Izaya 33

Kukomba kwakulomba lugwasyo

¹ Maawe kulinduwe osikunyonyoona, yebo ootananyonyoonwa. Maawe kulinduwe osikwaaba, pele yebo tonaabidwe! Waakuleka kunyonyoona, uyoonyonyoonwa, waakuleka kwaaba uyooabwa! ² Kotubeda aaluse O Mwami Leza, nduwe ngotusukeme. Kotupa nguzu cifumo-fumo cili coonse, kotufutula ciindi notuli mumapenzi. ³ Ciindi nozuma ajwi lyako bantu balatija, nonyamuka, misyobo yabantu ilamwaikizyanya. ⁴ Balabunganya zisaalo mbuli bacamusokonya mbobabunganya, mbubonya mbuli cikwikwi mbocisotooka, abalo bantu mbobazivwampila. ⁵ Mwami Leza ulalumbaizigwa, bulelo bwakwe buli koonse-koonse nguubeteka mu Ziyoni cabuluzi. ⁶ Uyooba nentalisyo njumu kwaciindi coonse, bantu bakwe nguubapa busongo aluzibo, kulemeka Mwami Leza nciyobwedo cakwe. ⁷ Amubone baalumi basicamba baloompolola cakulila kuti bagwasigwe, basiluumuno balalila kapati. ⁸ Migwagwa yoonse baisiya, taakwe basilweendo baceenda mulinjiyo. Cipangano cabo bacityola, bakamboni baco basampaulwa, taakwe uucilemekwa pe. ⁹ Bantu bamunyika balalila, bamana, Lebanoni yausa, yagunwa, Syaloni yaba mbuli Alaba nkanda. Cisi ca Basyani acilundu ca Kaameli zyakunkumuka.

Mwami Leza mbwaabacenjezya basinkondonyina

¹⁰ Mwami Leza wakati, “Lino ndilaima, lino ndilalumbaizigwa, lino ndilamutondezya nguzu zyangu. ¹¹ Nzyomuyeeya azyoonse nzyomucita nzyabuyo. Muuya wangu uli mbuli mulilo uusyukuta. ¹² Bantu bayoopya kusikila bakabe mbuli malambo bayootentwa mbuli ziteyo zyamamvwa mbozitentwa.” ¹³ Nywebo nomuli kulaale amumvwe ncindacita kuno, nywebo nomuli afwiifwi amusyome kuti ndaanguzu. ¹⁴ Basizibi mu Ziyoni baliyoowede, balakankama aabo batalemeki Leza. “Nguni akati kesu uukonzya kukkala amulilo uusyukuta? Nguni akati kesu uukonzya kukkala amulilo uuyaka lyoonse?” ¹⁵ Ngooyo weenda cakululama akucita zilondokede, ooyo uukaka mpindu iizwida mukulida bantu, uutayandi kutambula masinkamulomo, ooyo uutavwelani abaabo bakanza kujaya bantu, uutayandi kubona bubi ameso aakwe pe. ¹⁶ Ngomuntu ooyo uuyookkala mujulu, uuli aacitijilo ciyumu mbuli cilundu. Unooyoopegwa zyakulya, maanzi taakamumanini pe.

Mazuba aaboola

¹⁷ Muyoobona mwami mubulemu bwakwe alimwi muyoobona nyika iibambasede kulaale. ¹⁸ Muyootungumana akuyeeya ziyoosya eezyo nzimwakabona muyooti, “Ino uli kuli silutwe uulya? Ino uli kuli uulya wakali kutezya? Ino uli kuli mupati wamaanda aakusompelela?” ¹⁹ Bantu basikantu-kantu tamukababoni limbi, aabo bali aamwaambo muyumu, baamba cisyobo cimbi-cimbi ncomutakonzyi kumvwa. ²⁰ Amulange ku Ziyoni munzi motulida mapobwe. Nyoonse mulabona munzi wa Jelusalemu uuli aabukkalo bubotu. Muli nguwo muli tente litakooyoogwisigwa, nembe zyalyo tazikoojugwa, niiba ntambo yakupimya tiikakosoki. ²¹ Ooko Mwami Leza wesu mubulemu bwakwe uyootugwasya. Buyooba busena buli mbuli milonga iikwakwabukide atulonga. Ooko mato mapati amaniini taakaindi. ²² Mwami Leza wesu mmubetesi, Mwami Leza wesu nguutulailila, Mwami Leza ngo Mwami wesu, ngonguwe uuyootuvuna. ²³ Ntambo zyamato aabasinkondoma zyatebunuka, musemo wabwato tuuciimvwi, tabakakonzyi kukwapamika masani aakubweenzya. Nkabela nzibasaala zinji ziyooabanwa, abalo balemu bayoobweza zimwi. ²⁴ Taakwe naba omwe uukkala mu Ziyoni uuyooti, “Ndaciswa.” Zinyonyoono zyabaabo bakkala kooko ziyoolekelelwa.