Jelemiya 40

Jelemiya waya kuli Gedaliya

¹ Ngaaya majwi aakasika kuli Jelemiya kuzwa ku Mwami Leza ciindi Nebuzaladani silutwe wabalindizi babulelo naakamwaangununa ku Lama. Wakajana Jelemiya kaangidwe anketani akati kabaange boonse bakazwa ku Jelusalemu aku Juda aabo bakali kutolwa mubwaange ku Babuloni. ² Ciindi silutwe wabalindizi naakajana Jelemiya wakati kulinguwe, “Mwami Leza wako nguwakalailila kuti busena oobu busikilwe mapenzi aaya.” ³ Lino ngooyu Mwami Leza wacicita ncobeni eeci mbubonya mbuli mbwaakaambide. Zyoonse eezi zyacitika nkaambo nywebo nobantu mwakabisizya Mwami Leza alimwi tiimwakamuswiilila pe. ⁴ Pele sunu ndakwaangununa kuzwa kunketani zili kumaboko aako. Atuunke ku Babuloni, kuti naa koyanda, nkabela ndinooyookubamba, pele kuti naa kotayandi, utainki. Bona njeeyi nyika yoonse mboibede, koya kufumbwa nkoyanda. ⁵ Pele Jelemiya katanavuuluka kuti aende, Nebuzaladani wakati kulinguwe, “Koya kuli Gedaliya mwana wa Ahikamu, mwanaa Syafani, ooyo mwami waku Babuloni ngwaakabikka kuti kalanga minzi yacisi ca Juda, ukakkale anguwe, akati kabantu nokuba kuunka kufumbwa ooko nkoyanda. Mpawo silutwe wakapa Jelemiya bulilu acipego akumuleka.” ⁶ Aboobo Jelemiya wakainka kuli Gedaliya mwana wa Ahikamu ku Mizipa akuyookkala anguwe akati kabantu bokwabo aabo bakasyeede mucisi.

Gedaliya mweendelezi wacisi ca Juda

⁷ Lino bapati babasilumamba abasilumamba babo bakacili musokwe nibakamvwa kuti mwami waku Babuloni wasala Gedaliya mwana wa Ahikamu kuti abe mweendelezi wacisi akuti kalanga baalumi, bakaintu abana aabo bakali bacete kapati mucisi aabo batakatolwa mubwaange ku Babuloni, ⁸ bakasika kuli Gedaliya ku Mizipa ba Isyimayeli mwanaa Netaniya, Johanani a Jonatani bana balombe ba kaleya, Selaiya mwanaa Tanihumeti, bana balombe ba Efayi Munetofati, a Jaazaniya mwanaa Mumaakati, abasilumamba babo. ⁹ Gedaliya mwana wa Ahikamu, mwanaa Syafani wakakonka akusyomezya baalumi aabo abantu babo. Wakati, “Mutayoowi kubelekela Bakalodiya, amukkale munyika muno mubelekele mwami waku Babuloni, ndendilyo zyoonse nozitimweendele kabotu. ¹⁰ Mebo lwangu ndinookkala mu Mizipa kuti kandimwiiminina ku Bakalodiya aabo banooboola kulindiswe, pele nywebo mweelede kutebula nsaansa, micelo yamainza amafuta, muminzi eeyo njomwakatola.”

¹¹ Lino Bajuda boonse bakali kukkala mu Mowabu, Amoni, Edomu amumasi amwi oonse nibakamvwa kuti mwami waku Babuloni wakasiya bantu bamwi mu Juda akubikka Gedaliya mwana wa Ahikamu, mwanaa Syafani kuti abe mweendelezi wabo, ¹² bakaboola kucisi ca Juda, kuli Gedaliya ku Mizipa kuzwa mumasi oonse oomo mubakamwaikilide. Bakatebula nsaansa zinji amicelo yamainza.

Gedaliya mbwaakajaigwa

¹³ Johanani mwanaa Kaleya abapati babasilumamba boonse bakacili musokwe bakaboola kuli Gedaliya ku Mizipa, ¹⁴ akuzooti kulinguwe, “Sena tozi kuti Baalisi mwami wa Baamoni watuma Isyimayeli mwanaa Netaniya kuti azookujaye?” Pele Gedaliya mwana wa Ahikamu taakabasyoma.

¹⁵ Mpawo Johanani mwanaa Kaleya wakati kuli Gedaliya cakusisikizya ku Mizipa, “Ndileke nduunke nkajaye Isyimayeli mwanaa Netaniya, nkabela taakwe uunga waziba pe. Ino ulakujaila nzi akucita kuti Bajuda boonse aaba bakweengelede bamwaike akuti bamu Juda basyeede balobe?”

¹⁶ Pele Gedaliya mwana wa Ahikamu wakati kuli Johanani mwanaa kaleya, “Utaciti cintu camusyobo ooyu pe! Ncoamba azya Isilayeli tacili cakasimpe pe.”