Jelemiya 4
Mbubakaambilwa kuti beempe
1 Kuti naa ulapiluka kulindime O Isilayeli, piluka. Mbwaamba Mwami Leza. Kuti naa musowe mituni yanu iindisesemya, akuti kamutaciyooleyi limbi, 2 alimwi kuti naa mukakonkezye kuti, “Mbuli Mwami Leza mbwali muumi, mubwini, mukasimpe amubululami, eelyo misyobo uyooileleka, mulinguwe bayoojana bulemu.”
3 Mboobu mbwaamba Mwami Leza kubantu bakucisi ca Juda abamu Jelusalemu ulati, “Amupande nyika yanu eeyo iitanalimidwe, mutasyangi akati kamamvwa. 4 Amulipe lwanu nobeni ku Mwami Leza, amusalazye myoyo yanu, nywebo nobantu bamu Juda anywebo nobamu Jelusalemu. Kwataba boobo ndamunyemena akumutenta mbuli mulilo, akaambo kabubi bucitwa, ndamutenta taakwe uunga wamuzima pe.”
Cisi ca Juda mbucakakanzwa kusaalwa
5 Amwaambilizye mu Juda, mulungulule mu Jelusalemu kuti,
“Amusibe myeembo munyika yoonse! Amupozomoke,
kamuti, ‘Amubungane antoomwe! Atutijile kuminzi yankwakwa, tufutuke!’
6 Amulizye mweembo wakuti batijile ku Ziyoni! Amutije kuti mufutuke cakufwambaana.
Nkaambo ndaleta lunyonyooko kuzwa kunyika, lunyonyooko lutaambiki pe.”
7 Kwasokomoka syuumbwa kuzwa mucoonde cakwe, sikunyonyoona misyobo walibambilila.
Wasiya busena bwakwe kuti azoonyonyoone cisi cako. Minzi yako yoolwa, taicijisi bantu pe.
8 Nkaako amusame masaka, mweeme mulile,
nkaambo Mwami Leza mubukali bwakwe tatulekede.
9 Mwami Leza ulati, “Mubuzuba oobo mwami ulaluba, abalupati-pati bakwe bayootyompwa, basololi bayooyoowa, basinsimi bayoogambwa.”
10 Mpawo ndakati, “Maawe O Mwami Leza, ani wakali kubacenga buyo bantu aaba bamu Jelusalemu nookali kuti, ‘Mulakkala muluumuno,’ kakuli mapanga aleezekedwe kale amikosi yesu.”
11 Kuciindi eeco bantu aaba bamu Jelusalemu bayooambilwa kuti, “Luuwo lupya luzwa mutulundu tulamfu tunyina bwizu munkanda lwabbubbwida bantu bangu, pele kutali kuti lupululule nikuba kusalazya, 12 pele luuwo luyoozwa kulindime. Lino ndabapa mulandu.”
13 Amubone, ngooyo ulaza mbuli makumbi, nkalaki zyakwe zibilima mbuli kambizi, mabbiza aakwe alazuza kwiinda basikwaze.
14 Nobamu Jelusalemu amugwisye bubi buli mumyoyo yanu, musalale, mufutulwe. Ino muyooleka lili kuyeeya zibi?
15 Kuli ijwi lyaambilizya kuzwa ku Dani, lilungulula zyamapenzi aayoozwida kutulundu twaku Efulemu. 16 Lilati, “Ambila bamisyobo, ambilizya mu Jelusalemu kuti, ‘Kwaboola nkamu yabasilumamba basinkilizya kuzwa kunyika yakulaale, boompolola kuti kubuke nkondo yaminzi yacisi ca Juda. 17 Bazinguluka cisi ca Juda mbuli baalumi balindila muunda, nkaambo kakuti candizangila,’ Mbwaamba Mwami Leza.
18 “Nzila zyako amilimo yako nzizyakuletela mapenzi aaya. Walisubuzya omwini. Mapenzi aaya taalilulili! Alasika mane akumoyo!”
Juda mbuyakazingulukwa abasinkondonyina
19 Maawe! Maawe! Ndaminingana mukucisa. Ndimvwide kucisa mumoyo wangu!
Moyo wangu ulaluma, nsikonzyi kuumuna pe. Ndimvwide kulila kwamweembo, ndimvwide mweembo wankondo.
20 Mapenzi ayootobelana, mukaindi kasyoonto buyo matente aangu aloolwa, civuka cangu ciloolwa talili tente pe.
21 Ino ndaima ciindi cilamfu cili buti nkebwene nkondo akumvwa mweembo kuusibwa?
22 “Bantu mbafuba-fuba, tabandizi pe. Mbana bazinzilika,
tabakwe maanu pe. Kucita zibi balikubwene kapati, pele tabazi kucita zibotu.”
Jelemiya mbwaakabona cilengaano calunyonyooko
23 Ndakalanga anyika yakanyina bube kaitajisi cintu pe.
Ndakalanga kujulu kwakanyina mumuni nuuba buti.
24 Ndakalanga kuzilundu zyakali kutenkaana, tulundu toonse twakali kuzumbaana.
25 Ndakalanga, taakwe bantu mbindakabona, bayuni boonse bamuluuwo bakaluulukide.
26 Ndakalanga, ndakabona kuti nyika yakanyina kulya, yakali nkanda buyo,
minzi yayo yoonse yakalooledwe kumbele lya Mwami Leza mubukali bwakwe bupati.
27 Mboobu mbwaamba Mwami Leza ulati, “Nyika yoonse iyooolwa, nikuba kuti nsikainyonyweedi limwi.
28 Nkaako bantu bamunyika bayoolila, alyalo julu mujulu liyoosiya,
nkaambo ndime ndaamba, nsikaleki pe, ndikanzide nsikoopilusya moyo pe.
29 Baakumvwa misindo yabasimabbiza abasimata bantu baminzi yoonse bayootija.
Bamwi bayooya muzyoonde, bamwi bayoolimanikizya mukati kamandomba.
Minzi yoonse iyoosyaala buyo mbuboobu taakwe uuyookkala mulinjiyo pe.
30 Ino ulatyani yebo omunzi uunyonyweedwe?
Ino usamina nzi masani aasalala pyu akusama tuwenge twangolida?
Ino ulambila nzi meso aako amulambo? Kulibotya kwako nkwabuyo.
Bayandwa bako bakusampaula, bayanda kukujaya.
31 Ndimvwide kulila mbuli kwamukaintu uuminingana,
kutongela kuli mbuli kwamukaintu uutumbuka mwana wakusaanguna,
ndijwi lyamwana musimbi wa Ziyoni, ulafuula akutandabika maanza aakwe,
ulati ‘Maawe! ndanetuka, ndaabwa kubajayi.’”