Izaya 12
Lwiimbo lwakulumba
1 Mubuzuba oobu muyooti, “Ndakutembaula O Mwami Leza!
Nikuba kuti wakalindinyemenede,
lino waleka kundinyemena, nduumbulizya.
2 “Kasimpe Leza ngomufutuli wangu, ndiyoomusyoma,
nsikamuyoowi pe. Mwami Leza nguundipa nguzu,
ngonguwe ngwentembaula munyimbo, ngomufutuli wangu.”
3 Mbuli maanzi aatontola mbwaatangazya uufwide nyota,
mbubonya oobo bantu ba Leza balatangala ciindi nobafutulwa.
4 Mubuzuba oobu muyooti, “Amulumbe Mwami Leza,
amwiite zina lyakwe kuti amugwasye!
Amwaambile masi oonse zintu nzyaakacita,
amwaambilizye kuti zina lyakwe lyeelede kulumbaizigwa.
5 “Amumwiimbile Mwami Leza,
akaambo kazintu ziletela bulemu nzyaakacita.
6 Amupozomoke, mwiimbe cakutangala nywebo nobantu bamu Ziyoni.
Nkaambo Uusalala wa Isilayeli uli akati kanu.”