Izaya 4
1 Bwaakusika buzuba oobo, bakaintu bali ciloba bayoovumpa mwaalumi omwe akumwaambila kuti, “Swebo tunoolilisya akulisamika tobeni, pele tukumbila kuti utukwate tuzwe mumause aabutema.”
Mbobuyooboozegwa bulemu bwa Jelusalemu
2 Ciyoosika ciindi aawo Mwami Leza natikacite kuti cisyuukila cakwe cikomene akubota. Nkabela boonse ba Isilayeli batikasyaale mbaumi bayoolisumpula akujana kubotelwa mumicelo yanyika eeyo. 3 Bantu woonse batikasyaale mu Ziyoni, mu Jelusalemu bayootegwa mbantu basalala. 4 Mwami Leza aakumana kusanzya busofwaazi bwabakaintu Bamuziyoni, uyoosanzya munzi wa Jelusalemu kuzwa kubulowa amuuya walubeta, muuya wamulilo. 5 Lino Mwami Leza uyootuma kkumbi muciindi casikati kuti likavumbe cilundu ca Ziyoni abantu boonse bali mulincico, nkabela masiku uyootuma busi alimwi amabanga-banga aamulilo. Bulemu bwa Leza buyoovumbilila akuukwabilila munzi ooyo oonse. 6 Bulemu bwakwe buyooba ncecimvule cawo sikati, akucita kuti bube busena bwakuliiba, busitilidwe kuzwa kumvula akuguwo pati.