Izaya 5
Lwiimbo lwaamba zyamuunda wamisaansa
1 Ndiyanda kwiimbila yooyo ngwendiyanda,
lwiimbo lwaamba zyamuunda wakwe wamisaansa.
Muyandwi wangu wakajisi muunda
wakali kunselelo lyakalundu kakajisi mbolezi.
2 Wakalima kabotu akugwisya mabwe oonse mulinguwo,
wakasyanga misaansa mibotu kwiindilila.
Amane wakayaka ŋanda ndamfu yakusompelela
akusya cilindi cakusinina nsaansa.
Wakasyomede kuti uyooba aabutebuzi bubotu,
pele kwakajanika kuti zyoonse zyakali mbi.
3 Lino mboobu mbwaamba mweenzuma ulati, “Nywebo nobantu bakkala mu Jelusalemu mucisi ca Juda, amuvuntauzye makani aaya akati kandime amuunda wangu wamisaansa. 4 Ino ncinzi cimbi ncindakeelede kucita kumuunda ooyu kwiinda ceeci ncindakacita kale? Ndasyomede kuti ndizoojana butebuzi bubotu ino nkaambo nzi nuwakazyala mbi zyalo?
5 “Lino eemwaambile kuti nceeci nceyoocita kumuunda wangu ooyu, ndamwaya lukwakwa lwawo eelyo uyoonyonyoonwa, ndamwayaula bwaanda eelyo uyoolyataulwa. 6 Ndiyooulekelela mubwizu nsikuukwezawidi nikuba kuulimina. Zisonso amamvwa ziyookomena oomo. Njoolailila makumbi kuti atakawisyi mvula mulinguwo.”
7 Muunda wamisaansa wa Mwami Leza Singuzuzyoonse,
Mbaisilayeli, bantu baku Juda njemisaansa njaakasyanga.
Wakali kulangila kuti bantu kabacita ziluzi.
Wakabona kutilwa kwabulowa, kalangila ziluleme.
Wakamvwa kulilauka kwabantu.
Busofwaazi mbobacita bantu
8 Maawe kulindinywe nomuyaka camaanda akuba aamyuunda, cakuti taacikwe abusena busyeede, muyanda kuti kamukkala nyolikke mucisi.
9 Mwami Leza Singuzuzyoonse waambilizya kandimvwide kuti, “Kasimpe maanda mapati oonse ayooba tongo, maanda mabotu ayoosyaala buyo! 10 Muunda wamisaansa uulimwa zipani zili kkumi uyoogwisigwa nsaansa zizuzya talo lyomwe lyawaini, masaka one aambuto ayoozuzya buyo ntumba yomwe yamaila.”
11 Maawe kuli baabo bafuma kubuka kabucili kooko, kuti bayandaule zyakunywa tabaleki kunywa mane bwiingatile mane kusikila bakolwe. 12 Mumapobwe aabo balizya tuntimbwa atulumbu, nsakalala amitetele kabanywa waini. Pele tabakonzyi kumvwa zicita Mwami Leza pe, tabakwe makani anzyabacitila. 13 Nkaako bantu bangu bayootolwa mubuzike akaambo kakubula maanu, basololi babo bayoofwa akaambo kanzala, abalo bantu babo bayoofwa anyota. 14 Cuumbwe cilibanyomenede, cilikwazamukide kapati balemekwa abantu babo mbabatikawide mumo kubikkilizya aboonse basinzwanga abasimatusi. 15 Bantu buyo abalupati-pati boonse bayoobombezegwa, balisumpula bayooletwa aansi. 16 Pele Mwami Leza Singuzuzyoonse uyoolumbaizigwa mubululami bwakwe, Leza uusalala uyoolitondezya kuti ulilondokede. 17 Mbelele ziyoocela mbuli mumacelelo aazyo, tubelele tuyoocelela mumatongo aabavubi.
18 Maawe kuli baabo bacita zibi, bacenga, basobanya bubi mbuli bakwela ŋola.
19 Maawe kuli baabo baamba kuti, “Leza kafwambaana kucita eeco ncati ulacicita, kutegwa tucibone we. Aciboole eeco ncakanza Uusalala wa Isilayeli kuti tuzibe!”
20 Maawe kuli baabo baamba kuti cibi ncibotu, pele cibotu ncibi, basandula mudima kuba mumuni, basandula mumuni kuba mudima, baamba kuti zintu zilula nzezilweela, pele zilweela zilalula.
21 Maawe kulibaabo balibona kuti mbasongo bacenjede kapati.
22 Maawe kulizeezyo zidakwa zya waini, mbalombwana mukuvwela-vwela zyakunywa. 23 Baleka balaamilandu mukuti batambule masinkamulomo pele balavundikizya twaambo twabatakwe milandu. 24 Mbuli mulilo mbuuumpila lyo tusunta twabwizu, ambuli bwizu buyumu mbobupya mumulilo, mbubonya oobo miyanda yabo iyoobolela limwi. Maluba-luba aabo ayoopepuluka mbuli kasuko, nkaambo bakaka mulawo wa Mwami Leza Singuzuzyoonse akusampaula majwi aa Uusalala wa Isilayeli. 25 Nkaako Mwami Leza wanyemena bantu bakwe, wabavungila ntuku wabauma. Zilundu zyazungaana, milwi-milwi yamitumba ili mbuli mafwisyila mumigwagwa. Nikuba boobo bukali bwakwe tabunamana, janza lyakwe licivuumukide. 26 Mwami Leza waita misyobo iimbi yakulaale, wabasibila mulosi aabo bazwa kumagolelo aanyika. Mbaabo baboola cakufwambaana baligubide. 27 Taakwe aomwe wabo uukatala, nikuba kulifumpula, tabaguni nikuba koona, ntambo zyamuzibuno zyabo tazitebeli, atwalo twaanzyo twandyasyo zyabo tatukosoki pe. 28 Mivwi yabo ilabosya, mata aabo alibambilidwe kale, nsumba zyamabbiza aabo nziyumu mbuli bbwe, nkalaki zyabo zizinguluka mbuli kambizi. 29 Basinkondonyina batimba mbuli basyuumbwa mbuli bana babasyuumbwa batimba, balavuluma nobajata munyama balamukwelaanya, taakwe uukonzya kubanyanga pe. 30 Buzuba oobo bazoovumpa mbuli buvuuma lwizi. Ooyo uutikalange nyika eeyi uyoobona buyo mudima amapenzi, nuuba mumuni uyoobaya akaambo kamakumbi.