Jelemiya 5

Cinyonyoono ca Jelusalemu

¹ Amweendeende mumigwagwa ya Jelusalemu, amulange-lange muyeeye, amulangaule muzisambalilo.

Kuti na mujane muntu naba omwe ooyo uusyomeka uuyandaula bwini ndalekelela munzi ooyu.

² Nikuba kuti balati, “Mbubonya mbuli Mwami Leza mbwali muumi, nikuba boobo bakonkezya cakubeja.

³ O Mwami Leza sena tolangi buyo zyabwini? Wakabauma,

pele tiibakamvwa kucisa. Wakabapwaya, pele bakakaka kale kulaigwa. Bakaba bankwaambila bbwe tiibakeempa pe.

⁴ Ndakayeeya, ‘Aaba mbabacete bali mbafuba-fuba,

nkaambo tabazi nzila ya Mwami Leza, niziba mbeta zya Leza wabo.’

⁵ Nkaako ndainka nkakanane ambabo, kasimpe balizi nzila ya Mwami Leza,

ambeta zya Leza wabo.” Pele abalo ncimwi buyo bakatyola joko, akumansaula zitolopo.

⁶ Nkaako syuumbwa uuzwa mucisaka uyoobalwana, umpe uuzwa munkanda uyoobajaya,

siluwe uyoobayubilila kumbali aaminzi yabo, kuti kazapaula kufumbwa ooyo uutizwe,

nkaambo buzangi bwabo mbupati, alimwi kuleya kwabo kwavula.

⁷ Ino inga ndamulekelela buti? Bana banu bakandisiya akukonkezya

muli baleza batali baleza pe. Ndakabapa zyoonse nzibakali kuyanda,

nikuba boobo bakacita bumambe, akuzuumukila kumaanda aabwaamu.

⁸ Balineneede mbuli bapoho bamabbiza. Umwi aumwi unyomenena mukamweenzinyina.

⁹ Sena intabasubuli akaambo kazeezi? Sena intaupilusizyi bubi musyobo uuli boobu?

¹⁰ Koya wiinde mumyuunda yamisaansa wiinyonyoone, pele utaimaninizyi pe.

Ukwapaule mitabi yayo, nkaambo bantu aaba tabali ba Mwami Leza.

¹¹ Bamusyobo wa Isilayeli abalunyungu lwa Juda tiibali kusyomeka kulindime, Mbwaamba Mwami Leza.

¹² Kwaamba zya Mwami Leza bakaambilana zyakubeja, bakati, “Taakwe ncanga wacita! Taakwe penzi linga lyatusikila, tatukaboni panga niiba nzala pe. ¹³ Basinsimi bali mbuli luuwo buyo, taakwe amajwi aa Leza ngobamvwide, aboobo eeco ncobaamba acicitikile mbabo.” ¹⁴ Lino mboobu mbwaamba Mwami Leza Singuzuzyoonse ulati, “Akaambo kakuti bantu baamba majwi aaya, njoocita kuti majwi aangu aali mumulomo wako abe mulilo bantu aaba babe nkuni zyuumpwa amulilo ooyo.”

¹⁵ Nywebo nolunyungu lwa Isilayeli, “Mbwaamba Mwami Leza, ndamuletela musyobo wakulaale uzoomulwana, musyobo wakaindi muyumu, bantu baamba musyobo ngomutazi, bali amwaambo ngomutamvwi. ¹⁶ Mikutu yamivwi ili mbuli cuumbwe cijalukide, boonse mbaasilumamba basintanze. ¹⁷ Bayoolya nzimwakatebula azilyo, bayoolya bana banu balombe abasimbi, bayoolya matanga aambelele aŋombe, bayoolya misaansa yanu amikuyu. Bayoonyonyoona amapanga minzi yankwakwa eeyo njomusyoma.

¹⁸ “Nikuba boobo mumazuba aayo. Mbwaamba Mwami Leza. Nsikooyoomunyonyweeda limwi. ¹⁹ Bantu baakubuzya kuti, ‘Ino nkaambo nzi Mwami Leza naacita zintu zili boobu kulindiswe?’ Mukabaambile kuti, ‘Mbubonya mbuli mbumwakandisiya akubelekela baleza bambi munyika yanu, nkaako anywebo muyoobelekela bamasi munyika eeyo iitali yanu.’”

²⁰ “Amwaambilizye eeci kuli balunyungu lwa Isilayeli amucilungulule mu Juda. ²¹ Amumvwe makani aaya nywebo nobantu bafuba-fuba, bazinzilika, nywebo nomujisi meso pele tamuboni nywebo nomujisi matwi pele tamumvwi, ²² Sena tamweelede kundiyoowa? Mbwaamba Mwami Leza. Sena tamweelede kuzyangama kumbele lyangu? Ndakacita musenga kuti ube munyinza walwizi, ooyu mugano ngotutakonzyi kusotoka pe. Mayuwe alakonzya kukapaika, pele taakonzyi kuzunda, alakonzya kuvuuma, pele taakonzyi kusotoka. ²³ Pele bantu aaba bajisi myoyo yacinguni yabuzangi. Balaya bayabuzaanta, ²⁴ Tabalyaambauzyi kuti, ‘Atulemeke Mwami Leza wesu, uupa mvula yamupeyo ayakumwaka muciindi ceelede, akutubambila mvwiki zyakutebula.’ ²⁵ Milimo yanu mibi njiikasya zintu eezi, zibi zyanu nzyozyasinkilila zintu zibotu.

²⁶ “Akati kabantu bangu kuli bantu babi, bayubilila mbuli bantu bateya bayuni, mbuli bantu aabo bateya makole aakuca bantu. ²⁷ Mbuli zizangala zizwide bayuni, maanda aabo azwide zyakubeja, bakavuba akuba aanguzu, ²⁸ bakaneneya akubumbana. Milimo yabo mibi tiigoli, tababeteki bweelede milandu yabamusyaala, makani aabacete tabaakosoli kabotu.

²⁹ “Sena intabasubuli akaambo kaceeci? Mbwaamba Mwami Leza. ‘Sena intaubweedezezyi bubi musyobo ooyo uuli boobu? ³⁰ Kuli cintu cibi cijazya nsoni cakacitika munyika. ³¹ Basinsimi basinsima zyakubeja bapaizi beendelezya mbuli mbobayanda beni, abalo bantu bangu mbobayanda oobu. Pele kumamanino bayoocita buti?’”