Intembauzyo 57
ciindi naakatija Saulu akuyoonjila mumpangala.
1 O Leza, Kondeengelela, kondeengelela nkaambo muuya wangu uyubile mulinduwe,
njubide mucivule camababa aako kusikila lunyonyooko lwiinde.
2 Ngompolola kuli Leza Sijulu wamajulu,
Leza uundicitila nzyasyomezya mukuyanda kwakwe mwini.
3 Ulandivuwa kuzwa kujulu, ulandivuna,
aabo banditandaanya ulabatapatila,
mbombuboobu mbwatondezya luyando lwakwe lutazungaani,
mbwatondezya kusyomeka kwakwe.
4 Ndaakati kabasyuumbwa, ndede akati kabanyama babutambo bazapaula,
balaameno mbuli masumo amata, balaamilaka iibosya mbuli mapanga.
5 Tondezya bupati bwako O Leza, mujulu, bulemu bwako abubonwe munyika yoonse.
6 Baateya kakole maulu aangu, muuya wangu waungumana amapenzi,
basya dindi munzila yangu, kwamana bawida mulindilyo beni.
7 Ulindikkede moyo wangu O Leza, ulindikkede ncobeni moyo wangu,
njooimba akukutembaula.
8 O muuya wangu, buka, okantimbwa akalumbu kangu, buka,
ndiyoocita kuti busiku bukaumbuluke.
9 Akati kamisyobo njookutembaula O Mwami Leza, njooimba zyanduwe akati kabantu.
10 Nkaambo luyando lwako lutazungaani ndupati, lusika kujulu kwini,
kusyomeka kwako kulasika kumakumbi.
11 Tondezya bupati bwako O Leza, mujulu, bulemu bwako abubonwe munyika yoonse.