Intembauzyo 10
1 Ino wiimina nzi kule, O Mwami Leza?
Ino uyubila nzi muziindi zyamapenzi?
2 Basizibi balapenzya bacete cakulisumpula abajatwe mumakanze ngibakaliteya.
3 Nkaambo zizibi ulikankaizila ziyandisya moyo wakwe,
uulikumbuzya usowa Leza akumusampaula.
4 Sizibi tayandauli Leza nkaambo kakulisumpula,
mumizeezo yakwe yoonse tayeeyi zya Leza.
5 Ulazwidilila muli nzyacita lyoonse,
majwi aako aalubeta ali kulaale anguwe, usaaza basinkondonyina.
6 Ulaamba mumoyo wakwe kuti, “Ndinoolikkalide lyoonse,
ndinootangala kakunyina mapenzi pe.”
7 Kwaamba kwakwe nkwakusinganya, kubeja akukonga.
Kunsi lyamulaka wakwe kulede mapenzi abubi.
8 Ulakkala kayubilide muminzi,
ulavumpa akujaya batakwe mulandu.
9 Ulayubilila akukkalilila bantu musokwe.
Ulalisisa kuti ajate bacete,
ulayubilila mbuli syuumbwa uulisiside,
ulabakwelela kuciyubilo cakwe.
10 Wabavumpa batakonzyi kuligwasya ulabapwayaula,
ulabadyaminina anguzu ansi.
11 Ulaamba mumoyo wakwe kuti, “Leza takombi, tazilanganyi eezi.”
12 Nyamuka O Mwami Leza, bonesya nguzu zyako, utalubi bapengede.
13 Nkaambo nzi mubi ncasampaula Leza? Ulyaambilila nzi kuti,
“Taakwe nanga wandisubula?”
14 Pele yebo, O Leza, ulabona, ulalanga bubi amapenzi,
kuti ucite cimwi cakugwasya.
Uudyaminidwe ulalileta kulinduwe,
Yebo oogwasya bamusyaala.
15 Kotyola maboko aabanyongene basizibi.
Basubule kuti batakaindi kabili.
16 Leza ngo Mwami lyoonse alyoonse,
bamasi uyoobalobya munyika yakwe.
17 O Mwami Leza, ulamvwa kuyanda kwabalitola ansi.
Ulabapa camba noteelela kulila kwabo.
18 Bamusyaala abaabo badyamininwa ulabakwabilila
kutegwa bantunsi batanoocibakongi limbi.