Josyuwa 12

Bami mbaakazunda Mozesi

¹ Mbaaba bami banyika eeyo aabo Baisilayeli mbibakazunda akutola nyika yabo nkwiili kujwe lyamulonga wa Jolodani. Nyika eeyi yakali kutalikila kukkuti lya Anoni kuyoosika kucilundu ca Hemoni, kujatikizya akujwe lyankanda. ² Wakusaanguna kuzunda ngu Sihoni mwami wa Baamoli, wakali kulela mu Hesyiboni. Cisi cakwe cakali kutalikila ku Alowe, akati kakkuti lya Anoni mane kuyoosika kumulonga wa Jabboki uuli ngomunyinza wa Baamoni. Cisi eeci cakali kujatikizya acisela canyika ya Giliyadi. ³ Sihoni nguwakali kulela ankanda yoonse kujwe kuzwa kulwizi lwa Kineleti kuyoosikila kulwizi lwamunyo mane ku Betijesyimoti, akuyoosikila kunselelo lyacilundu ca Pisiga kumusanza.

⁴ Bamane bakazunda Ogi mwami wa Basyani, umwi wa Balefa bakacili kupona, ooyu wakalikulela mu Asyitaloti amu Edileyi. ⁵ Nguwakali kulela anyika iili kulubazu lwa cilundu ca Hemoni, Saleka, acisi coonse ca Basyani kuyoosika kuminyinza ya Gesyuu a Maaka kujatikizya acisela cacisi ca Giliyadi kumunyinza wacisi ca Sihoni mwami wa Hesyiboni.

⁶ Mozesi, mubelesi wa Mwami Leza antoomwe a Baisilayelinyina wakazunda bami aaba. Amane wakapa nyika eeyi ku Balubeni, Bagadi, acisela ca Manase kuti ibe lukono lwabo.

Bami bakazundwa a Josyuwa

⁷ Mbaaba bami banyika eeyo Josyuwa abasilumamba bakwe njaakazunda. Aaba boonse bakali kukkala kumbo lyamulonga wa Jolodani. Bakabazunda boonse kutalikila ku Baaligadi mukkuti lya Lebanoni kuyoosika kucilundu ca Halaki kulangana aaku Siiya. Josyuwa wakapa Baisilayeli nyika yabami aaba mukweendelana aziinga zyabo. ⁸ Nyika eeyi yakali kujatikizya nyika yatulundu-lundu, yamabanda, yakunselelo, yankanda alimwi ayaku Negebu iili njenyika ya Bahiti, Baamoli, Bakenani, Bapelezi, Bahivi a Bajebusi. ⁹ Baisilayeli bakazunda bami baminzi eeyi, mwami wamunzi wa Jeliko, mwami wa Ai, uubambene amunzi wa Beteli, ¹⁰ mwami wa Jelusalemu, mwami wa Hebuloni, ¹¹ mwami wa Jaamuti, mwami wa Lakisyi, ¹² mwami wa Egiloni, mwami wa Geza, ¹³ mwami wa Debii, mwami wa Geda, ¹⁴ mwami wa Hooma, mwami wa Aladi, ¹⁵ mwami wa Libuna, mwami wa Adulamu, ¹⁶ mwami wa Makkeda, mwami wa Beteli, ¹⁷ mwami wa Tapuwa, mwami wa Hefa, ¹⁸ mwami wa Apeki, mwami wa Lasyaloni, ¹⁹ mwami wa Madoni, mwami wa Hazoo, ²⁰ mwami wa Syimulonimeloni, mwami wa Akisyafu, ²¹ mwami wa Taanaki, mwami wa Megido, ²² mwami wa Kedesyi, mwami wa Jokineyamu mucisi ca Kaameli, ²³ mwami wa Doo, mucisi ca Nafotidoo, mwami wa Goyimu, mucisi ca Giligali, ²⁴ amwami wamunzi wa Tiiza. Bami boonse aaba bakali makumi otatwe aumwi.