Intembauzyo 83
Lwiimbo lwa Asafu
1 O Leza utaumuni buyo, utalyuumuzyi buyo, O Leza utalibatamiki.
2 Bona mbobapyopyonganya basinkondonyoko, aabo bakulwana mbobasongomeka mitwe.
3 Bakanza bantu bako mubucenjezu bwabo, bavwiya bantu mboyandisisya.
4 Balati, “Amuboole tubanyonyoone cisi coonse, zina lya Isilayeli litakayeeyegwi limbi pe.”
5 Balalivwiya camoyo omwe, bapanga bulongwe kuti bakulwane.
6 Bapangana balunyungu lwa Edomu, Baisyimayeli, Bamowabu, balunyungu lwa Haga.
7 Bapangana balunyungu lwa Gebali, Amoni, Ameleki, Filisiti abantu baku Taya.
8 Abalo Baasiliya basangana ambabo, kuti bayumye balunyungu lwa Loti.
9 Bacite mbookacita Bamidi,
mbookacita Sisela a Jabini kumulonga wa Kisyoni.
10 Ku Endo wakabalobya, baba mbuli bufumba ansi.
11 Balemenede babo bacite mbuli Olebu a Ziibu.
Bami babo boonse babe mbuli Zeba a Zalumuna,
12 aabo bakati, “Atutole macelelo, macelelo aa Leza abeesu.”
13 O Leza wangu, bacite mbuli lusuko lwakambizi,
mbuli bungu bupupululwa aluuwo.
14 Batande mbuli mulilo mbuusyukutya cisaka, batande mbuli kumyala
kwamulilo uuumpa zilundu.
15 Ubatande mbubo oobo aguwo lyako, ubayoosye abbubbula lyako.
16 Ubausye nsoni kuti bantu babone, babone nguzu zyako, O Mwami Leza.
17 Abausigwe nsoni bagambwe, balobe kabafwide bweeme.
18 Cita kuti bazibe kuti yebo nduwe Mwami Leza,
nyika mbwiizulwa yebo ndonduwe Sijulu wamajulu.