Intembauzyo 14
Lwa Devedi, kumweendelezi wanyimbo
1 Bafuba-fuba balati, “Kaa! Taakwe Leza.”
Bantu aaba mbabi, milimo yabo ilasesemya.
Kunyina naba omwe uucita cibotu.
2 Kuzwa kujulu Mwami Leza ulalanga bantu baansi kuti abone
naa kuli bamwi basongo, bayandaula kukomba Leza.
3 Pele boonse balubizya, mbabi boonse buyo, kunyina naba
omwe uucita cibotu, peepe, taakwe.
4 Sena boonse basizibi banyina luzibo?
Balida bantu bangu mbobalya cilyo,
alimwi tabaiti Mwami Leza mukukomba.
5 Pele bayooyoowa kakunyina acibakonga pe,
nkaambo Leza ulaabaabo baluleme.
6 Nywebo nobabi mupilinganya makanze aabaabo bacete,
pele Mwami Leza, nceciyubilo cabo.
7 Akaka lufutuko lwa Baisilayeli nulwakazwida mu Ziyoni,
ciindi Mwami Leza waakuboozezya bantu bakwe buvubi nayoobaleleka,
ndendilyo Jakobo bantu ba Isilayeli nibayootangala.