Intembauzyo 61
Kumweendelezi wanyimbo. Lwiimbo lwa Devedi. Aimbye bwiimbwa nyimbo zyatungwali-ngwali.
1 O Leza, komvwa kulila kwangu, swiilila kukomba kwangu.
2 Kuzwa kumagolelo aanyika ndakwiita,
ciindi moyo kuuwizukide ndakwiita, nditole kundomba lindiinda kulampa.
3 Mayubilo aangu nduwe, nduwe ŋanda ndamfu njumu mwekonzya kuyuba uundilwana.
4 Iinkale mutente lyako lyoonse, iintijile mucimvule camababa aako.
5 Okazimvwa eezyo zindakakonkezya, yebo, O Leza,
wandipa lukono lwabaabo bayoowa zina lyako.
6 Moongozye mwami mubuumi bwakwe, akkalilile kwamazyalani manji.
7 Akkale acuuno cabwami kumbele lya Leza lyoonse alyoonse,
cita kuti luyando lwako lutazungaani akusyomeka kwako zimukwabilile.
8 Ndiyootembaula zina lyako lyoonse, akuzukizya zikonke zyangu buzuba abuzuba.