Izaya 41
Leza mbwaakasyomezya Baisilayeli
1 Amuumune mundiswiilile nywebo nonsumbu.
Bamasi bakubulusye nguzu zyabo!
Ababoole kumbele, baambe, atuswaangane kunkuta.
2 Nguni ooyo wakakolonganya mulwani wakujwe,
wakacita kuti kaya buzunda kufumbwa ooko nkwaaya?
Ulaaba masi kulinguwe, akuzunda bamami kumbele lyakwe.
Panga lyakwe lilabalundumuna mbuli kuti ndusuko,
balalapuka mbuli bungu kumbele lyabuta bwakwe.
3 Ulabatandaanya akwiinda kabotu-kabotu munzila eeyo njazibide.
4 Nguni wakacita ceeci?
Nguni wakakanzide kucita boobu kuzwa kumatalikilo aamazyalani?
Ndime, mebo nde Mwami Leza, ndime mutaanzi,
akumamanino njooba mbubonya oobo, “Ndime.”
5 Bamunsumbu bakalibonena nkaako bakayoowa,
bakumagolelo aanyika balakankama.
6 Baswena afwiifwi baza kumbele,
balagwasyanya umwi aumwi ulati kumweenzinyina, “Koyuma!”
7 Mubezi uyumya-yumya mufuzi wangolida,
ooyo uuondoonda ansando wagwasya yooyo woondela acifulilo.
Waamba ceeco cifulwa kuti, “Ncibotu.”
Ulakankamina mutuni ooyo kuti utawi.
8 “Pele yebo O Isilayeli omutwanga wangu,
yebo Jakobo ngundakasala,
nywebo nolunyungu lwa Abulahamu mweenzuma,
9 ndakamugwisya kuzwa kumagolelo aanyika,
ndakamwiita kuzwa kuzyooko zyanyika.
Ndakati, Nywebo muli batwanga bangu,
ndakamusala, tiindakamukaka pe.
10 Mutayoowi, nkaambo ndili aandinywe.
Mutatyompwi kayi ndime Leza wanu.
Ndiyoomuyumya-yumya, akumugwasya,
ndiyoomujatilila ajanza lyangu lyalulyo liluleme.
11 “Boonse bamulwana bayoofwa nsoni, bayoousigwa.
Basinkondonyoko bayooba cintu buyo, bayooloba.
12 Nokuba kuti mukayandaule basinkondo tamukooyoobabona pe. Aabo bamulwana bayooba bantu buyo.
13 Mebo nde Mwami Leza wanu ndime eejisi maanza aanu aalulyo.
Ndime ndimwaambila kuti, ‘Mutayoowi pe, ndilamugwasya.’”
14 “Utayoowi yebo Jakobo ooli mbuli mvunyu,
yebo Isilayeli omusyoonto,
nkaambo mebo lwangu ndime eeyoomugwasya,
mbwaamba Mwami Leza,
Munununi wanu Uusalala wa Isilayeli.
15 Amubone, ndiyoomucita mbuli cilayi cakupolela maila cinooli cipya,
cibosya alimwi cijisi ntakisyo zinji.
Muyoopola zilundu akupwayaula tulundu tukabe mbuli bungu.
16 Uyootupepulula nkabela luuwo luyootutola, guwo liyootukukula.
Pele nywebo muyootangala akubotelwa mu Mwami Leza,
muyootembaula Uusalala wa Isilayeli.
17 “Bacete ababulide balayandaula maanzi pele baajane kuli,
milaka yabo yayuma nta anyota.
Pele mebo nde Mwami Leza ndiyoobacebuka,
mebo nde Leza wa Isilayeli nsikabalekelezyi.
18 Ndiyoocita kuti maanzi akakunke muzimpayuma,
mumakkuti muyooba tusensa.
Ndiyoocita nkanda kuti ikabe maziba aamaanzi, cimpayuma ciyooba tusensa.
19 Munkanda njoobikka milombe amikamba, misikili amioliva.
Njoobikka mipulanga mugundu, misiwe amikumbuzu antoomwe.
20 Bantu bayooyeeya kumvwisya kuti Mwami Leza nguwacita boobo, Uusalala wa Isilayeli nguwakacibamba eeci.”
Mwami Leza mbwakazya baleza bakubeja
21 Mboobu mbwaamba Mwami Leza ulati, “Amulyaambilile,
amupe bumboni nobaleza bamasi, mbwaamba Mwami wa Jakobo.
22 Amuboole muzootwaambile ziyoocitika kumbele.
Alimwi amutwaambile naa zintu zyakaindi zyakali buti,
kutegwa tuziyeeye tuzibisye mbuzyakabede.
23 Naa mutwaambile ziyoocitika kumazuba aaza kumbele.
Amutwaambile naa kuyooba buti kumazuba aaboola,
kutegwa tuzibe kuti muli baleza ncobeni.
Amucite cintu cimwi cibotu naa cibi kutegwa twacibona tuyoowe tukankame.
24 Pele nywebo taakwe ancomucita citegwa mmilimo yanu mibyaabi.
Ooyo uumutobela ulasesemya.
25 “Ndakatalika muntu uuzwa kunyika nkabela ulaboola,
ooyo uuzwida kuzwida zuba,
ulalyatauka mbuli mubumbi nakanda bulongo.
26 Nguni wakalungulwide makani aaya kumatalikilo kutegwa tuzibe?
Naa kuli umwi wakaambide kutegwa tumwaambe kuti,
‘Wakaliluzi?’ Taakwe wakaalungulula, taakwe wakaambide kale,
taakwe wakamvwide kale makani aaya kuzwa kulindinywe.
27 Ndime ndakasaanguna kwaambila Ziyoni kuti,
‘Amubone, ngaaya makani mabotu!’
Ndime ndakatuma mutumwa ku Jelusalemu kuti atole makani aaya.
28 Ndalanga-langa pele taakwe amuntu,
taakwe naba omwe wiingula nendibabuzya.
29 Amubone, boonse balabeja! Milimo yabo njabuyo,
mituni yabo ili mbuli luwo, niibanyonganya.”