Intembauzyo 143
Lwiimbo lwa Devedi
1 O Mwami Leza komvwa kukomba kwangu, swiilila nkwekulilila kuti undeengelele.
Mukusyomeka kwako boola, mubululami bwako boola uzoondilemunune.
2 Utabeteki mubelesi wako, nkaambo taakwe naba omwe uupona uululeme kumbele lyako.
3 Sinkondoma wanditandaanya, wandipwaila ansi,
wandinjizya mumudima, ndaba mbuli babaya bakafwa kale-kale.
4 Moyo wangu wawizuka, moyo wangu uliyoowede.
5 Ndayeeya mazuba aakale-kale,
ntelaika milimo yako njookacita, nntweluka zeezyo nzyookacita amaanza aako.
6 Kulinduwe nkwetandabika maanza aangu, moyo wangu ukufwide nyota mbuli nyika njumu.
7 Fwambaana ndiingule O Leza, moyo wangu wawizuka, wawizuka akaambo kakukusukamina,
utalisisi kuzwa kulindime, nkaambo inga ndaba mbuli babaya balikwacivumwe, bakafwa kale.
8 Cita kuti cifumo-fumo nkamvwe makani aaluyando lwako lutamani.
Mukuti nnsyoma nduwe nditondezya nzila njeelede kweendela. Moyo wangu ngubikkide kulinduwe.
9 O Mwami Leza, ndivune kuzwa kuli basinkondoma, mulinduwe mwenjubide.
10 Muuya wako mubotu undeenzye, undeenzye munzila iibambasede.
11 O Mwami Leza, ndibambe akaambo kazina lyako, mubululami bwako ndigwisya mumapenzi aangu.
12 Muluyando lwako lutamani, baumuzye basinkondoma, banyonyoone boonse bandilwana, nkaambo ndimubelesi wako.