Josyuwa 13

Nyika zyatakanatolwa

¹ Lino Josyuwa naakacembaala, Mwami Leza wakamwaambila kuti, “Ono wabamudaala, nikuba boobo kucili nyika mpati iitanatolwa. ² Nyika iicisyeede njeeyi: zisi zyoonse zya Bafilisiti a Bagesyuu, ³ kuzwa kumulonga wa Syihoo kujwe lya Ijipiti mane kusika kucisi ca Ekiloni kunyika, cili ncecisi ca Bakenani. Eezi nzisi zyabeendelezi ba Bafilisiti bosanwe bamu Gaza, Asyidodi, Asyikeloni, Gati, amu Ekiloni aaba mba Baavi. ⁴ Kuzwa kumusanza kucili cisi ca Bakenani, acimbi cili ku Alaa ya Basidoni mane kuyoosika ku Afeki mucisi ca Baamoli. ⁵ Kucili acimbi ca Bageli cili ku Baaligadi munsi acilundu ca Hemoni kuyoosika ku Lebohamati, uutegwa mumpata wa Hamati.

⁶ “Lino kwaamba zyabantu boonse bakkede muzilundu kutalikila ku Lebanoni kuyoosika ku Misilefotimaimu bali Mbasidoni, mebo lwangu njoobatanda kumbele lya Baisilayeli kuti nyika yabo ibe lukono lwaba Isilayeli, mbubonya mbuli mbundakakulailila. ⁷ Weelede kuyoopa nyika eeyi kumisyobo iili fuka kubikkilizya acisela camusyobo wa Manase.”

Nyika yakujwe lyamulonga wa Jolodani mbuyakapambaulwa

⁸ Misyobo ya Lubeni, Gadi acisela camusyobo wa Manase bakakonede kale nyika eeyo Mozesi mubelesi wa Mwami Leza njaakabapa. Yakali kujwe lyamulonga wa Jolodani. ⁹ Nyika yabo yakali kutalikila ku Alowe kumbali aakkuti lya Anoni, amunzi wakali akati-kati kalyo, mane aluundu loonse lwa Makkeda kuyoosika ku Diboni. ¹⁰ Yakacili kuya mpaka kuyoosika kumunyinza wa Anoni kubikkilizya aminzi yosanwe eeyo yakali kweendelezegwa a Sihoni mwami wa Baamoli, wakali mu Hesyiboni. ¹¹ Yakali kujatikizya Giliyadi antoomwe acisi ca Bagesyuu a Bamaaka antoomwe anyika yoonse yacilundu ca Hemoni aya Basyani mane kuyoosika ku Saleka. ¹² Cakali cisi coonse cakali kweendelezya Ogi wakali ngowamamanino ku Balefa. Ogi wakali ku Asyitaloti a Edileyi. Mozesi wakazunda bantu aaba akutola nyika yabo. ¹³ Pele Baisilayeli tiibakatanda bantu bamu Gesyuu abamu Maaka, aboobo mpobacili asunu akati ka Baisilayeli.

¹⁴ Lino Mozesi taakakonya Balevi nyika, nkaambo zipaizyo zitentelwa Mwami Leza, Leza wa Isilayeli, ndolukono lwabo mbubonya mbuli mbwaakabasyomezya.

Nyika yakapegwa Balubeni

¹⁵ Njeeyi nyika Mozesi njaakapa Balubeni muziinga zyabo. ¹⁶ Nyika yabo yakali kutalikila kukkuti lya Alowe, mumunzi uuli akati kalyo, kujatikizya abanda lyoonse lyaku Medeba. ¹⁷ Nyika eeyi yakali kujatikizya amunzi wa Hesyiboni aminzi yoonse yakali muluundu lwa Diboni, Bamotibaali, Betibaalimeyoni, ¹⁸ Jahazi, Kedemoti, Mafaati, ¹⁹ Kiliyataimu, Sibumaa, Zeletisyahaa, yakali mutulundu-lundu twamukkuti, ²⁰ Betipeo, ayeeyo yakali munselelo lyacilundu ca Pisiga kubikkilizya Betijesyimoti. ²¹ Yakali kujatikizya minzi yoonse yaluundu acisi ca Sihoni mwami wa Baamoli wakali kweendelezya ku Hesyiboni. Mozesi wakazunda mwami ooyu antoomwe abami ba Bamidiyani aaba: Evi, Lekemu, Zuu, Huu a Leba. Boonse aaba bakali beendelezi mubulelo bwa Sihoni. ²² Kunze lyabaabo bakajaigwa munkondo, Baisilayeli bakajaya a Balaamu mwanaa Beyo wakali musondi. ²³ Mulonga wa Jolodani ngomunyinza wa Balubeni. Eeyi njeminzi Balubeni njibakapegwa muziinga zyabo kuti ibe lukono lwabo.

Nyika yakapegwa Bagadi

²⁴ Lino njeeyi nyika Mozesi njaakapa Bagadi muziinga zyabo. ²⁵ Nyika yabo yakali kujatikizya cisi ca Jaza, aminzi yoonse yamu Giliyadi acisela canyika ya Baamoni mane kuyoosika ku Alowe kufwiifwi aku Labba. ²⁶ Kuzwa ku Hesyiboni munyinza wakali kusika ku Lamatimizipaa a Betinimu. Kuzwa ku Mahanaimu wakali kusika kucisi caku Debii. ²⁷ Mukkuti lya Jolodani, nyika yabo yakali kujatikizya Betihalamu, Betinimulaa, Sukkoti, a Zafoni antoomwe acisi coonse ca Sihoni mwami wa Hesyiboni. Munyinza wabo kumbo wakali mulonga wa Jolodani. Kujwe wakali kuyoosika kumagolelo alwizi lwa Kineleti. ²⁸ Eeyi njeminzi Bagadi njibakapegwa muziinga zyabo kuti ibe lukono lwabo.

Nyika yakapegwa Bamanase

²⁹ Lino njeeyi nyika Mozesi njaakapa cisela ca musyobo wa Manase muziinga zyawo kuti ibe lukono lwabo. ³⁰ Nyika yabo yakali kusika ku Mahanaimu kujatikizya anyika ya Basyani yoonse, cisi coonse ca Ogi mwami wa Basyani ncaakali kulela, kubikkilizya aminzi yoonse ya Jaii mu Basyani. Antoomwe minzi eeyi yakali makumi aali cisambomwe. ³¹ Nyika eeyi yakali kujatikizya acisela ca Giliyadi aminzi ya Asyitaloti a Edileyi. Eeyi njiyakali minzi yabwami bwa Ogi mu Basyani. Cisi coonse eeci cakapegwa kucisela calunyungu lwa Makii mwanaa Manase.

³² Mbombuboobu Mozesi mbwaakapambaula nyika nakacili mumabanda aa Mowabu mutala kujwe lyamulonga wa Jolodani. ³³ Pele Mozesi taakakonya Balevi nkaambo Mwami Leza, Leza wa Baisilayeli, ndolukono lwabo, mbubonya mbuli mbwaakabasyomezya.