Jelemiya 47
Makani Mwami Leza ngaakatumina Bafilisiti
1 Ngaaya majwi aa Mwami Leza aakasikila Jelemiya musinsimi aaamba zya Bafilisiti Falo katanalwana munzi wa Gaza.
2 Mboobu mbwaamba Mwami Leza ulati, “Bona maanzi mbwaafuta kunyika,
aba fwipi-fwipi lyamaanzi, ayoopaya anyika, ali zyoonse eezyo zili mulinjiyo,
muminzi, aali boonse aabo bakkala mulinjiyo. Bantu bayoolila, boonse aabo bakkala mucisi bayooema,
3 baakumvwa kulila kwansumba zyamabbiza, baakumvwa kulila kwankalaki zyabasinkondonyina akwamavwili aazyo.
Bamawisi tabakanyoni kuti bagwasye bana babo, maboko aabo ayoolileka.
4 Nkaambo buzuba bwasika bwakunyonyoona Bafilisiti boonse,
akunyonyoona boonse bacipona aabo bakonzya kugwasilizya minzi ya Taya a Sidoni.
Mwami Leza uyanda kunyonyoona Bafilisiti basyeede bazwa kunkomwe zya Kafuta.
5 Baku Gaza bayoolinyoola mitwe mukulila, baku Asyikeloni bayooumuzigwa.
Nywebo nomusyeede bamucibanda, ino muyoolinengaula kwaciindi cilamfu buti?
6 Akaka opanga lya Mwami Leza, uyooleka lili kutema kuti ulyookezye?
Bweeda mumukutu wako, leka libatamike.
7 Pele ino inga lyalyookezya buti kakuli Mwami Leza walilailila,
Mwami Leza walilailila kuti lilwane munzi wa Asyikeloni abakunkomwe yalwizi?”