Izaya 64

¹ Nicakabota noozapula julu akuselukila ansi aano, zilundu kazitenkaana kumbele lyako! ² Mbubonya mbuli mulilo mbuuvumpa tukuni, akucita kuti maanzi abile, boola ansi kuti zina lyako lizibwe kuli basinkondonyoko, kuti bamasi bazoozyangame. ³ Langa ciindi ciya nookacita zintu ziyoosya nzitwatakali kuyeeya. Wakaboola eelyo zilundu zyakatenkaana kumbele lyako. ⁴ Kuzwa kuciindi cakale-kale kunyina muntu wakamvwide, kunyina muntu wakateelela kunyina muntu wakabwene Leza uumbi kunze yako, ooyo uucitila zili boobo bamulindila. ⁵ Waboola kuzoogwasya baabo babotelwa mukucita ziluleme, aabo bayeeya nzila zyako. Pele nitwakakakatila kuzinyonyoono zyesu wakanyema. Ino mbubuti mbotunga twafutulwa? ⁶ Toonse tuli mbuli muntu uusofweede, ayalo milimo yesu njotuti ililuleme ili mbuli zisani zisofweede zinunka nsu, toonse tupepululwa mbuli tu, zibi zyesu zilatubbubbulula mbuli luuwo. ⁷ Taakwe muntu naba omwe uuita zina lyako. Walisisa, wacita kuti tulobe muzinyonyoono zyesu. ⁸ Nikuba boobo yebo O Mwami Leza ndonduwe Taata. Swebo tuli bulongo, yebo uli mubumbi, toonse nduwe wakatubumba. ⁹ Utakalalili limwi O Mwami Leza, utayeeyi zinyonyoono zyesu akutamani. Twakomba O Leza kotuceba, toonse tuli bantu bako. ¹⁰ Minzi yako iisalala yakaba nkanda, nouba Ziyoni sunu ninkanda, Jelusalemu nditongo. ¹¹ Ŋanda yako iisalala yabulemu ooko basikale besu nkubakali kukutembawida, yakatentwa amulilo. Zyoonse nzitwakali kuyobola zyoolwa. ¹² Musule azeezi zyoonse O Mwami Leza, sena unooumwide buyo? Sena unooumwide buyo kuti utusubwide limwi?