Kulonga 11

Zyalufu lwabana bakusaanguna

¹ Lino Mwami Leza wakati kuli Mozesi, “Lino kwasyaala buyo cisubulo comwe ncetiletele Falo a Baijipiti. Camana eeco uyoomuleka muunke. Aakumuleka uyoomutandila limwi. ² Baambile bantu, baalumi abakaintu boonse kuti bakumbile, zyakulibotezya zyansiliva azyangolida ku Baijipiti mbobabambene limwi.” ³ Eelyo Mwami Leza wakacita Baijipiti kuti babede Baisilayeli nkumbu. Nkaako balupati-pati ba Falo alimwi abantu buyo bakalemeka Mozesi kapati.

⁴ Lino Mozesi wakaambila Falo kuti, “Mboobu mbwaamba Mwami Leza, ‘Akati kamasiku ndileendeenda akati ka Baijipiti, ⁵ nkabela mwana wakusaanguna mulombe ulafwa.’ Kuzwida kumwanaa Falo, ooyo weelede kunjila bwami kusika kumwana wamukaintu muzike uuziya. Abalo bana baŋombe bakusomona balafwa. ⁶ Kuyooba mibila mipati mu Ijipiti, iitanakubede, alimwi tiikooyooba limbi pe. ⁷ Pele mwalo mu Baisilayeli taakwe naba mubwa uutikakuwe bantu nibaba banyama pe, oobo mbomuyooziba kuti Mwami Leza ulaandaanya Baijipiti a Baisilayeli.” ⁸ Nkabela Mozesi wakamanizya akuti, “Boonse aaba balupati-pati bako bazoondizida akundivuntamina akuti, ‘Kamuzwa, yebo abantu bako boonse!’ Musule akooku ndiyooinka.” Mpawo kanyemede kapati Mozesi, wakazwa, wasiya Falo.

⁹ Lino Mwami Leza wakaambide kuli Mozesi kuti, “Falo takooyookuswiilila pe, kutegwa nkacite azimbi zigambya mu Ijipiti.” ¹⁰ Eelyo Mozesi a Aloni bakazicita zyoonse eezi kumbele lya Falo, pele Mwami Leza wakacita kuti Falo abe sicinguni, nkaako taakwe naakabaleka Baisilayeli kuti basiye nyika yakwe.