Intembauzyo 81
Kumweendelezi wanyimbo. Aimbye bwiimbwa nyimbo ya Giti. Lwiimbo lwa Asafu.
1 Amwiimbe cakutangala kuli Leza uuli nenguzu zyesu,
amupozomoke kuli Leza wa Jakobo.
2 Amwaangule lwiimbo mulizye nsakalala, amuume kandendeme kantimbwa akalumbu.
3 Likkala mwezi musibe mweembo walwija lwamugutu, musibe anuuzyuka, mubuzuba bwapobwe lyesu.
4 Kayi ooyo ngomulawo wamu Isilayeli, ngamalailile aa Leza wa Jakobo.
5 wakabikka Josefa kuti cibe citondezyo, ciindi naakalwana Baijipiti.
Ndakamvwa jwi ndindatakaziba kaliti,
6 “Ndime ndakagwisya mulilo amakuko aako, ndime ndakakutula mukuli wazitina.”
7 Nookali mumapenzi wakandililila, ndakakuvuna,
ndakakuvuna amuzumo mukkumbi, ndakakusunka kumaanzi aaku Meliba.
8 Nobantu bangu amuswiilile, mmusinse, nywebo noba Isilayeli amuswiilisisye.
9 Mutabi aaleza uumbi akati kanu, mutakombi leza wabamasi.
10 Ndime Mwami Leza wanu, Leza wakamugwisya Muijipiti. Amulakame mmusanine.
11 Pele bantu bangu tiibakaswiilila pe, Baisilayeli tiibakalibombya kulindime.
12 Nkaako ndakabaleka kuti bacite buyanda myoyo yabo iikakide,
batobele nzyobayeeya mumyoyo yabo.
13 Kuti bantu bangu nibakaswiilila, Baisilayeli nibakatobela nzila zyangu,
14 nindakabazundila basinkondonyina, nindakakoma babalwana.
15 Aabo basulaika Mwami Leza bayoolisukata, bayoolisukata cakuyoowa.
16 Baisilayeli nindabalela akubapa maila mabotu,
nindabakkutya abuci buzwa mundomba.