Jelemiya 39

Munzi wa Jelusalemu mbuwakazundwa

¹ Mboobu munzi wa Jelusalemu mbuwakazundwa. Mumwaka wafuka wakulela kwa Zedekiya mwami wacisi ca Juda, mumwezi wakkumi, Nebukadineza mwami waku Babuloni naakaza kuzoolwana munzi wa Jelusalemu abasilumamba bakwe boonse akuusinkilizya. ² Lino mubuzuba bwafuka bwamwezi wane mumwaka wakkumi aumwi wakulela kwa Zedekiya bwaanda bwamunzi bwakabbobolwa. ³ Mpawo balupati-pati bamwami waku Babuloni bakaboola akuzookkala azyuuno zyaa Mulyango Waakati. Aaba bakali ba Neegalisyaleza waku Samugaa, Nebosaasekimu wakali mupati wabasikalumamba, Neegalisyaleza mupati wabo, abalupati-pati bamwi bamwami waku Babuloni boonse. ⁴ Ciindi Zedekiya mwami wacisi ca Juda abasilumamba boonse nibakababona, bakatija, bakazwa mumunzi masiku batola nzila yamuunda wamwami, bainda amulyango akati kabwaanda bobilo, mbaabo bagama ku Alaba kumusanza.

⁵ Pele impi ya Bakalodiya yakabatobela mane baakumweenzya Zedekiya mumabanda aa Jeliko. Bakamujata akumutola kuli Nebukadineza mwami waku Babuloni ku Libula munyika ya Hamati ooko nkubakamukosweda mulandu. ⁶ Ooko ku Libula mwami waku Babuloni wakajaya bana balombe ba Zedekiya kalibwenene alimwi wakajaya balemenede boonse bamu Juda. ⁷ Mpawo wakanonkola meso aa Zedekiya amane wakamwaanga ansimbi zyamukuba kuti amutole ku Babuloni.

⁸ Bakalodiya bakatenta ŋanda yabwami, amaanda aabantu akupwayaula bwaanda bwa Jelusalemu. ⁹ Nebuzaladani silutwe wabalindizi babulelo wakabatola mubwaange ku Babuloni bantu boonse bakasyeede mumunzi kubikkilizya abaabo bakalyaabide kulinguwe abamwi boonse. ¹⁰ Pele Nebuzaladani silutwe wabalindizi wakasiya aabo bakali bacete mucisi ca Juda, batakajisi zintu pe. Kumane ciindi eeco nciconya wakabapa myuunda yamisaansa amyuunda.

Jelemiya wagwisigwa muntolongo

¹¹ Lino Nebukadineza mwami waku Babuloni wakalaililide boobu azya Jelemiya kwiindila muli Nebuzaladani silutwe wabalindizi babulelo wakati, ¹² “Umutole kwamana, utakamucisi pele weelede kumucitila kufumbwa ncaakumbila.” ¹³ Aboobo Nebuzaladani silutwe wabalindizi, Nebusyazibani mupati wabasilumamba, a Neegalisyaleza mupati wabo abalupati-pati boonse bamubwami bwamu Babuloni ¹⁴ bakatumina kuti Jelemiya agwisigwe mubbuwa lyabalindizi. Aawo wakatumizigwa kuli Gedaliya mwana wa Ahikamu, mwanaa Syafani, kuti amupilusye kumunzi wokwabo. Mbombubo oobu mbwaakakkala akati kabantu bokwabo.

¹⁵ Lino Jelemiya naakacijatidwe kubbuwa lyabalindizi, majwi aa Mwami Leza akasika kulinguwe akuti, ¹⁶ “Koya ukaambile Ebedimeleki Mukusyi kuti, mboobu mbwaamba Mwami Leza Singuzuzyoonse, wa Isilayeli ulati, ‘Ndiyanda kuzuzikizya majwi ngindakaamba kwiindila mukuleta mapenzi, kutali kuzwidilila pe. Kuciindi eeci ciyoozuzikizigwa ayebo kolibwenene. ¹⁷ Pele mubuzuba oobo yebo njookuvuna, mbwaamba Mwami Leza, tokooyooabwa kuli baabo mboyoowa. ¹⁸ Njookuvuna, tokooyoojaigwa munkondo, pele uyoosyaala buyo, nkaambo usyoma ndime, mbwaamba Mwami Leza.’”