Intembauzyo 58
Lwiimbo lwa Devedi lwa Mikitamu.
1 Sena ono mukanana cakululama nywebo nobaleli?
Sena mubeteka kabotu akati kabantu?
2 Peepe, mumyoyo yanu muyeeya zyabubi,
ndinywe muleta lupyopyongano munyika.
3 Kuzwa kukuzyalwa kwabo basizibi balisweekede, balazyalwa kabali babeji, bampelenge.
4 Balaabuyoka mbuli bwanzoka, bali mbuli nkombola iitamvwi.
5 Taimvwi jwi lyasimabibo, niluba lwiimbo lwasibwaanga uucenjede.
6 Tyoloola meno mumilomo yabo O Leza, nonkola bakambwili babasyuumbwa bapapide aaba, O Mwami Leza.
7 Abamaninine mbuli maanzi aakunka, mivwi yabo yooneke mbuli bwizu.
8 Babe mbuli nkumba iizwa goni niienda, babe mbuli cisowe, bataboni zuba pe.
9 Leza abakukule cakufwambaana, mbuli buzima mulilo walumvwa-lumvwa,
uuzima cibiya kacitana bila.
10 Baakubona babi kababweedezelwa bubi bwabo balulami bayoobotelwa,
bayoobotelwa baakusanzya maulu aabo mubulowa bwabasizibi.
11 Lino bantu bayooamba kuti, “Ncobeni baluleme balalumbulwa,
ncobeni Leza uupeteka nyika mpali.”