Jelemiya 41

¹ Mumwezi waciloba Isyimayeli mwanaa Netaniya, mwanaa wa Elisyama wakali waciinga cabwami, wakali umwi wabalupati-pati bamwami, wakaboola kuli Gedaliya mwana wa Ahikamu abaalumi bali kkumi ku Mizipa. Lino kabacilya antoomwe kuya, ² Isyimayeli mwanaa Netaniya abaalumi bali kkumi aabo mbaakali aabo bakanyamuka akujaya Gedaliya mwana wa Ahikamu, mwanaa Syafani apanga, bajaya yooyo mwami waku Babuloni ngwaakabikka kuba mweendelezi wacisi. ³ Isyimayeli wakajaya a Bajuda boonse aabo bakali a Gedaliya ku Mizipa antoomwe abasilumamba ba Bakalodiya bakali kooko.

⁴ Buzuba bwakatobela Gedaliya kajaidwe, kakutanaziba muntu naba omwe, ⁵ baalumi bali makumi aali lusele aabo bakalinyweede zilezu, bakazapaula zisani zyabo akulinengaula bakaboola kuzwa ku Syekemu, Syilo aku Samaliya, bakaletelezya azituuzyo zyabo zyamaila atununkilizyo kuŋanda ya Mwami Leza. ⁶ Isyimayeli mwana Netaniya wakainka kuzwa ku Mizipa kuti akabacingauzye, wakali kuya bulila. Naakabaswaangana wakati, “Amuboole kuli Gedaliya mwanaa wa Ahikamu.” ⁷ Nibakanjila mumunzi, Isyimayeli mwanaa Netaniya antoomwe abaalumi mbaakali aabo bakabajaya akubasowela mucitelekezezyo. ⁸ Pele bali kkumi bakati kulinguwe, “Utatujayi! Tulijisi maila abulotwe, mafuta abuci zilisisidwe mumuunda.” Aboobo wakabaleka taakabajailizya pe. ⁹ Lino citeelekezyo oomo mwaakasowela mitumba yoonse yabaalumi aabo mbaakajaya antoomwe a Gedaliya cakali camwami Asa eeco ncaakacitide cikwabilizyo kuzwa kuli Baasya mwami wa Isilayeli. Isyimayeli mwanaa Netaniya wakacizuzya mitumba.

¹⁰ Isyimayeli wakajata bantu boonse aabo bakali ku Mizipa nkokuti, bana basimbi bamwami antoomwe abaabo boonse bakasyeede ooko, aabo Nebuzaladani silutwe wabalindizi babulelo mbaakabikkide kuti kabalangwa a Gedaliya mwana wa Ahikamu. Isyimayeli mwanaa Netaniya wakabatola mubwaange akubatola ku cisi ca Baamoni.

¹¹ Lino Johanani mwanaa Kaleya antoomwe abapati babasilumamba mbaakali aabo nibakamvwa zibyaabi zyoonse eezyo Isyimayeli mwanaa Netaniya nzyaakacita, ¹² bakaita basilumamba babo boonse akuunka kuyoolwana Isyimayeli mwanaa Netaniya. Bakaakumweenzya kumbali aaziba pati mu Gibiyoni. ¹³ Lino bantu boonse aabo Isyimayeli mbaakali aabo nibakabona Johanani mwanaa Kaleya abapati babasilumamba mbaakali aabo bakabotelwa. ¹⁴ Bantu boonse Isyimayeli mbaakatolede mubwaange ku Mizipa bakapiluka akuboola kuli Johanani mwanaa Kaleya. ¹⁵ Pele Isyimayeli mwanaa Netaniya abantu bakwe bali lusele bakatija Johanani akutijila ku Baamoni.

¹⁶ Mpawo Johanani mwanaa Kaleya abapati babasilumamba boonse mbaakali aabo bakasolweda bantu boonse aabo bakasyaala kuzwa ku Mizipa aabo mbaakaakuboozya kuzwa kuli Isyimayeli mwana Netaniya ooyo wakajaya Gedaliya mwanaa wa Ahikamu, nkokuti basilumamba, bakaintu, bana abapati abazibe aabo mbaakagwisizye ku Gibiyoni. ¹⁷ Bakeenda mane bakaakulyookezezya ku Gelutikimihamu kufwiifwi aku Betelehemu ciindi nobakali kuya ku Ijipiti ¹⁸ kabatija Bakalodiya. Bakalibayoowede nkaambo Isyimayeli mwanaa Netaniya wakajaya Gedaliya Mwana wa Ahikamu, ooyo mwami waku Babuloni ngwaakabikkide kuba mweendelezi wacisi.