Intembauzyo 4
Lwiimbo lwa Devedi, mweendelezi aimbye bwiimbwa nyimbo zyazingwali-ngwali
1 Kondivwiila ndaita, O Leza wabululami bwangu
nindakali mumapenzi nduwe ookandigwasya.
Ndibedaankumbu, umvwe kukomba kwangu.
2 Nywebo nobantu ino mulaleka lili kundisampaula ndemulemu?
Mulaleka lili kuyandisya zyabuyo akulangaula zyabubeji?
3 Amuzibe kuti Mwami Leza wakalisalila baluleme,
Leza ulaswiilila ndamwiita.
4 Amuyoowe Leza, mutabisyi, kamuziyeeyesya eezi nomulede amalo aanu.
5 Amupaizye ziluleme, musyome mu Mwami Leza.
6 Bantu banji balaamba kuti,
“Nguni uukonzya kututondezya bubotu?”
Busyu bwako, abutumunikile O Mwami Leza.
7 Wanditangazya kapati mumoyo. Kwiinda bajisi cilyo azyakunywa zinji.
8 Muluumuno ndilalala akoona, nkaambo nduwe olikke,
O Leza, oondikkazika kabotu.