Jelemiya 46
Mwami waku Babuloni mbwaakazunda Ijipiti
1 Ngaaya majwi aa Mwami Leza aakasikila Jelemiya musinsimi aakali kwaamba zyamasi. 2 Kwaamba zyacisi ca Ijipiti, ngaaya makani aakatumwa kumpi yabasilumamba ba Falo Neko mwami wa Ijipiti eeyo yakazundwa ku Kaakemisyi kumbali aamulonga wa Yufuletisi a Nebukadineza mwami waku Babuloni mumwaka wane wa Jehoiyakimu mwanaa Josiya mwami wacisi ca Juda. Akati,
3 “Amulibambile antobo zyanu mpati ansyoonto amuye kunkondo!
4 Amwaange mabbiza, batanta batante! Amundandame kamusamide angowani!
Amusyobe masumo aanu, amusame zyakulwanya zyanu!
5 Ino ndibwene nzi? Bayoowa, babunduluka, basilumamba babo bazundwa.
Batija cakufwambaana, tabacebuki, kuli ziyoosya koonse-koonse, mbwaamba Mwami Leza.
6 Aawo bazuzisya tabakonzyi kutija, abalo basinguzu tabakonzyi kulikwabilila.
Kunyika kumbali aamulonga wa Yufuletisi baladadalika akuwa.
7 Ino nguni ooyu uufuta mbuli mulonga wa Nailo,
uuli mbuli milonga iili aamaanzi aafwipi-fwipi?
Ijipiti njiifuta mbuli Nailo, mbuli milonga iili aamaanzi aafwipi-fwipi.
8 Ilati, ‘Ndainka ndivumpe nyika, njoonyonyoona minzi abantu bayo.’
9 Amuundumuke nomabbiza! Amukacailisye nobasinkalaki! Amweende nobasilumamba,
nomuzwa ku Kusyi aku Puti nomubwezede ntobo, nomuzwa ku Lidiya bacibwene kufusa mata.”
10 Pele buzuba mbwa Mwami Leza, Mwami Leza Singuzuzyoonse mbuzuba bwakupilusizya bubi,
mbwapilusizya bubi bamulwana. Panga liyoobalya mane kusikila likalilekele,
mane kusikila likamvwe abulowa. Nkaambo Mwami Leza Singuzuzyoonse
uyoopoboola basinkondonyina munyika nkoili kunyika kumbali aamulonga wa Yufuletisi.
11 Kamuya ku Giliyadi mukalete mabbona nobantu bamu Ijipiti.
Misamu minji njomubelesya njabuyo, tamukoopona pe.
12 Misyobo iyoomvwa zyansoni zyanu, kulila kwanu kuyoomvwigwa munyika yoonse.
Basilumamba banu banoolebana, boonse bayoowa antoomwe.
Nebukadineza mbwayooza
13 Ngaaya makani Mwami Leza ngaakaambila Jelemiya musinsimi azyakuboola kwa Nebukadineza mwami waku Babuloni nazoolwana cisi ca Ijipiti ulati,
14 “Ambilizya eeci mu Ijipiti, ucilungulule mu Migidoli,
caambilizye amu Memfisi amu Taapenesi kuti, ‘Amundandame, mulibambilile, nkaambo nkondo yabamana aabo mbomubambene limwi.’
15 Nkaambo nzi basilumamba ocisi ca Ijipiti nobeelede kunyonyoonwa?
Tabakonzyi kwiima nkaambo Mwami Leza wabatonkela ansi.
16 Kanji-kanji banoodadalika, bayoolimbana. Bayooti, ‘Amubuke tuunke
kubantu bokwesu kucisi cokwesu, tutije nkondo iibbebba eeyi!’
17 “Ooko bayoopozomoka akuti, ‘Falo mwami wa Ijipiti ngusicikwala buyo ciindi.’
18 Mbubonya mbuli mbwendi muumi mbwaamba Mwami,
uuli zina lyakwe ngu Leza Singuzuzyoonse,
‘Kuyoosika umwi mbuli cilundu ca Taboo akati kazilundu, mbuli Kaameli kumbali alwizi.’
19 Amwaange zibbudu zyanu kamuya mubwaange, nywebo nomukkala mu Ijipiti,
nkaambo Memfisi uloolwa, ulaba matongo taakwe uucinookkala mumo pe.
20 Cisi ca Ijipiti cili mbuli mpwizi yeebeka,
pele mbuwo zilaboola kuzooiluma zizwa kunyika.
21 Basilumamba baco baulidwe bacibelekela bali mbuli boombe basaninwa baneneede.
Abalo bayootija tabakooyooima pe, nkaambo buzuba bwamapenzi bwabasikila, ciindi cakuti basubulwe casika.
22 Baijipiti bayoosweena mbuli nzoka iitija, baakubona basinkondonyina
kabazabuza cakulibambila bayooboola kabajisi atweembe mbuli bantu bagonka masamu.
23 Bayoogonka cisaka caco, mbwaamba Mwami Leza, nikuba kuti kacisinkene buti.
Mbanji kapati kwiinda cikwikwi, tababaliki pe.
24 Bamucisi ca Ijipiti bayoousigwa nsoni, bayooabwa kubantu bakunyika.”
25 Mwami Leza Singuzuzyoonse, wa Isilayeli ulati, “Ndiyanda kusubula Amoni leza wa Batebesi. Njoosubulizya a Falo, acisi ca Ijipiti abaleza baco, abami baco abaabo basyoma Falo. 26 Njoobaaba kuli baabo bayanda kubajaya, kuli Nebukadineza mwami waku Babuloni abalupati-pati bakwe. Musule akooku bantu bayookkala mucisi ca Ijipiti mbubonya mbuli kuciindi cakale-kale.” Mbwaamba Mwami Leza.
Mwami Leza uyoofutula bantu bakwe
27 “Utayoowi, Jakobo omubelesi wangu, utakankami O Isilayeli.
Kasimpe njookuvuna kuzwa kucisi cili kulaale, njoovuna balunyungu lwako kuzwa kunyika
ooko nkubakatolwa mubwaange. Jakobo uyookkala alimwi muluumuno akuliiba, taakwe uuyookuyoosya pe.
28 Utayoowi, Jakobo omubelesi wangu, nkaambo ndili anduwe. Mbwaamba Mwami Leza.
Nikuba kuti nkanyonyweede limwi misyobo eeyo nkundakamumwaisizye,
nsikooyoomunyonyweeda limwi nywebo pe. Njoomusansaula, pele cabululami, nsikooyoomuleka buyo nketamusubuli pe.”