Jelemiya 10
Zyamituni akukomba kwini-kwini
1 Amumvwe ncamwaambila Mwami Leza nywebo noluzubo lwa Isilayeli. 2 Mboobu mbwaamba Mwami Leza ulati,
“Mutanooiyi nzila zyabamasi pe,
nikuba kuyoosegwa azitondezyo zyamujulu, nikuba kuti bamasi zilabayoosya balo.”
3 Zilengwa zyabantu aaba nzyabuyo, bagonka cisamu musokwe, kwamana mubezi ulacibamba ambezo.
4 Cisamu eeco balacibotya nsiliva angolida balacikankamina nembe ansando, kutegwa kacitagunauki.
5 Mbubonya mbuli ciyoosyo cakukonzya mumuunda wabanamunywa,
mituni tiikonzyi kukanana pe, yeelede kubwezwa nkaambo tiikonzyi kweenda.
Mutaiyoowi, tiikonzyi kumucisa, nikuba kumucitila cintu cibotu pe.
6 Taakwe uuli mbuli nduwe O Mwami Leza, uli mupati zina lyako ndyanguzu kapati.
7 Nguni uuteelede kukulemeka, yebo O Mwami Leza wamisyobo yoonse?
Eeci ceelede nduwe olikke. Akati kabantu basongo boonse bamisyobo,
amumalelo aabo oonse, taakwe uuli mbuli nduwe pe.
8 Boonse nziyanga mbafuba-fuba, balaiisigwa aamituni yabuyo yazisamu.
9 Nsiliva yoondedwe izwa ku Taasyisyi ngolida izwa ku Ufazi.
Eeco mubezi amufuzi wangolida ncaakapanga, balacisamika masani
aacijulu-julu aacisombo, masani oonse aaya akalukwa ababelesi bacibwene kapati.
10 Pele Mwami Leza, ngo Leza wini-wini, ngu Leza uupona, Mwami uuliwo lyoonse.
Kuti wanyema nyika ilatenkaana, bamasi tabakonzyi kuyumina bukali bwakwe pe.
11 Baambile ceeci, “Baleza aaba batakalenga julu anyika, bayooloba munyika ansi aano!”
Nyimbo yakutembaula Leza
12 Pele Leza wakalenga nyika munguzu zyakwe,
wakaanza nyika mubusongo bwakwe, akulandabula julu muluzibo lwakwe.
13 Azuma, maanzi kujulu alaguuma, ulacita kuti makumbi ailimuke kuzwa kumagolelo aanyika.
Ulatuma lulabo amvula, ulagwisya luuwo kuzwa muziyobwedo zyakwe.
14 Boonse nziyanga, tabakwe luzibo, bafuzi bangolida boonse balafwa nsoni amituni yabo.
Zikozyanyo zyabo nzyabuyo, boonse balafwa nsoni amituni yabo. Zikozyanyo zyabo nzyabuyo, taziyoyi pe.
15 Nzyabuyo, nzintu zyakusabwida, aaba baakusubulwa, ziyooloba.
16 Pele ooyo uuli ncaabilo ca Jakobo tali boobo pe, nkaambo nguwakalenga zintu zyoonse,
kubikkilizya a Baisilayeli uuli musyobo walukono lwakwe, Mwami Leza Singuzuzyoonse ndezina lyakwe.
Bantu mbobayootolwa mubwaange
17 Amwaangaange zibbudu zyanu musiye cisi kamuya nywebo nomukkede mumunzi uusinkilidwe.
18 Nkaambo mboobu mbwaamba Mwami Leza ulati, “Ciindi cino ndiyanda kubaatula,
bantu aaba bali mucisi eeci. Ndabaletela mapenzi, kutegwa bajatwe.”
19 Maawe kulindiswe akaambo kazicisa! Zilonda zyesu tazisilikiki!
Nikuba boobo twakalyaambauzya twati, “Ncobeni ooku nkuciswa, pele tweelede kuliyumya-yumya.”
20 Matente eesu anyonyoonwa, matambo aazyo oonse adunsaulwa.
Bana besu balombe batusiya, tatukababoni limbi. Taakwe naba omwe wasyaala
kuti atusimpile matente pe, nikuba kutuyakila zivuka.
21 Ndakati, “Beembezi nziyanga, tababuzyi-buzyi zya Mwami Leza,
ncenciceeco ncobatazwidilili, mbelele zyabo ncozimwaikizyenye.
22 Amuswiilile kwaboola makani, kuli kunyongana kulubazu lwakunyika!
Kuyoocita kuti minzi yamucisi ca Juda ibe matongo, ibe busena bwabamwaaba.”
23 Ndizi O Mwami Leza kuti buumi bwamuntu tabuli bwakwe mwini, muntu talyeenzyi ntaamo zyakwe pe.
24 Kondilondola O Mwami Leza mubululami bwako bwalo,
kutali mukunyema kwako pe, ambweni inga waba nondinyonyweeda limwi.
25 Nyemena bamisyobo mubukali bwako, aabo batakuzi bantu bataiti zina lyako mukukomba.
Nkaambo banyonyoona Jakobo, bamunyonyweeda limwi, akujaya cisi cakwe.