Jelemiya 3
Baisilayeli batasyomeki
1 “Kuti naa mwaalumi waleka mukaintu wakwe, kwamana mukaintu ooyo wainka waakukwatwa kumbi, sena ulakonzya kumupilusya alimwi? Sena tacikoosofwaazigwa kwiindilila? Pele yebo wali kukkala mbuli mukaintu mwaamu, wakajisi baalumi banji, sena ono uyanda kupilukila kulindime? Mbwaamba Mwami Leza. 2 Langa mutulundu tuya tunyina bwizu ubone. Sena kuli busena aawo mpootakalalikwa? Cakali mbuli kuti ukkala munsi aamigwagwa kolindilila bayandwa bako, mbuli Mualabu uutuntulika munkanda. Wakasofwaazya cisi abwaamu bwako alimwi abubi bwako. 3 Nkaako mvula yalunywaanywa yakajatwa, mvula yampumpaluya tiiyakawa. Nikuba boobo ucizumanana mubwaamu, tolisendi pe, kuti uuse.
4 “Sena enduwe wali kundiita ono aawa koti, Taata, nduwe mweenzuma kuzwa kubukubusi bwangu, 5 sena unoondinyemede lyoonse? Sena bukali bwako tabukamani? Mbombubo oobu mbokanana, nikuba boobo ulacita bubi boonse mbokonzya.”
Bazisi zya Isilayeli a Juda baleelede kweempa
6 Mumazuba aakulela kwamwami Josiya, Mwami Leza wakati kulindime, “Sena ulibwene kutasyomeka kwa Baisilayeli mbokubede? Bakatanta mutulundu tulamfu toonse amunsi aamasamu aavwevwede, ooko bakacita bumambe. 7 Ndali kuyeeya kuti mbokuli bakacita zyoonse eezi balapilukila kulindime, pele tiibakacita oobo pe, acalo cisinyina ca Juda citasyomeki cakabona eeci. 8 Ndakapa cisi ca Isilayeli citasyomeki lugwalo lwakulekana, kwamana ndakacitanda akaambo kabumambe bwaco boonse. Pele ndakabona kuti acalo cisinyina ca Juda tiicakayoowa, cakacita acalo mbubonya oobo. 9 Lino akaambo kakuti cakanyina makani kapati abwaamu bwa Isilayeli, cakasofwaazya cisi akucita bumambe bwakukomba mabwe azisamu. 10 Nikuba kuti zyoonse eezi zyakacitika, cisinyina ca Juda citasyomeki tiicakapilukila kulindime amoyo woonse, pele cakali kuupaupa buyo ameso, mbwaamba Mwami Leza.”
11 Mwami Leza wakati kulindime, Cisi ca Isilayeli citasyomeki cililuleme kwiinda cisi ca Juda. 12 Koya ukaambilizye makani aaya koyoolangide kunyika, koyooti, “Amupiluke nywebo nobacisi ca Isilayeli batasyomeki. Mbwaamba Mwami Leza. Nsiciyoomulangi cabukali pe, nkaambo ndeengelela. Mbwaamba Mwami Leza. Nsikookunyemena akutamani pe. 13 Ncendiyanda buyo nkuti uzibe mulandu wako, mukuti wakazangila Mwami Leza wako, waabila baleza babuyo luyando lwako munsi amasamu aavwevwede, taakwe nookandiswiilila, mbwaamba Mwami Leza.
14 “Amupilukile nywebo nobantu batasyomeki. Mbwaamba Mwami Leza, nkaambo mebo ndime uuli mbuli mulumi wanu. Ndiyoosala omwe-omwe wanu kuzwa muminzi yanu, alimwi abobilo-bobilo kuzwa muziinga zyanu kuti bakamulete ku Ziyoni. 15 Aawo njoomupa beembezi aabo bali kumoyo wangu, aabo bayoosolweda muluzibo amukumvwisya zintu. 16 Mumazuba aayo nomuyoovula kapati munyika. Mbwaamba Mwami Leza. Bantu tabaciyooambi azyabbokesi lyacizuminano ca Mwami Leza pe, tabacinooyooliyandi nikuba kuyeeya kupenga limbi. 17 Kuciindi eeco bayoocita Jelusalemu kuti ncuuno cabwami ca Mwami Leza, nkabela misyobo yoonse iyooyoboloka mu Jelusalemu kuti balemekezye zina lya Mwami Leza. Tabaciyootobeli limbi cinguni camyoyo yabo mibi. 18 Mumazuba aayo baciinga ca Juda bayooswaangana antoomwe abaciinga ca Isilayeli, nkabela antoomwe boonse bayoozwa nyika nkoili kunyika kuti baze kunyika eeyo njindakapa kuli basikale babo kuti ibe lukono lwabo.”
Kutasyomeka kwabantu
19 Mebo lwangu ndakati, “Ndaliboteledwe kapati kuti nkemucitila mbuli bana bangu beni,
nkemupa nyika mbotu iiyandika, lukono lubotu kwiinda lwamisyobo yoonse. Ndali kuyeeya kuti munoonditobela.
20 Pele mbubonya mbuli mukaintu uutasyomeki kumwaalumi wakwe,
mbubonya oobo anywebo tiimwali kusyomeka kulindime, nywebo nolunyungu lwa Isilayeli.” Mbwaamba Mwami Leza.
21 Kwamvwigwa majwi aakulila atala aazilundu. Mbaisilayeli balila akukombelezya,
nkaambo bakaleya batobela nzila zyabo zibi, akuluba Mwami Leza wabo.
22 Amupilukile nywebo nobantu batasyomeki,
ndamuponya kuzwa mukuwa kwanu kwakutasyomeka.
Balo bakati, “Iiyi tulaboola kulinduwe, nkaambo nduwe Mwami Leza wesu. 23 Kasimpe lugwasyo ndobalindila bantu kuzwa mutulundu ndupyopyongano, nzyobalindila kuzwa muzilundu nducengo. Kasimpe lufutuko lwa Baisilayeli luzwa ku Mwami Leza wesu. 24 Kuzwa kubukubusi baleza bausya nsoni balobya zeezyo bamatata nzibakabelekela mbuli mbelele aŋombe alimwi abana babo balombe abasimbi. 25 Atuvuntame ansi mukuusa kwesu, nsoni zyesu zitujaye. Twakabisizya Mwami Leza wesu, swebo antoomwe abasikale besu, twakabisya kuzwa kubukubusi bwesu kusikila sunu, tiitwakaswiilila Mwami Leza wesu.”