Jobo 30
1 “Pele lino bandicita cisesyo, aabo baalumi bana kulindime,
nikuba kuti bamawisi nsiindali kubayeeyela nikuba kubabikka antoomwe ababwa beembela butanga bwambelele zyangu!
2 Mbantu batakonzyi kundiletela mpindu, nkaambo tabakwe nguzu.
3 Balikotede akaambo kakubula,
anzala iiliko balapulukuta miyanda yazisamu zyamusokwe.
4 Balacela mukata musokwe akusya ndiya.
5 Batandwa kuzwa akati kabantunyina,
balabawelela mbuli mbobawelela mubbi.
6 Mutunkolola twatulonga mobakkala,
amumalindi amumampangala aazilundu.
7 Balacwema musokwe balaswaangana akati kaziteyo.
8 Mbabana babafuba-fuba, batakwe amaanu,
bakatandwa munyika.
9 “Lino ndaba cisesyo munyimbo zyabo, ndaba kasimi kabo.
10 Balandisesemwa, bandizangila, inga bandibona buyo baswida mate.
11 Nkaambo Leza wanditesya akundibombya nkaako tabalilemeki mumeso aangu.
12 Kubbazu lyalulyo lwangu mpumba yabampelenge yandibukila,
balanditandaanya, balanditamikizya nzila zyabo zyalunyonyooko.
13 Balasinka nzila yangu,
balayungizya mapenzi aangu nkaambo taakwe uubakazya.
14 Balandisaala kuzwa kumabazu one, kabandivuumukila.
15 Aboobo ziyoosya zyandiboolela,
bulemu bwangu bwapepulwa aluuwo,
alimwi coolwe cangu camana mbuli makumbi.
16 “Lino moyo wangu waatikila mulindime,
mazuba aamapenzi andijata.
17 Zifuwa zyangu zilapwayaula masiku oonse,
aalo maciswe aangu ayabulema mbobuceda.
18 Canguzu Leza wandizambatila,
wandimanikizya mbuli nsingo yacibaki cangu.
19 Leza wandisowela muntimba,
nkabela ndaba mbuli lusuko atwe.
20 Ndakulilila O Leza pele taakwe nondivuwa pe,
ndaima pele yebo tondiboni pe.
21 Wandibeda silunya, wandipenzya ajanza lyako lyanguzu.
22 Ulandinyamuna akambizi, ulanditansika mulinkako akundibbwantausya.
23 Ndizi kuti uyoonditola kulufu,
kubusena buswaanganina banamunji.
24 “Nikuba boobo sena muntu mumilwi yalunyonyooko tayandauli lugwasyo?
Alimwi amuciindi camapenzi sena talilili luse?
25 Sena taakwe nindakalila abapengede?
Sena moyo wangu taakwe niwakausila bacete?
26 Pele nindakali kulangila bubotu, bubi mbubwakasika,
alimwi nindakali kulindilila mumuni, mudima wakasika.
27 Moyo wangu wapya, taubatami pe,
mazuba aakupenga andeenzya.
28 Ndileenda cakulyeetezya, pele taakwe uunditontozya,
ndaima akati kabantu akulilila kuti ndigwasigwe.
29 Ndimunyina wabamwaaba, amweenzinyina wampye.
30 Lukanda lwangu lwasanduka akubozoka,
aalo mafuwa aangu alapwaya abulwazi.
31 Kalumbu kangu kaba kakulizya nyimbo zyabuumba,
anyeele yangu yaba jwi lyabaabo balila.