Intembauzyo 47
Kumweendelezi wanyimbo, aimbye bwiimbwa nyimbo yabana ba Kola
1 Nomisyobo yoonse amuvobele,
amupozomoke anyimbo zyalutangalo kuli Leza.
2 Ulayoosya Mwami Leza Sijulu wamajulu,
munyika yoonse ngo Mwami mupati.
3 Misyobo eeyi njotulela nguwaatuzundila,
bantu aabo balikunsi aamaulu eesu.
4 Nyika ino nguwakacita kuti ibe lukono lwesu,
nyika yabulemu bwa Jakobo ooyo ngwaakali kuyanda.
5 Bantu kabapozomoka cakutangala, Leza wakatanta kujulu.
Kakulila myeembo, Mwami Leza wakatanta.
6 Amutembaule, amumutembaule Leza.
Amutembaule, amumutembaule Mwami wesu.
7 Mwami wanyika yoonse ngu Leza, amumutembaule anyimbo.
8 Weendelezya zisi ngu Leza. Acuuno cisalala cabwami mpakkede.
9 Balabungana antoomwe bami bazisi,
balabungana mbuli bantu ba Leza wa Abulahamu,
mbaba Leza bami boonse baanyika, ulatembaulwa kapati.