Intembauzyo 3
Intembauzyo ya Devedi naakatija kuzwa kuli Abisalomu
1 O Mwami Leza, mbangaye basinkondoma! Mbangaye bandilwana!
2 Mbanji bandivwiya baamba kuti, “Leza takonzyi kumuvuna.”
3 Pele yebo, O Leza, nduwe ntobo iindikwabilila,
Nduwe bulemu bwangu alimwi nduwe oopa kuti kkeenda amutwe uunukide.
4 Ndakalilila Mwami Leza mpawo wakandivuwa,
wakandivuwa kuzwa kucilundu cakwe cisalala.
5 Ndalala ansi akoona, kwamana ndabuka nkaambo Leza nguundilela.
6 Nsiyoowi zyuulu zili kkumi zyabantu zyabaabo
balibambilide kundilwana kuzwa kumabazu oonse.
7 O Mwami Leza, nyamuka! Ndivune, O Leza wangu,
nkaambo nduwe oouma basinkondoma kumyeebo,
nduwe ootyola meno aabasizibi.
8 Mwami Leza nguuvuna, nguuleleka bantu bakwe.