Jelemiya 11
Zya Jelemiya acizuminano
1 Ngaaya majwi aa Mwami Leza aayo aakasika kuli Jelemiya aakuti, 2 “Koswiilila majwi aacizuminano eeci kwamana waambile bantu bamucisi ca Juda abaabo bakkala mu Jelusalemu. 3 Baambile kuti mboobu mbwaamba Mwami Leza, wa Isilayeli ulati, ‘Ulisinganyizidwe muntu ooyo uutaswiilili majwi aacizuminano eeci. 4 Majwi aayo ngindakalailila basikale banu, ciindi nindakabagwisya mu Ijipiti, kuzwa mubbibi lyeenzemuna lubulo.’ Ndakati, ‘Kamundiswiilila akucita zyoonse nzendimulailila, eelyo muyooba bantu bangu ambebo njooba Leza wanu.’ 5 Eelyo njoozuzikizya cikonkezyo eeco ncindakakonkezya kuli basikale banu cakuti nkabape nyika iikunka mukupa abuci, nyika eeyi njomukkede sunu.”
Mpawo ndakaingula kuti, “Akube boobo O Mwami Leza.”
6 Mwami Leza wakandaambila kuti, “Ambilizya majwi aaya oonse muminzi yacisi ca Juda amumigwagwa yamu Jelusalemu kuti, ‘Amuswiilile majwi aacizuminano eeci mwaatobele.’ 7 Kuzwa ciindi nindakagwisya basikale banu kuzwa mu Ijipiti kusikila sunu, ndakabacenjezya kanji-kanji kanditi, ‘Kamundiswiilila.’ 8 Pele taakwe nibakaswiilila nikuba kucenjeka matwi aabo, pele bakatobela cinguni cabubi bwamyoyo yabo. Nkaako ndabaletela zisinganyo zyoonse zyacizuminano eeco ncindakabalailila kutobela pele tiibakacibamba pe.”
9 Mpoonya Mwami Leza wakandaambila kuti, “Kuli bantu bayanda kuzanga akati kabantu ba Juda abaabo bakkala mu Jelusalemu. 10 Bapilukila kuzinyonyoono zyakali kucita basikale babo, aabo bakakaka kuswiilila majwi aangu. Batobela baleza bambi kuti babamanine milimo. Boonse baluzubo lwa Isilayeli abaluzubo lwa Juda batyola cizuminano cangu eeco ncindakapangana abasikale babo. 11 Nkaako mboobu mbwaamba Mwami Leza ulati, ‘Njoobaletela mapenzi aayo ngobatakonzyi kutija.’ Nikuba kuti bakandililaukile, nsikooyoobaswiilila.
12 “Minzi yacisi ca Juda abantu bamu Jelusalemu bayooinka kuyoolilila baleza aabo mbobatentela tununkilizyo, pele tabakabagwasyi aasyoonto mapenzi aakubasikila. 13 Mulijisi baleza banji mbubonya mbuli bubede minzi yako ocisi ca Juda, azyalo zipaizyo eezyo nzyookayaka zyakutentela tununkilizyo, kuli leza ooyo uufwisya nsoni Baali, nzinji mbubonya mbuli bubede migwagwa yamu Jelusalemu. 14 Jelemiya utabakombeli bantu aaba pe, nokuba kubalombela nokuba kubakombelezezya, nkaambo nsikooyoobaswiilila ciindi baakundiita mumapenzi aabo.”
15 Ino uuyandwa wangu ucita nzi muŋanda yangu kakuli ugamide buyo kucita milimo yakwe mibi abanji? Sena kupa nyama iisalidwe kulakonzya kulesya cisubulo cako? Ciindi nocita zibi zyako ulasekelela. 16 Mwami Leza ukwiita kuti uli muoliva weebeka, uujisi micelo iiboneka kabotu. Pele guwo pati lyaakubbubbula liyooutenta amulilo, mitabi yawo iyootyokooka.
17 Mwami Leza Singuzuzyoonse ooyo wakakusyanga, wakalailila kuti uboolelwe mapanzi, nkaambo baluzubo lwa Isilayeli abaluzubo lwa Juda bakacita zibi akundinyemya nibakatentela Baali tununkilizyo.
Mbubakakanza kujaya Jelemiya
18 Lino akaambo kakuti Mwami Leza wakandiyubunwida zyakundikanza kwabo, ndakaaziba makani aaya, nkaambo kuciindi eeco wakanditondezya eezyo nzibakali kucita. 19 Ndakali mbuli kabelele kabombede katolwa kukujaigwa, tiindakali kuyeeya kuti bakanza kundijaya kabati, “Atunyonyoone musamu amicelo yawo, atumugwisye munyika yabaumi, kutegwa zina lyakwe litakayeeyegwi limbi.”
20 Pele O Mwami Leza Singuzuzyoonse, yebo oobeteka cakululama, oosunka moyo amizeezo, undibonye kubweedezezegwa kwabubi bwabo. Nkuuli nduwe buyo nkwelipede.
21 Nkaako mboobu mbwaamba Mwami Leza kwaamba zyabantu baku Anatoti aabo bayanda kukujaya ulati, “Utasinsimi muzina lya Mwami Leza, wacita boobo swebo tulakujaya.” 22 Nkaako, Mboobu mbwaamba Mwami Leza Singuzuzyoonse ulati, “Njoobasubula. Bana babo bakubusi njoobajaya munkondo, bana babo balombe abasimbi njoobajazya nzala. 23 Taakwe mbobayoosyaalilwa pe, nkaambo njooleta mapenzi kubantu baku Anatoti mumwaka ooyo ngwendiyanda kuyoobasubula.”