Jobo 42
Jobo
1 Mpoonya Jobo wakaingula Leza akuti,
2 “Ndilizi kuti ulakonzya kucita zintu zyoonse,
akuti coonse ncokanza tacikakukacili pe.”
3 Wakabuzya kuti, “Nguni ooyo uunyansya kulaya amajwi aatali aabusongo?
Ndazumina kuti mebo ndakaamba majwi ngendatakazi azintu zigambya nzendatakazi pe.
4 Wakandaambila kuti ndikuswiilile waambe,
wamana ulandibuzya, eelyo mebo ndiingule.
5 Ndakamvwide buyo zyanduwe pele lino ndakubona ameso.
6 Aboobo ndalitenga lwangu ndemwini, ndeempa ndalibikka kasuko atwe.”
Leza mbwaakaleleka Jobo
7 Lino Leza amane buyo kwaamba kuli Jobo, wakati kuli Elifazi, Mutemani, “Bukali bwangu bwaya kulinduwe antoomwe abeenzinyoko bobilo nkaambo tiimwakaamba ciluleme andime mbuli mubelesi wangu Jobo mbwaakacita. 8 Aboobo lino kamuya kumubelesi wangu Jobo mutolelele abasune bali ciloba, bagutu bali ciloba, mukalipede cipaizyo cakutenta. Nkabela Jobo mubelesi wangu uyoomukombela, aawo ndiyootambula kukomba kwakwe kuti intamuciti ceelede kufubaala kwanu. Nkaambo taakwe nimwakaamba ciluleme andime mbuli mubelesi wangu Jobo mbwaakacita.”
9 Aboobo Elifazi Mutemani, Bilidadi Musyuwa, a Zofa Munaamati bakainka, baakucita eeco Mwami Leza ncaakabaambilide, eelyo Leza wakatambula kukomba kwa Jobo.
10 Lino Jobo naakamana kukombela beenzinyina baya, Leza wakamubweedezezya zintu zyakwe zyoonse nzyaakajisi. Amane Leza wakapa Jobo kobilo buvubi bwiinda mbwaakajisi kusaanguna. 11 Eelyo banabokwabo bacizi bakwe, abaabo boonse bakali kumuzi bakalya antoomwe anguwe muŋanda yakwe. Bakamutondezya kuusa, bakamuumbulizya akaambo kamapenzi Leza ngaakamuletelede. Nkabela umwi aumwi wabo wakamupa di lyansiliva anweenwe yangolida.
12 Lino Mwami Leza wakaleleka Jobo mumazuba aakwe aamamanino kwiinda mbwaakamulelekede kusaanguna. Nkaako wakaba aambelele zisika kuzyuulu zili kkumi azine, nkamela zili zyuulu zili cisambomwe, cuulu cazipani zyabasune, ambongolo zili zyuulu zili cuulu. 13 Alimwi wakazyala bana balombe bali ciloba abana basimbi botatwe. 14 Mutaanzi kuzyalwa kubasimbi aabo wakamuulika zina lya Jemima, wabili wakali Keziya, eelyo watatu wakali Kelenihapuki. 15 Munyika yoonse kwakanyina bana basimbi bakali kweebeka mbuli ba Jobo pe. Wisi wakabapa lukono antoomwe abanyinandumi babo.
16 Lino musule akooku Jobo wakapona myaka iili mwaanda amakumi one. Wakabona bana bakwe abana babo mane kusikila kuzyalani lyane. 17 Eelyo Jobo wakafwa koongwede.