Intembauzyo 62
Kumweendelezi wanyimbo zya Jedutuni. Lwiimbo lwa Devedi
1 Muli Leza alikke muulyookezezya moyo wangu, luzwa kulinguwe lufutuko lwangu.
2 Ngomwaala alufutuko lwangu walo alikke, taakwe neyoozungaanyizigwa
nkaambo walo ncecikwabilizyo cangu.
3 Ino mulaleka lili kupwaya, kuuma muntu?
Ooyo uuli mbuli lubaya lutajisilizi, uuli mbuli bwaanda butenkaana.
4 Kumwaatula mubulemu bwakwe nkobakanza, muli zyakubeja mobabotelwa,
balaleleka amilomo yabo, mumoyo kabasinganya.
5 Muli Leza alikke muukonzya kulyookezya moyo wangu, lulangilo lwangu luli mulinguwe.
6 Lufutuko a mwaala wangu nguwe alikke, nsikazungaanyizigwi pe,
mukuti ngocikwabilizyo cangu.
7 Bulemu bwangu alufutuko zizwa kuli nguwe, ngamatijilo aangu, ngomwaala wangu.
8 Nywebo nobantu amumusyome muziindi zyoonse,
amubikke myoyo yanu kuli nguwe, kayi Leza ngamatijilo eesu.
9 Bantu balya maila mbabuyo, bantu balemu mbakubeja,
kuti beelekwa aantoomwe mbauba, mbauba kwiinda muuya wayoyegwa.
10 Mutanooyeeyi kuti kunonga kulagwasya,
nikuba kulisumpwida zintu zyakubba.
Nikuba kuti lubono lwavula, mutabikki myoyo yanu kulindulo.
11 Kuli cintu comwe Leza ncaakaamba, mebo ndaiya zyobilo, eezi nzyakuti,
yebo, O Leza, ulisinguzu.
12 Acakuti, yebo, O Mwami ulaaluyando lutazungaani.
Kwaamba masimpe muntu uuli woonse uyoomulumbula,
uyoomulumbula kweendelana aceeco ncaakacita.