Izaya 42
Mubelesi wa Mwami Leza
1 Ngooyu mubelesi wangu ooyo ngwenkwabilila,
musale wangu ngwendiyandisya,
njoobikka Muuya wangu alinguwe, eelyo uyoobeteka bamasi.
2 Takooyooongolola nikuba kuyoba takamvwigwi jwi mumigwagwa.
3 Takooyootyola katete kacuzukide,
nikuba kuzima kamuni kayaka.
Mukusyomeka uyooleta bululami.
4 Takooyookacilwa cintu nikuba kutyompwa,
mane kusikila akakkazikizye bululami ansi.
Bamasi aali kulaale balindilila njiisyo zyakwe.
5 Mboobu mbwaamba Mwami Leza ooyo wakalenga julu akulilandabula,
wakalandabula nyika akubikka zintu zyoonse zili mulinjiyo, uupa muuya kuli baabo bakkala mulinjiyo.
6 “Mebo nde Mwami Leza ndakakwiita mubululami,
ndakujatilila janza lyako.
Ndakubamba akukucita kuti ube cizuminano cabantu, ube mumuni kuli bamasi,
7 akubonya boofu, kwaangununa baange muntolongo,
akugwisya baabo bali mudindi lyamudima.
8 “Ndime Mwami Leza, eeli ndezina lyangu!
Tandipi bulemu bwangu kuluumbi nikuba kutembaulwa kwangu kumituni.
9 Amubone zintu zyakaambidwe
kale-kale zyacitika, lino ndaambilizya zintu zipya,
kazitanacitika ndazyaambilizya kulindinywe.”
Lwiimbo lwakutembaula Mwami Leza
10 Amwiimbile Mwami Leza lwiimbo lupya,
amumutembaule kuzwa kumagolelo aanyika,
lwizi aluvuume, azyoonse zili muli ndulo,
manyika aakunkomwe yalwizi aavuume.
11 Nkanda aminzi yayo ayoongolole,
ayalo minzi oomo mwakkala Keda aisekelele.
Bantu bakkala mu Sela abaimbe calutangalo,
aboongolole atala aazilundu.
12 Abalumbaizye Mwami Leza
alimwi baambilizye zyakutembaulwa kwakwe mumasi aali kulaale.
13 Mwami Leza uyooenda mbuli mwaalumi sintanze,
mbuli silumamba uyootondezya busungu bwakwe,
uyoopozomoka kutondezya kuti nkondo yabuka,
nkabela uyoozunda basinkondonyina.
Leza mbwaakasyomezya kugwasya bantu bakwe
14 “Ndaluumwide kwaciindi cilamfu,
ndaluumwide akulijata ndemwini.
Pele lino mbuli mukaintu uuyanda kutumbuka ndanyenyembana ndafwekemba.
15 Ndiyoomwayaula zilundu atulundu,
zisyango zyoonse njoozipusamya,
njoocita milonga kuti ibe nsumbu, akuyuminizya maziba.
16 “Ndiyoosolweda boofu munzila njobatazi,
ndiyoobainzya munzila njobatanaindide,
njoocita mudima ukabe mumuni kumbele lyabo,
akuyoobambasika masena amaguguunya.
Eezi nzezintu nzendiyoocita, nsikooyoobalekezya pe.
17 Pele aabo basyoma mumituni, aabo bati kuzikozyanyo,
‘Ndinywe baleza besu,’ bayoousigwa nsoni mpati.”
Baisilayeli mbubakakacilwa kwiiya
18 Mwami Leza ulati, “Amuswiilile nywebo nobantu basinkematwi,
amulange noboofu mubone.
19 Ani moofu nguni kuleka mubelesi wangu?
Awalo musinkematwi nguni kuleka mutumwa wangu?
Nguni moofu kuleka similimo wangu,
woofweede mbuli mubelesi wa Mwami Leza?
20 Mwakabona zintu zinji,
nikuba boobo tamuswiilili,
matwi aanu alisinkukide, pele tamumvwi.”
21 Cakamubotezya Mwami Leza akaambo kabululami bwakwe
kuti mulawo wakwe ulemekwe utembaulike.
22 Pele aaba mbantu basaalidwe banyangidwe lubono lwabo,
boonse bacegwa mumalindi, balisisidwe muntolongo.
Basaalwa, taakwe uukonzya kubafutula banyangwa lubono lwabo,
pele taakwe amuntu waamba kuti, “Amubapilusye.”
23 Nguni akati kanu uukonzya kuswiilila zeezi
nokuba kuyoocenjeka matwi ciindi ciboola?
24 Nguni waaba Jakobo kuti anyangwe lubono lwakwe,
waaba Isilayeli kuli basikusaala?
Sena tali Mwami Leza ooyo ngotwakabisizya?
Nkaambo Baisilayeli tiibali kutobela nzila zyakwe,
tiibakaswiilila mulawo wakwe.
25 Nkaako ono wakabanyemena mubukali bwakwe bupati,
wakabaletela nkondo nkali.
Mabanga-banga ankondo akabavumpa,
pele tiibakamvwa pe, akabasyukuta,
nikuba boobo bacili bazili kooko.