Izaya 13

Leza mbwatikasubule munzi wa Babuloni

¹ Ngaaya makani Izaya, mwana wa Amozi ngaamba azya Babuloni.

² Akalundu kabalangala simpa ndembela, baite,

boobole kuti bazoonjile mumilyango yabalemenede.

³ Ndalailila basalali bangu,

ndaita basilumamba bangu,

kuti bazoocite ncindabasungula mubukali bwangu

kuti basubule baabo mbendinyemenede.

⁴ Amuswiilile kuli kuyobeka atala aazilundu kuli mbuli kwamakamu-makamu aabantu! Amuswiilile kuli lupyopyongano akati kamalelo, ooku kuli mbuli kuyobeka kwabantu bazisi zinji babungana. Mwami Leza Singuzuzyoonse nguusolweda basilumamba bakwe baya kunkondo. ⁵ Bazwida kumasi aakulaale, bazwida kumagolelo aanyika. Mubukali bwakwe Mwami Leza waboola kuzoonyonyoona cisi coonse.

⁶ Amulile nkaambo buzuba bwa Mwami Leza buli aafwiifwi, buzuba oobo Singuzuzyoonse mbwayooleta lunyonyooko lupati. ⁷ Akaambo kaceeci bantu boonse bayoolebukilwa bantu boonse liyoobaleka. ⁸ Boonse bayooyoowa, macise akupenga mumoyo ziyoobajata. Bayoominingana mbuli mukaintu uuyanda kutumbuka. Bayoolangana cakugambwa, bayoosyulungana kumeso. ⁹ Amubone, buzuba bwa Mwami Leza bulasika, mbuzuba bwaluciso, mbuzuba bwabukali, nkabela basizibi boonse bayoonyonyoonwa. Nyika iyoosyaala buyo. ¹⁰ Nyenyezi zyoonse abandakutema ziyooleka kumweka. Alyalo zuba liyoobaya mwezi taukabali pe. ¹¹ “Ndiyoosubula bamunyika akaambo kabubi bwabo, basizinyonyoono boonse akaambo kazibi zyabo. Ndiyoosubula boonse balisumpula, aabo basilunya balipa kantu-kantu ndiyoobatola ansi. ¹² Lino aabo batikasyaale banooli bace kwiinda ngolida iini-ini, banooli bace kwiinda ngolida yaku Ofii. ¹³ Nkaako ndiyoozungaanya julu, ayalo nyika iyoozungaanyizigwa acikkalilo cayo mubuzuba oobo mebo, nde Mwami Leza Singuzuzyoonse, nenjootondezya bukali bwangu buumpa.

¹⁴ “Mbuli nakasya uuvwimwa, mbuli mbelele zinyina mweembezi, umwi aumwi uyoopilukila kubantu bokwabo. Umwi aumwi uyoolobelela kunyika yokwabo. ¹⁵ Kufumbwa uuyoojatwa uyoobbwabulwa, boonse bayoojatwa bayoojaigwa apanga. ¹⁶ Bana babo bavwanda bayoopwayaulwa mutubeela-beela kabalangilide, maanda aabo ayoosaalwa, bakaintu babo bayoojatwa.”

¹⁷ Ndiyoobaletela Bamedi kuti, “Bazoobalwane, bantu batatumpukwi ansiliva, batazwi moyo angolida. ¹⁸ Mivwi ya Bamedi iyoojaya bakubusi, batakeengeleli abana nobaba bavwanda, taakwe mwana naba omwe ngobayooetelela pe. ¹⁹ Babuloni mmbulelo bwiinda malelonyina kubota, pele kulisumpula kwabulemu bwa Bakalodiya mebo nde Leza njoobumwaya mbuli mbondakacita ku Sodomu a Gomola. ²⁰ Taakwe muntu uuyookkala mumo alimwi pe, kwamazyalani oonse taakwe Mualamu uyoosimpa tente lyakwe oomo pe. Taakwe mweembezi uyoobutya butanga bwakwe ooko pe. ²¹ Pele buyooba buyo busena bwabanyama bamunkanda, bamwaaba mbabayoonjila mumaanda aabo, batumba mbabanookkala oomo. Njeleele nzezinoobbwantauka mumatongo aabo. ²² Basuntwe banoolila mumaanda aabo mapati, bamwaaba mbabanookkala mumaanda aabwami. Ciindi cakunyonyoonwa kwa Babuloni casika, mazuba aayo taacili kule pe.”