Kulonga 12
Pobwe lya Kwiindilila
1 Lino Mwami Leza wakati kuli Mozesi a Aloni mu Ijipiti, 2 “Ooyu mwezi uyooba ngomwezi wanu mutaanzi mumwaka.” 3 Amwaambile bantu Baisilayeli boonse kuti, “Mubuzuba bwakkumi bwamwezi uuno, umwi aumwi muntu uleelede kusalila mukwasyi wakwe kabelele. Mumukwasyi omwe-omwe kabelele komwe. 4 Kuti naa mukwasyi kuuli musyoonto cakuti tuukonzyi kulya kabelele koonse akukamana, ooyo mukwasyi alimwi amukwasyi umwi nguubambene aawo, baswaangane mbubonya mbuli mweelwe wabantu bayo, balide antoomwe, babalana akuziba kuti muntu omwe-omwe inga walya buti. 5 Kabelele aako kaleelede kuti kakanyina kampenda, kagutu kamwaka omwe. Kalakonzya kuba kabelele naa kapongo. 6 Mukabambe kabelele aaka kusikila mubuzuba bwakkumi aane bwamwezi ooyu, ndendilyo buleya boonse bwa Isilayeli nibuyoojaya tubelele twabo kumangolezya. 7 Bamana abakatole bulowa bumwi akubulamba kuzicinda zyamulyango aazikotamino zyamaanda oomo mobayootulida. 8 Masiku aayo bayoolya nyama iiyokedwe, iiligwa acinkwa citakwe mimena alimwi acisyu cilula. 9 Mutakalyi nkwange niiba nnjike, pele kiiyokedwe yoonse, mutwe, maulu alimwi azyamukati. 10 Tamweelede kusiya imwi nyama kuti ilale mane buce pe, kuti naa yasyaala ileelede kutentwa. 11 Mboobu mbomutikiilye, mukiilye zisani zyanu kazyaangidwe mucibuno, ndyasyo zyanu kazili kumaulu, misako yanu kiili mumaanza, alimwi muleelede kwiilya cakufwambaana, nkaambo nkwiindilila kwa Mwami Leza.
12 “Masiku ngoonya aaya ndilainda munyika ya Ijipiti akujaya mwana mulombe wakusaanguna wamuntu naba wamunyama. Ndabasubula baleza bapange boonse bamu Ijipiti, ndime Mwami Leza ndaamba. 13 Bulowa bulaba citondezyo cakuzibya maanda momukkala. Ndabona bulowa ndaindilila, taakwe penzi litimusikile akumunyonyoona, ndasubula nyika ya Ijipiti. 14 Oobu buzuba bube bwaciibalusyo kulindinywe. Muleelede kunoobusekelela kuti mbuzuba bucitwa pobwe lya Kwiindilila kwa Mwami Leza. Mumazyalani oonse muleelede kubusekelela mumulawo kukabe kutamani.
Pobwe lyacinkwa citakwe mimena
15 “Kwamazuba aali ciloba muleelede kulya cinkwa citakwe mimena. Mubuzuba butaanzi muleelede kugwisya mimena yoonse mumaanda aanu, nkaambo kuti umwi akalye cinkwa cilaamimena kuzwida mubuzuba butaanzi kusikila mubuzuba bwaciloba, muntu ooyo uyoozandulwa kuzwa ku Baisilayeli. 16 Mubuzuba butaanzi, alimwi amubuzuba bwaciloba mukaswaangane. Mutakabeleki mumazuba aayo, ccita buyo kubamba zilyo muntu omwe-omwe nzyeelede kulya. 17 Muleelede kulibamba nyoonse eeli pobwe lyacinkwa citakwe mimena, nkaambo mubuzuba oobu nentigwisye misyobo yanu kuzwa mu Ijipiti. Kamuyoobamba buzuba oobu mumazyalani oonse mbuli mulawo kukabe kutamani. 18 Muleelede kulya cinkwa citakwe mimena kuzwida kumangolezya aabuzuba bwakkumi aane bwamwezi mutaanzi kusikila kumangolezya aabuzuba bwamakkumi obilo abumwi bwamwezi ngoonya ooyo. 19 Kwamazuba aali ciloba taakwe mimena yeelede kujanwa mumaanda aanu. Kuti naa umwi akalye cinkwa cilaamimena, uyoozandulwa kuzwa ku Baisilayeli, kunyina makani naa muzwakule naa muzyale. 20 Tamweelede kulya cinkwa cijisi mimena.”
Pobwe litaanzi lyakwiindilila
21 Lino Mozesi wakaita basololi boonse ba Baisilayeli akuti kulimbabo, “Kamuya mukasale kabelele kamukwasyi wanu, mwamana mujaye kabe kapobwe lyakwiindilila. 22 Mukwapule katabi ka hisopo mukanyike mubulowa buli mumutiba, mwamana mukabulambe azicinda zyamulyango aazikotamino. Kutabi naba omwe uutizwide anze lyaŋanda yakwe pe, kusikila buce cifumo-fumo. 23 Nkabela Mwami Leza ainda mu Ijipiti kuya bujaya Baijipiti abona bulowa acikotamino akuzicinda zyamulyango, ulaindilila aŋanda eeyo. Takoozumizya sikunyonyoona kuti anjile mumaanda aanu akumujaya. 24 Muyoobamba mulawo ooyu cikabe cilengwa canu camazuba oonse, nywebo abana banu mane kukabe kutamani. 25 Alimwi mwaakunjila nyika eeyo Mwami Leza njatikamupe mbubonya mbuli mbwaakasyomezya kale, muleelede kuyoocibamba cilengwa eeci. 26 Nkabela bana banu baakumubuzya kuti, ‘Caamba nzi cilengwa eeci?’ 27 Mukaingule kuti, ‘Ncipaizyo cakwiindilila kwa Mwami Leza nkaambo wakaaindilila maanda aa Baisilayeli mu Ijipiti aawo naakajaya Baijipiti akusiya maanda eesu.’” Mpawo bantu bakafugama bakomba. 28 Baisilayeli bakainka akucita eeco Mwami Leza ncaakalaililide Mozesi a Aloni.
Baijipiti mbubakafwidwa bana babo bakusaanguna
29 Lino akati kamasiku Mwami Leza wakajaya bana bakusaanguna boonse mu Ijipiti, kuzwida kumwanaa Falo, wakali kuyoonjila bwami, kusikila kumwana wamwaange muntolongo. Alimwi aboonse bana babanyama bakusomona abalo bakajaigwa. 30 Eelyo Falo abalupati-pati bakwe alimwi a Baijipiti boonse bakabuka masiku aayo, lino kwakali kweema kupati mu Ijipiti, nkaambo kwakanyina ŋanda niiba yomwe mwatakali mwana uufwide. 31 Masiku ngoonya aayo Falo wakaita Mozesi a Aloni, “Nywebo a Baisilayeli bako amufwambaane kamuya, muzwe mucisi, amubasiye bantu bangu, muunke mukakombe Mwami Leza mbubonya mbumwakakumbila. 32 Mutolelezye mbelele, mpongo, aŋombe zyanu, mbubonya mbumwakakumbila, mweende, kamuya! Mukandikombele kuti ambebo ndijane cileleko.”
33 Lino Baijipiti bakabakumbilisya Baisilayeli kuti bafwambaane kusiya nyika bakati, “Toonse inga twamana kufwa kuti tamuunki.” 34 Aboobo bantu bakabweza busu bukandidwe butakwe mimena, bayumuna amakuko. Busu oobo bwakabikkidwe muzikangilo ziputaidwe muzisani zyabo. 35 Baisilayeli bakacita mbubonya mbuli mbwaakaambide Mozesi, bakakumbila zilibotezyo zyansiliva azyangolida, alimwi azisani kuzwa ku Baijipiti. 36 Mwami Leza wakacita Baijipiti kuti balemeke Baisilayeli, nkabela bakabapa nzibakakumbila. Aboobo Baisilayeli bakatola lubono lwa Baijipiti.
Baisilayeli mbubakalonga kuzwa mu Ijipiti
37 Baisilayeli bakatalika lweendo lwabo kuzwa kumunzi mupati wa Lamesisi akuya ku Sukkoti. Kwakali baalumi bali zyuulu zili myaanda iili cisambomwe, kutabalilizya bakaintu abana. 38 Alimwi kwakali abamwi bantu banji, bakatolelela mbelele, mpongo, aŋombe zinji. 39 Bakapanga zinkwa zitakwe mimena kuzwa kubusu bwakakandidwe obuya mbubakayumuna kuzwa ku Ijipiti. Tiibakabikkide mimena nkaambo bakagwisigwa cakubinda mu Ijipiti. Alimwi taakwe nibakajana ciindi cakulibambila nikuba kubamba zyakulya.
40 Baisilayeli bakalikkede mu Ijipiti kwamyaka iili myaanda yone amakumi otatwe. 41 Mubuzuba oobo mbubonya bwakumanizya myaka eeyi iili myaanda yone amakumi otatwe nibwakamana, misyobo yoonse yabantu ba Mwami Leza yakazwa akusiya Ijipiti. 42 Oobo bwakali busiku Mwami Leza naakali kulindilila kubagwisya kuzwa mu Ijipiti, aboobo busiku oobo mbobusiku bwakwiibaluka Mwami Leza nzyaakacitila Baisilayeli kwamazyalani oonse.
Malailile aa Pobwe lya Kwiindilila
43 Lino Mwami Leza wakaambila Mozesi a Aloni kuti, “Ngaaya malailile aa Pobwe lya Kwiindilila. Taakwe muzwakule uyoolilya pe, 44 ccita buyo muzike wakaulwa nguukonzya kulilya amana kupalulwa. 45 Taakwe mweenzu sikuswaya buyo naa mubelesi uunjide buyo mulimo weelede kulilya. 46 Lileelede kulidwa muŋanda mutakagwisyi anze cakulya eeci pe. Mutakatyoli kafuwa nikaba komwe pe. 47 Boonse buleya bwa Isilayeli buleelede kubamba pobwe eeli. 48 Kuti naa kuli pobwe lya Kwiindilila, kwamana kuli muzwakule uuyanda kucita pobwe eeli andinywe, mweelede musaangune mumupalule abaalumi boonse mumukwasyi wakwe, eelyo natiswaangane anywebo mupobwe. Mumucite mbuli kuti Muisilayelinyoko. Pele taakwe muntu uutapalwidwe weelede kulilya. 49 Malailile aaya ngoonya alajatikizya sicisi alimwi amweenzu uukkala mukati kanu.” 50 Boonse Baisilayeli bakaswiilila akucita mbuli Mwami Leza mbwaakalaililide Mozesi a Aloni. 51 Mubuzuba oobo mbubonya Mwami Leza wakabagwisya Baisilayeli kuzwa mu Ijipiti, kabali mumisyobo yabo.