Intembauzyo 42
BBUKU LYABILI
(Intembauzyo 42—72)
Kumweendelezi wanyimbo. Aimbye bwiimbwa Masikili aabana ba Kola
1 Mbubonya mbuli mbaambi mbwiilangaula tulonga twamaanzi,
mbubonya oobo moyo wangu mbuukulangaula O Leza.
2 Moyo wangu ukufwide nyota O Leza, Leza muumi. Ani nkaboole lili kuti ndizookubone O Leza?
3 Masiku amasikati njide kulya misozi, Bantu boonse balabuzya-buzya
kuti, “Ino ulikuli Leza wako?”
4 Ndalila mumoyo wangu ndayeeya zintu eezi, ndalila ndayeeya mbundakali
kweenda ankamu, mbuli mbundakali kubasololela kuŋanda ya Leza,
katutangala, kupozomoka munyimbo a kulumba, akati kankamu yabantu iiya kupobwe.
5 Nkaambo nzi ncindaumbaalilwa boobu? Ndanyongana buti boobu?
Iinsyome mu Mwami Leza, ndimutembaule walo uuli ngomufutuli wangu,
6 alimwi ngo Leza wangu. Moyo wangu waumbaalilwa, kuzwa munyika
ya Jolodani njookuyeeya, njookuyeeya kuzwa mumajeleele aa Hemoni acilundu ca Mizaa.
7 Maanzi manji alaitana naaloka mumavuumina aako, mayuwe aamavuumina
aako amakwisyilili andikukulizya.
8 Sikati Mwami Leza ulatondezya luyando lwakwe lutazungaani,
aba masiku ndamwiimbila akumukomba, ngo Leza wabuumi bwangu.
9 O Leza omwaala wangu ndaambile kuti, “Nkaambo nzi noondiluba?
Nkaambo nzi ncenooli mubuumba nkedyamininwa abasinkondoma?”
10 Zifuwa zyangu zyalebauka, nobandisampaula basinkondoma balati,
“Yawe, ulikuli Leza wako we?”
11 Nkaambo nzi nceumbaalilwa boobu? Nkaambo nzi ncenyongene boobu?
Ndilasyoma mu Mwami Leza, ndiyoomutembaula nkaambo ngomufutuli wangu alimwi ngo Leza wangu.