Matalikilo 28

¹ Izaka wakaita Jakobo wamuleleka, amane wakamulailila kuti, “Toelede kukwata mukaintu Mukenani pe. ² Kolibambila uunke kucisi ca Padanalamu, kwasyanyokokulu Betuweli. Ooko nkoyoojana mukaintu wakukwata, mubana basimizyaako Labani. ³ Leza Singuzuzyoonse akaleleke lukwato lwako, akakupe bana banji kuti ukabe wisi wamisyobo minji. ⁴ Akakuleleke yebo alunyungu lwako ndendilyo nyika njokkede eeyi niyooba nyika yako eeyo Leza njaakapa kuli Abulahamu.” ⁵ Aboobo Izaka wakatuma Jakobo ku Padanalamu kuli Labani, mwanaa Betuweli Mualamu. Labani wakali munyinandumi Labeka, banyina Jakobo a Isau.

Isau mbwakakwata uumbi mukaintu

⁶ Lino Isau wakamvwa kuti Izaka wakaleleka Jakobo akuti wakamutuma kucisi ca Padanalamu kuti akakwatile nkuko, alimwi amane buyo kumuleleka wakamulailila kuti atakwati mukaintu Mukenani pe. ⁷ Wakabona kuti Jakobo wakaswiilila wisi abanyina akuunka ku Padanalamu. ⁸ Aboobo wakaziba kuti Izaka, wisi, taakali kuyanda bakaintu Bakenani pe. ⁹ Nkaako Isau awalo wakaya kuli Isyimayeli, mwana wa Abulahamu, akuyookwata mukaintu kunze lyabaabo mbaakakwete kale. Musimbi ngwaakakwata wakali Mahalati, mwana wa Isyimayeli. Mahalati wakali mucizi wa Nebaiyoti.

Ciloto ncaakalota Jakobo ku Beteli

¹⁰ Lino Jakobo wakanyamuka kuzwa ku Biiyasyiba akutola lweendo lwakuya ku Halani. ¹¹ Wakasika kubusena bumwi ooko nkwaakoonena, nkaambo izuba lyakamubbilila. Wakoona akulitulisya bbwe. ¹² Naakali koona, wakalota. Muciloto cakwe wakabona matantilo malamfu alijinkide ansi mane kusikila kujulu. Alimwi wakabona bangelo kabatanta akuseluka alingawo. ¹³ Mpoonya wakabona Mwami Leza uliimvwi alingawo akumwaambila kuti, “Ndime Mwami Leza, Leza wa Abulahamu a Izaka. Eeyi nyika mpolede njooipa kulinduwe akulunyungu lwako. ¹⁴ Lunyungu lwako luyoovula mbuli vu lyamunyika. Bayoomwaika mumbazu zyoonse zyamunyika, kumbo, kujwe, kunyika akumusanza, alimwi mulinduwe amulunyungu lwako misyobo yoonse yamunyika iyoolelekwa. ¹⁵ Masimpe ndiyooba ayebo, ndiyookukwabilila koonse nkoya, alimwi ndiyookuboozya kunyika eeyi. Nsikooyookusiya pe mane nkacite eezi zyoonse nzindakwaambila.” ¹⁶ Jakobo naakabuka wakaamba kuti, “Masimpe, Mwami Leza mpali abusena buno, mebo nsiindazi pe.” ¹⁷ Lino wakaliyoowede, aboobo wakaamba kuti, “Busena buno bulayoosya! Ncobeni niŋanda ya Leza, mmulyango wakujulu.”

¹⁸ Nibwakaca, Jakobo wakabuka kucilikooko, mpoonya wakabweza bbwe eelyo ndyaakalitulisizye, wakaliimika kuti libe ciibalusyo. Nkabela wakatila mafuta alindilyo. ¹⁹ Mpawo wakaulika busena oobo kuti Beteli. Kaindi munzi wakooko wakali kutegwa Luzi. ²⁰ Lino Jakobo wakakonka ku Mwami Leza wati, “Kuti naa O Leza ukandikwabilile mulweendo oolu ndwejisi, akundipa zyakulya azisani, ²¹ alimwi naa kuti ukandiboozye kabotu kuŋanda yataata, uyooba nduwe Mwami Leza wangu. ²² Abusena oobu mpondaimika bbwe lyaciibalusyo buyooba bwacikombelo cako, alimwi kuli zyoonse nzyoyoondipa ndiyoobweedezya cipaanzi cakkumi kulinduwe.”