Jelemiya 48
1 Kwaamba zyacisi ca Mowabu mboobu mbwaamba Mwami Leza Singuzuzyoonse,
wa Isilayeli ulati, “Maawe kumunzi wa Nebo nkaambo wanyonyoonwa,
amunzi wa Kaliyataimu akuzundwa, mayubilo mayumu amwaigwa akupwaigwa.
2 Cisi ca Mowabu tacikalumbaizigwi limbi pe, baalumi bamu Hesyiboni bayooukanza kuti unyonyoonwe,
‘Amuboole tuulobye musyobo ooyu.’ ‘Ayebo omunzi wa Madimeni uyooumuzigwa, uyootandaanyizigwa abasimapanga.’
3 Amuswiilile kulila kuzwa ku Holonaimu, nkulila kwamapenzi mapati akunyonyoonwa.
4 Cisi ca Mowabu capwaigwa, swiilila kulila kwabana.
5 Batola nzila yaku Luhiti, baya bulilisya, mumugwagwa uuya ku Holonaimu kulyeema kwakunyonyoonwa kwamvwigwa.
6 Amutije, amulivune! Amube mbuli citeyo munkanda amuzuze mbuli cibize wamunkanda.
7 “Lino mbokunga musyoma milimo alubono lwanu, anywebo muyootolwa mubwaange,
awalo Kemosyi leza wanu uyootolwa mubwaange antoomwe abapaizi balupati-pati bakwe.
8 Sikunyonyoona uyooboolela kulwana minzi yoonse,
taakwe munzi nuuba omwe uuyoofutuka.
Kkuti liyoonyonyoonwa, gundu liyoopwaigwa, nkaambo Mwami Leza nguwaamba.
9 Amusansaile munyo mucisi ca Mowabu nkaambo caandonyonyoonwa,
minzi yaco ilaba matongo, taakwe muntu uunookkala mulinjiyo pe.
10 Asinganyizigwe muntu ooyo uutaciti
mulimo wa Mwami Leza amoyo omwe,
asinganyizigwe ooyo uutayandi kutila bulowa apanga lyakwe!”
Minzi yamu Mowabu mboyakanyonyoonwa
11 “Kuzwa kumatalikilo bamucisi ca Mowabu baliliibide, mbuli waini walekwa kuti ubatame, uutalonzegwi-lonzegwi kuzwa munongo imwi kutilwa muli imwi, tabanatoledwe mubwaange. Aboobo mucanka wawaini uli mbubonya mbuli mbuubede, kununkilila kwawo takusanduki. 12 Pele mazuba alasika, mbwaamba Mwami Leza, nenjootuma bantu bayooulonzya-lonzya munongo, nkabela bayookunamuna nongo zyawo akupwayaula. 13 Nkaako bamu Mowabu bayoousila Kemosyi leza wabo, mbubonya mbuli baluzubo lwa Isilayeli mbubakausa nibakali kusyoma munzi wa Beteli.
14 Nobamowabu, ino inga mwaamba buti kuti, Tuli basilumamba baalumi bacibwene kulwana?
15 Kakuli cisi cilanyonyoonwa, minzi yaco ilasaalwa,
bakubusi baco babotu balajaigwa, mbwaamba Mwami Leza zina lyakwe ngu Mwami Leza Singuzuzyoonse.
16 Koolwa kwacisi ca Mowabu kulaafwiifwi, mapenzi aaco alasika cakufwambaana.
17 “Amucuumbulizye amuciyumye-yumye nywebo nyoonse nomubambene aancico,
nywebo nyoonse nomuzi zyampuwo yaco amuti, Akaka bulelo bwanguzu bwatyoka buti,
ino musako wabulemu bulemenede watyoka buti!
18 Nywebo nomukkala mu Diboni amusekelele azyuuno zyanu zyabulemu mukkale ansi aayumu,
nkaambo ooyo uutinyonyoone cisi ca Mowabu ulaboola kuzoomulwana akuzoonyonyoona minzi yanu yankwakwa.
19 Amwiimine munsi aamugwagwa mulangilizye, nywebo nomukkala mu Alowee.
Amubuzye mwaalumi uutija amukaintu uuzuzaana kuti, Ino mwabaa nzi?
20 Cisi ca Mowabu causigwa nsoni nkaambo casaalwa. Amulile mweeme!
Amwaambilizye kumbali aamulonga wa Aanoni kuti cisi ca Mowabu canyonyoonwa.
21 “Lubeta lwasika kugundu, ku Holoni, Jaaza, aku Mefaati, 22 ku Diboni, Nebo, Betidibulataimu, 23 ku Kiliyataimu, Betigamuli aku Betimeyoni, 24 ku Keliyoti a Bozila, akuminzi yoonse amucisi ca Mowabu iili kulaale aafwiifwi. 25 Nguzu zya Mowabu zyakosoolwa, maanza aaco atyolwa. Mbwaamba Mwami Leza. Nsana zya Mowabu zyazundwa, akupwaigwa.” Mbwaamba Mwami Leza.
Cisi ca Mowabu mbociyoobombezegwa
26 Mwami Leza wakati, “Amucite kuti cisi ca Mowabu cikolwe, nkaambo cavoolozya Mwami Leza. Mowabu yaalabane mumalusi aayo, aibe cisampuzyo. 27 Sena Baisilayeli tiibakali cisampuzyo kulinduwe? Sena bakajatwa akati kankamu yababbi ncookali kugunya-gunya mutwe mukubasabula?
28 “Amusiye minzi yanu mukatuntumanine akati kamyaala, nywebo nomukkala mu Mowabu. Amube mbuli nziba iiyaka citeente cayo kumbali aamulomo wampangala. 29 Twakamvwa kulisumpula kwacisi ca Mowabu kulisumpula kwabantu baco akulibikka aantu, kulisumpula kwabo, akantu-kantu, akulikankaizya kwamyoyo yabo. 30 Ndizi kulisumpula kwabantu baco, pele nkwabuyo. Mbwaamba Mwami Leza. Kulisumpula kwaco kunyina ncokujanya pe. 31 Nkaako ndililila cisi ca Mowabu, ndililila cisi coonse ca Mowabu, ndalila akaambo kabantu baku Kehaleseti. 32 Ndamulila mbuli bulila Jaza, nomisaansa yaku Sibuma. Mitabi yanu ilitandabede mane kuyoosika kulwizi, mane njeeyo yaakusika kulwizi lwa Jaza. Sikunyonyoona wasikila micelo ansaansa zibizidwe. 33 Takucikwe kukondwa akutangala kujanwa mumyuunda yamisaansa yamicelo amyuunda yamu Mowabu. Ndalesya waini kuzwa kuzikandilo, taakwe muntu naba omwe uuzilyatauka cakukondwa. Nikuba kuti kuli kuyoba, takuli kuyoba kwakukondwa.
34 “Kulila kwabo kwamvwigwa kuzwa ku Hesyiboni, ku Eleyale aku Jahazi, kakuzwa ku Zowa mane kuyoosika ku Holonaimu aku Egilati Syelisyiya, nkaambo naaba maanzi aaku Nimulimu aliyuminide. 35 Mucisi ca Mowabu njoolobya bapaizi mumalende, kubikkilizya akutentela baleza babo tununkilizyo, mbwaamba Mwami Leza.
36 “Aboobo moyo wangu ulila Mowabu mbuli nyeele iilila bantu baku Kehaleseti. Lubono oolo ndobakajisi lwaloba. 37 Boonse bagelwa, zilezu zyanyoolwa, boonse bakosoolwa maboko, boonse basamide masaka muzibuno. 38 Atala amaanda oonse aamu Mowabu amuzisambalilo zyoonse bantu baide kulila, nkaambo ndapwayaula Mowabu, mbuli nongo muntu njataciyandi, mbwaamba Mwami Leza. 39 Maawe yoonse yanyonyoonwa! Maawe balalila. Ino Mowabu yagunwa buti oobu! Mowabu yaba cisi cisampukide, yaba ciyoosyo kuli baabo mbobabambene limwi.”
Cisi ca Mowabu mbocitakooyoolekelelwa
40 Mboobu mbwaamba Mwami Leza ulati Amulange sikwaze wafuuma, wababamuna mababa aakwe acisi ca Mowabu. 41 Minzi iyoozundwa, mayubilo mayumu aayooolwa. Mubuzuba oobo myoyo yabasilumamba bamu Mowabu iyooba mbuli moyo wamukaintu uutumbuka. 42 Cisi ca Mowabu cilanyonyoonwa, nkaambo cavoolozya Mwami Leza. 43 Nobantu bamu Mowabu muyoowa mudindi, kakole kalamulindilila. Mbwaamba Mwami Leza. 44 Kufumbwa ooyo uuyootija kuziyoosyo uyoowida mudindi, kufumbwa ooyo uuyoozwa mudindi uyoocegwa mukakole, nkaambo njooletela cisi ca Mowabu mwaka wacisubulo, mbwaamba Mwami Leza. 45 Aabo batija bayooyanda kukwabililwa mu Hesyiboni, munzi ooyo wakali kulelwa amwami Sihoni, pele uyootentwa. Mulilo uyootenta minyinza ansonje zyazilundu oomo basinkondo bamu Mowabu mubakali kuyuba. 46 Maawe kulinduwe ocisi ca Mowabu! Bantu baku Kemosyi banyonyoonwa, bantu bako baalumi batolwa mubwaange, bantu bako bakaintu batolwa mubuzike.
47 Nikuba boobo njooboozya zyoolwe zyacisi ca Mowabu mumazuba aaboola. Mbwaamba Mwami Leza. Mpoonya aawa mpaamanina makani aaamba zyacisi ca Mowabu.