Matalikilo 22
Abulahamu mbwaakatipaizye Izaka
1 Musule akooku Leza wakasunka Abulahamu, wakamwiita wati, “Abulahamu!” Abulahamu wakaingula kuti, “Mwami!” 2 Eelyo Leza wakati, “Tola mwanaako, mwana ngojisi alikke, Izaka ooyo ngoyandisisya kapati, uunke kunyika ya Moliya. Waakusika ooko, ukamutuule, akabe cipaizyo cakutenta atala acilundu ncetikakutondezye.”
3 Buce buyo cifumo-fumo, Abulahamu wakagonka nkuni zyakuyootentya cipaizyo, wakazibikka ambongolo yakwe, wakatolelezya Izaka ababelesi bobilo, mbaabo bakeenda kuya kubusena oobo Leza mbwaakamulailila. 4 Nibakeenda mazuba otatwe mulweendo lwabo, Abulahamu wakabubona busena oobo alaale. 5 Mpoonya wakati kubabelesi bakwe, “Amusyaale aano ambongolo. Mebo amulombe tulaya okuya tukapaile. Twaakumana tulaboola alimwi okuno kulindinywe.”
6 Lino Abulahamu wakapa Izaka kuti ayumune nkuni zyakutentya cipaizyo, walo wakayumuna makala aamulilo alimwi amesi. Boonse bobilo bakatalika kweenda antoomwe. 7 Beendeende buyo, Izaka wakati, “Bataata!” Wisi wakaingula kuti, “Ninzi mwanaangu?” Izaka wakabuzya kuti, “Ndabona kuti mulijisi mulilo ankuni, ino kabelele kakupaizya kali kuli?” 8 Abulahamu wakaingula kuti, “Leza mwini uyootupa kabelele mwanaangu.” Lino bakeenda antoomwe.
9 Nibakaakusika kubusena oobo Leza mbwaakamulailila, Abulahamu wakayaka cipaililo, wabikka nkuni alincico. Amane wakaanga mwanaakwe, wamulazika acipaililo atala ankuni. 10 Wakabweza mesi kuti apaizye. 11 Pele mungelo wa Leza wakamwiita kuzwa kujulu, wakati, “Abulahamu, Abulahamu!” Wakaingula kuti, “Mwami!” 12 Mpoonya mungelo ooyo wakati, “Utacisi mwanaako nikuba kucita cimwi cintu kulinguwe pe. Nkaambo lino ndaziba kuti ulilibambilide lyoonse kuswiilila Leza, taakwe noondikasya mwanaako ooyo ngojisi.” 13 Lino Abulahamu naakalanga wakabona mugutu ulipatide kumeja mucoonde. Wakaakumweeta wakapaizya nguwe mubusena bwamwanaakwe. 14 Busena oobo Abulahamu wakabwiita kuti, “Jehovajile” nkokuti, “Mwami Leza nguupa.” Kusikila sunu bantu bacibwaamba kuti, “Acilundu ca Mwami Leza nguupa.”
15 Mungelo wa Leza wakaita Abulahamu lwabili kuzwa kujulu wakati, 16 Majwi aa Leza ngaaya, “Ndasyomezya akukonkezya muzina lyangu, ndiyookuleleka kapati akaambo kaceeci ncoocita, kuti tookakaka kundipa mwanaako alikke buyo ngojisi. 17 Ndasyomezya kuti ndiyookuleleka kuti ukabe aalunyungu lunji mbuli nyenyezi zyakujulu ambuli musenga waacito calwizi lupati. Balunyungu bayoozunda basinkondonyina. 18 Alimwi misyobo yoonse yaansi ndiyooileleka akaambo kabo, nkaambo yebo watobela malailile aangu.” 19 Mpoonya Abulahamu wakabweeda amwanaakwe kubabelesi bakwe, eelyo bakainka antoomwe ku Biiyasyiba nkwaakali kukkala.
Lunyungu lwa Nahoo
20 Musule Abulahamu wakamvwa kuti Milika mukamunyina Nahoo wakazyala bana. 21 Uzi nguwakali mwana wakusaanguna, musyoonto wakwe wakali Buza. Kwakali a Kemuweli wisi Alamu, 22 Kasedi, Hazoo, Pilidasyi, Jidilafu a Betuweli. 23 Betuweli nguwakali wisi Labeka. Milika nguwakazyala bana aaba bali lusele kumunyina Abulahamu.
24 Leyuma, mwanakasuwa wa Nahoo, wakazyala Tebaa, Gahamu, Tahasyi a Maaka.