Matalikilo 27
Jakobo mbwaakatola cileleko ca Isau
1 Lino Izaka naakacembaala akoofwaala, wakaita Isau, mwanaakwe mupati, wakamwaambila kuti, “Mwanaangu!” Isau wakati, “Ndiswiilide Taata.” 2 Nkabela Izaka wakati, “Tee wabona kuti mebo ndacembaala, alimwi ndaafwiifwi kufwa. 3 Lino mwanaangu bweza masumo aako, abuta amivwi koya musokwe ukandijaile munyama. 4 Waboola uzoondijikile cilyo ciya cinona kapati ncenjandisya, undeetele. Ndazoomana kulya, nzookuleleka nketanafwa.”
5 Pele Izaka naambaula boobo, Labeka wakaliswiilide. Eelyo Isau naakainka musokwe kuyoovwimina wisi munyama wakulya, 6 Labeka wakaambila Jakobo kuti, “Ndamvwa uso kaambila Isau kuti, 7 ‘Koya ukandijaile munyama. Waboola uzoondijikile, mebo ndazoomana kulya nzookuleleka kumbele lya Mwami Leza nketanafwa.’ 8 Lino mwanaangu, swiilila kufumbwa ncetikwaambile ucite. 9 Koya kubutanga bwampongo, ukandisalile bana bampongo baneneede bobilo, kuti ndizoobambe cilyo eeco ncayandisya uso. 10 Ndamana yebo umutolele uso akalye, mukuti akakuleleke natanafwa.”
11 Pele Jakobo wakati kuli banyina, “Baama, tee kayi mulizi kuti Isau ngwagoyooya amubili, pele mebo nsijisi boya pe. 12 Ambweni Taata akandaampaampe mpoonya akazibe kuti ndamucenga, aboobo uyoondisinganya mucilawo cakundileleka.” 13 Banyina bakamwiingula kuti, “Naa akakusinganye cikandiboolele, mwanaangu, pele yebo cita buyo ncindakwaambila, koya ukandiletele tupongo.” 14 Nkaako Jakobo wakainka akuyooletela banyina tupongo, nkabela bakajikila Izaka cilyo eeco mbubonya mbuli ncaakali kuyandisya. 15 Lino wakabweza zisani zyamwanaakwe mupati Isau, eezyo nzyaakayobwede muŋanda, wazisamika Jakobo mwanaakwe musyoonto. 16 Amane wamuzamba atukutu twampongo kumaboko amunsingo. 17 Wakamupa cakulya eeco cinona kapati, atunkwa ntwaakakangide.
18 Kumane Jakobo wakaya kuli wisi akuti, “Odi, Taata!” Wisi wakamwiingula kuti, “Iiyi, ani nduweni, mwanaangu?” 19 Jakobo wakati, “Ndime Isau mwanaako mupati, ndacita mbubonya mbuli mboondilailila. Taata buka kkala ulye nyama eeyi njindakuletela, wamana undileleke.” 20 Lino Izaka wakati, “Ino wafwambaana buti kujana munyama, mwanaangu?” Jakobo wakaingula kuti, “Mwami Leza wako nguwandigwasya kujana munyama kufwambaana.” 21 Eelyo Izaka wakati kuli Jakobo, “Nkoo swena aafwiifwi ndikwaampaampe. Sena nduwe mwanaangu ncobeni Isau, naa ngumbi?” 22 Mpawo Jakobo wakaswena munsi-munsi awisi, walo wakamwaampaampa. Amane waamba kuti, “Kwalo ijwi lyako lilimvwisya mbuli lya Jakobo, pele maboko aako alimvwisya mbuli aa Isau.” 23 Taakwe naakamuziba kuti ngu Jakobo, nkaambo maboko aakwe akalijisi boya mbuli Isau. Eelyo wakamuleleka, 24 pele wakacili kumubuzya alimwi kuti, “Sena nduwe Isau ncobeni, mwanaangu?” Jakobo wakaingula kuti “Iiyi, ndime ncobeni.” 25 Izaka wakati, “Ndipa nyama njoondiletela ndilye, ndamana ndakuleleka.” Mpoonya Jakobo wakamupa cakulya eeco alimwi wakamuletela awaini kuti anywe. 26 Eelyo wisi wakati “Swena aafwiifwi undimyonte, mwanaangu.” 27 Lino Jakobo naakasika munsi lyawisi, Izaka wakanunkizya zisani zyakwe, eelyo wakamuleleka wati,
“Ooku kununkilila kubotu kwamwanaangu kuli mbuli bununkilila muunda wakaleleka Mwami Leza.
28 Leza akuwisizye mvula, akucita myuunda yako kuti
ikakupe butebuzi bubotu. Akupe maila manji awaini.
29 Misyobo yoonse ikabe babelesi bako,
bantu boonse bakakubelekele.
Ukabe simalelo wabana bokwanu,
abamukowa wabanyoko bakakuvuntamine.
Boonse bakusinganya,
bakasinganyizigwe mbabo,
aabo bayookuleleka abakalelekwe abalo.”
Isau mbwaakakombelezya wisi kuti amaleleke
30 Lino Izaka ucimanizya buyo kumuleleka, awalo Jakobo ucinyamuka buyo, Isau wakaboola kuzwa musokwe mukuvwima. 31 Awalo wakajika cakulya cinona akucitola kuli wisi. Naakasika, wakaamba kuti, “Taata, buka kkala, ulye cilyo eeci cinona kapati ncindakujikila ndemwanaako mukuti undileleke.” 32 Lino Izaka wakamubuzya kuti, “Ino nduweni?” Wakaingula kuti, “Ndime Isau, mwanaako mupati.” 33 Eelyo Izaka naakamvwa boobo, wakatalika kukankama kapati. Wakabuzya kuti, “Ino kayi nguni ooyo waletede nyama kulindime eeyi njindalya kotanasika, ngwindaleleka. Cileleko ciyooba cakwe akutamani!”
34 Lino Isau naakamvwa boobo, wakalila cakupozomoka akupenga kapati mumoyo, wakati, “Akaka Taata, ambebo ndileleke!”
35 Izaka wakati, “Musyoonto wako walizide wazoondicenga, aboobo wakubbida cileleko cako.”
36 Isau wakati, “Ono ndwabili kandicenga. Ncenciceeco ncali Jakobo. Wakandinyanga caabilo cabupati bwangu, lino alimwi wanditolela cileleko cangu. Akaka Taata taakwe acileleko ncokonzya kundileleka ambebo na?”
37 Izaka wakaingula kuti, “Bona, ndamucita kale kuti akabe simalelo wako, alimwi ndacita bana bokwabo boonse kuti bakabe babelesi bakwe. Ndamupa maila azyakunywa. Ino ninzi casyaala ncenga ndakupa yebo mwanaangu?”
38 Nikubaboobo Isau wakacili kuzumanana kukombelezya wisi wakati, “Accu kaka! taakwe anociba comwe cileleko Taata? Akaka ndileleke ambebo!” Eelyo wakatalika kulilisya.
39 Mpoonya Izaka wakati,
“Tokooyooba abulongo bubotu pe,
ayalo mvula tiinoowi mumyuunda yako.
40 Uyooba sinkondo,
alimwi uyooba mubelesi wamusyoonto wako.
Pele ciyoosika ciindi noyoozanga,
uyoozwa munguzu zyakwe.”
41 Aboobo Isau wakasulaika Jakobo nkaambo wisi wakapa cileleko cakwe kulinguwe. Wakayeeya kuti, “Mbuli Taata mbwali aafwiifwi kufwa, dilwe mboliyoomanina buyo, ndiyoomujaya Jakobo.”
42 Pele makanze aa Isau akamvwigwa a Labeka, aboobo wakaita mwanaakwe Jakobo akuti kulinguwe, “Swiilila, mupati wako Isau uyanda kujokezya bubi bwako, ukanza kuti akujaye. 43 Lino, mwanaangu, ucite ncetikwaambile. Libambile kuti utijile kumunyinandumaangu Labani ku Halani. 44 Ukakkale anguwe kwaciindi ceelede mane kusikila bukali bwamupati wako bukamane. 45 Akalube ncookamucita. Ciindi eeco njootuma muntu kuti akakuboozye. Ino nkaambo nzi ncentisweekelwe bana bangu boonse bobilo mubuzuba bomwe?”
Izaka mbwaakatumina Jakobo kuli Labani
46 Lino Labeka wakati kuli Izaka, “Mebo bandicima akundikatazya aaba bakaintu ba Isau bazwa kumisyobo iimbi iitali yesu. Naa kuti awalo Jakobo akwatile mucisi cino kubasimbi bamusyobo ooyu wa Bahiti inga cabota kuti ndafwa buyo kwiinda kuti nkepona.”