ngooyu watalika kutusampaula. Wanjila muŋanda yangu akundaambila kuti tuswaangane, mpoonya mebo ndakwiila. 15 Lino ucimvwa kuti ndakwiila walapukila anze akusiya jansi kumbali aandime.”
16 Mukaintu ooyu wakalibamba jansi lya Josefa kusikila mulumaakwe naakaboola kuŋanda. 17 Eelyo wakamwaambila makani ngoonya aaya wati, “Uulya muzike ngookaleta kuzookkala andiswe, sunu walinjide muŋanda yangu akuzoondisampula. 18 Pele nindakwiila walapukila anze akusiya jansi eeli kumbali aandime.”
19 Aawo simalelo wa Josefa wakakalala kapati naakamvwa makani akamwaambila mukaintu wakwe aakuti, “Mbombuboobu mbwaacita muzike wako.” 20 Potifaa wakalailila kuti Josefa ajatwe akubikkwa muntolongo oomo mwakaangidwe bamwi, momumoomo mwaakabikkwa. 21 Pele Mwami Leza wakali aa Josefa, alimwi wakacili kumuyandisya. Wakacitya kuti lyoonse ayandwe amulangi wantolongo. 22 Nkaako mulangi wantolongo wakacita Josefa kuti abe ngomupati wabasintolongonyina, wakamupa nguzu zyakweendelezya zintu zyoonse zyakali muntolongo. 23 Aboobo mulangi wantolongo taakacili aalubazu azyeezyo zyaakapede mumaanza aa Josefa, nkaambo Mwami Leza wakali aa Josefa, ngonguwe wakacita kuti zyoonse nzyaakali kucita Josefa zilondoke kabotu.