Izaya 11
Bulelo bwaluumuno
1 Kuya kusyuuka mutabi kuzwa kucisiko ca Jese,
kuzwa kumiyanda yakwe mutabi uyoozyala micelo.
2 Muuya wa Mwami Leza uyookkala alinguwe,
alimwi uyoomupa busongo akumvwisya zintu.
Muuya wakulaya anguzu, nguuyoomupa luzibo akulemeka Mwami Leza.
3 Uuyookkomanina kulemeka Mwami Leza.
Takabeteki kwiindila mukulanga mbobabede bantu,
nikuba kukosola kaambo kwiindila muli nzyamvwa.
4 Pele uyoobeteka kaambo kamucete mbuli bweelede.
Uyoobeteka cabululami kaambo kali koonse kamucete ansi aano.
Uyoouma bapenzya amajwi aakwe aalo, bantu babi uyoobajaya.
5 Uyoolela bantu bakwe mubululami cakusyomeka.
6 Baumpe atubelele bayookkala antoomwe,
abalo basiluwe bayoobuta antoomwe ampongo.
Boombe bayoocelela aamwi abana babasyuumbwa,
boonse bayooembelwa akana kaniini.
7 Ŋombe ziyoocela mubutanga bomwe abanyama babutambo,
bana babanyama aaba bayoolala antoomwe, abaŋombe muluumuno.
Basyuumbwa bayoolya bwizu mbuli ŋombe.
8 Muvwanda uyookonzya kusobanina abwina bwanzoka,
awalo mwana uyookonzya kunjizya janza lyakwe mubwina bwacipile katalumwi.
9 Ali Ziyoni, cilundu cisalala ca Leza,
takukooyooba cintu cikonzya kucisa muntu pe,
nociba cintu cibi tacikabi mpawo pe.
Bantu boonse bamunyika bayoozula luzibo lwa Mwami Leza
mbubonya mbuli lwizi mboluzwide maanzi.
Kuboola kwabantu bakatoledwe mubuzike
10 Mubuzuba oobo, mwami ooyo walunyungu lwa Jese uyooba mbuli citondezyo cabulelo kumisyobo yoonse. Misyobo iyoomuyobolokela, nkabela busena bwakwe bwakukkala bunooli bwabulemu. 11 Mubuzuba oobo, munguzu zyakwe Mwami Leza uyoobayobolola alimwi bantu bakwe akubaboozya kucisi cakwe aabo bakasyeede mu Asiliya, Ijipiti, Patilosio Kusyi, Elamu, Babuloni, Hamati amunsumbu zimwi zyalwizi.
12 Mwami uyooimika citondezyo cabulelo bwakwe kutegwa atondezye masi oonse kuti lino wayobolola bantu bakwe ba Isilayeli a Juda aabo bakamwaikide. Ulababoozya kuzwa muzyooko zyone zyanyika. 13 Bulelo bwa Isilayeli tabukanyonokeli bwa Juda pe, awalo Juda takabi sinkondonyina Isilayeli pe. 14 Pele bayoomvwana antoomwe akulwana Bafilisiti bali kumbo lyabo akusaala bantu bakujwe lyabo. Bayoozunda Baedomu a Bamowabu. Baamoni bayoolibombya kulimbabo. 15 Mwami Leza uyooyuminizya lwizi lwa Baijipiti, uyooungya luuwo lupya kuti lukayuminizye mulonga wa Yufuletisi. Uyoowaandaanya kuti uzwe tulonga tuli ciloba, kuti bantu kabayookonzya kutuzubuka. 16 Kuyooba mugwagwa mupati uuzwida mucisi ca Asiliya, uyooba wabantu bakwe Baisilayeli bakasyeede, uyooba mbubonya mbuli ooyo wakaliwo ciindi basikale babo nibakazwa mucisi ca Ijipiti.