Jelemiya 12
Jelemiya mbwaakabuzya Mwami Leza
1 O Mwami Leza uliluleme lyoonse nejisi cakutongooka kulinduwe.
Ndakanana buyo eeco cijatikizya zyabululami bwako. Ino nkaambo nzi basizibi
nobazwidilila munzila zyabo? Nkaambo nzi boonse batasyomi nobalikkalila?
2 Wakabakkazikizya nkaako bamenede miyanda, balakomena akuzyala micelo.
Lyoonse balakulumbaizya pele tababikki myoyo yabo kulinduwe.
3 Pele yebo ulindizi O Mwami Leza, ulandibona akusunka mizeezo yangu.
Nkaako bakwelaanye mbuli mbelele yakujaya! Bazandule kutegwa babambilidwe buzuba bwakujaigwa!
4 Ino nciindi cilamfu cili buti nyika kiiyumide abwizu mumyuunda kabupuseme?
Akaambo kakuti aabo bakkala mulinjiyo mbabi, banyama abayuni baloba.
Kunze aboobo bantu balati, “Tazibwene eezyo zitucitikila.”
5 Leza wakati, “Kuti naa mwazuzaana amaulu abantu kwamana bakukatazya,
ino mbuti mbonga wazundana amabbiza? Kuti naa walifumpula aatuba
bu ino inga wakonzya buti mumagonde aaku Jolodani?
6 Bana bokwenu, bamukwasyi wako beni mbibakwaaba,
mbibakutambila bantu. Utabasyomi nikuba kuti kabakulumbaizya.”
Mwami Leza mbwaakausa akaambo kabantu bakwe
7 Ndasiya baŋanda yangu, ndatakata lukono lwangu,
ndaaba baabo mbendiyanda kuli basinkondonyina.
8 Lukono lwangu lwandibeda mbuli syuumbwa mucisaka.
Musyobo ooyu ulandivulumina nkaako ndausula.
9 Bantu bangu bali mbuli muyuni wazingwa abaluunga.
Ita banyama bamusokwe kuti baboole bazoomulye antoomwe.
10 Beembezi banji bayoonyonyoona muunda wangu wamisaansa,
akulyatauka muunda wangu, bayoocita muunda wangu uukondelezya kuba tongo lyanyika iinyonyweedwe.
11 Uyooba muunda uunyonyweedwe, uyooba cimpayuma atongo kulinduwe,
cisi coonse ciyoonyonyoonwa, nkaambo kunyina uukonzya kucibamba.
12 Mutulundu toonse tunyina bwizu, twamunkanda basikunyonyoona bayoonanalika,
panga lya Mwami Leza liyoojaya kuzwa kubusena bumwi bwanyika kuyoosika kulubazu lumwi,
kunyina uuyoofutuka pe.
13 Bayoosyanga maila pele bayootebula mamvwa, bayoolipenzya lwabo beni mukubeleka,
pele taakwe acomwe ncobayoojana. Butebuzi bwanu bumuusye nsoni nkaambo Mwami Leza ulinyemede kapati.
Mwami Leza mbwaakasyomezya babambene limwi a Baisilayeli
14 Mboobu mbwaambwa Mwami Leza ulati, “Kwaamba zyabantu babi aabo babambene aabantu bangu, bakatola lubono ndundakapa bantu bangu Baisilayeli, njoobagwisya mumanyika akugwisya bantu ba Juda akati kabo. 15 Pele ndaakumana kubagwisya njoobabeda aankumbu alimwi, akubapilusya umwi aumwi kulukono lwakwe mucisi cokwabo. 16 Kuti naa bakazibisye nzila zyabantu bangu akukonkezya muzina lyangu kabati, ‘Mbubonya mbuli Mwami Leza mbwali muumi, mbubonya mbuli mbubakaiisya bantu bangu kuti kabakonkezya muli Baali, bayookkala akati kabantu bangu.’ 17 Pele kuti umwi musyobo utakaswiilili, njoougwisizya limwi akuunyonyweeda limwi.” Mbwaamba Mwami Leza.