Jobo 22
Elifazi
1 Mpoonya Elifazi Mutemani wakati,
2 “Sena muntu ulakonzya kugwasya kuli Leza?
Ncobeni muntu musongo ulaligwasya mwini.
3 Sena ulakonzya kubotezya Singuzuzyoonse abululami bwako?
Ncinzi ncokonzya kujana naa nzila zyako kazilondokede?
4 Sena nkumulemeka ncaakukalalila akukusubula?
Sena bubi bwako tabuli bupati?
5 Pele wakusubula nkaambo kakuti bubi bwako mbupati.
Ede taakwe magolelo aandubizyo zyako.
6 Akaambo kacikwelete, wakanyanga mwanookwanu zyakusama zyakwe,
nkaako walo wakabula cakulivumba.
7 Taakwe nookabapa maanzi bakatede, wakaunya bakafwide nzala cakulya.
8 Pele yebo uli muntu ulaampuwo. Alimwi acisi ncokkala ncipati,
9 Wakatanda bamukabafu acinkwamaanza, wakapenzya bamusyaala.
10 Nkaako tukole tuli kuzingulukide, kuyoowa kupati kwakutilimuna.
11 Mudima wakuvumba kutegwa utakonzyi kubona, maanzi manji akubbizya.
12 ‘Sena Leza tali mujulu lyamajulu?
Kwiindilila nyenyezi zili kujulu kwini.’
13 Wamana yebo ubuzya kuti, ‘Ino Leza uzi nzi?
Sena ulakonzya kubeteka kali ulisisidwe amakumbi?
14 Uleenda mumweenya wakujulu uuvungumene katatuboni nkaambo kamakumbi.’
15 Sena unooceenda munzila njibakeenda basizinyonyoono baciindi?
16 Bakafwambaana kufwa ciindi cabo kacitanasika,
ntalisyo yabo niyakakukululwa amaanzi manji.
17 Bakaambila Leza kuti, ‘Tuleke tobeni!
Ani inga Singuzuzyoonse watucita buti?’
Pele walo lwakwe nguwakazuzya maanda aabo azintu zibotu
18 nikuba kuti aaba babi tiibakali kuswiilila malailile akwe.
19 Baluleme balabotelwa babona mamanino aabaabo bapilingene. Balabasabula,
20 akuti, ‘Ncobeni basinkondoma banyonyoonwa
alimwi ncibakasiide mulilo wacisyukuta.’
21 Leka kuzwangana a Leza, uyanzane anguwe, nkabela ulakuleleka.
22 Kotambula buyo kulaya kwakwe,
waabambe majwi aakwe mumoyo wako.
23 Usanduke cakulibombya kuli Singuzuzyoonse,
utande bubi boonse kuzwa muŋanda yako.
24 Mali aako aangolida akubede mbuli lusuko buyo,
ngolida yako mbotu wiisowele akati kamabwe aamulonga.
25 Ndendilyo Singuzuzyoonse natibe ngolida ansiliva yako.
26 Aawo uyoobotelwa muli Singuzuzyoonse,
alimwi uyoolungumana kuli Leza mulusyomo.
27 Waakukomba uyookumvwa, ayebo uyoozuzikizya zisyomezyo zyako kulinguwe.
28 Kufumbwa ncoyanda ciyoocitika masimpe,
alimwi mumuni uyoomunikila nzila zyako.
29 Nkaambo Leza ulatambya balisumpula,
pele batete moyo ulabafutula.
30 Ulavuna batajisi mulandu,
uyoofutulwa ayebo kuti kocita zisalala.”