Hosiya 10
1 Baisilayeli bakali mbuli musaansa wakazyede nsaansa zinji. Mbubakali buya buvulila bakali kuyaka azipaililo zyamituni zinji. Mbucakali buya busumpuka cisi cabo, bakali kuya buyaka misumpuululu yakupailila. 2 Myoyo yabo njabucengi, lino baleelede kupenga akaambo kazibi zyabo. Leza uyoopwayaula zipaililo zyabo akoola misumpuululu eeyo.
3 Aaba bantu bayootamauka akwaamba kuti, “Tunyina mwami lino, nkaambo taakwe nitwakaswiilila Leza. Ani mwami inga watucitila nzi?” 4 Kayi bami baamba caambaambe. Basyomezya cakubeja kumasi amwi. Bululami bwaba kutalulama, bukula mbuli nsaku mumuunda.
5 Bantu bamu Samaliya bayooyoowa akoomoka akaambo kakusweekelwa moombe waku Beteli. Abalo bapaizi babo babelekela mutuni bayooulila. Bayoolila kapati nkaambo bulemu boonse bwa Leza wabo bwagwisigwa. 6 Masimpe mutuni ooyo uyootolwa ku Asiliya kuti cikabe cipego kumwami mupati. Baisilayeli bayoofwa nsoni akutyompwa akaambo kakutobela malailile aabuyo. 7 Mwami wabo taakwe nayoobonwa pe, uyooba mbuli makovu aali mumaanzi. 8 Masena oonse aabubi aayo aakombela Baisilayeli aamituni ayoopwaigwa. Mamvwa azincenya ziyoomena a zipaililo zyabo. Nkabela bantu bayooambila malundu kuti, “Amutusise!” Alimwi atulundu kuti, “Amutuwide!”
Leza mbwayoobeteka Baisilayeli
9 Mwami Leza waamba kuti, “Baisilayeli tabanaleka kundibisizya kuzwa nibakatalika ku Gibeya. Aboobo bayoozundwa ku Gibeya nkukonya ooko. 10 Ndiyoobalwana bantu aaba basizinyonyoono akubasubula. Bamasi bayoolibunga-bunga akubalwana, eelyo bayoosubulwa akaambo kazibi zyabo zinji.
11 “Isilayeli wakali mbuli ŋombe yakatambide kabotu yakali kuyanda kuuma maila. Lino mumukosi wayo weebeka ndabikka joko kuti ibeleke kwiinda. Njanda kuti Bajuda balime akuti Baisilayeli bahale. 12 Amusyange mubululami, eelyo nimuyootebula zileleko zyaluyando lwangu lutamani. Amubbabbaule nyika mpya nkaambo casika ciindi cakupilukila ku Mwami Leza wanu. Amumuyandaule kusikila aboole kuzoomutilila zileleko. 13 Nywebo mwakasyanga zibi alimwi mwakatebula nzizyonya. Mwakalya micelo yalucengo lwanu.
“Lino nkaambo kakuti mwakasyoma nkalaki zyanu akusyoma kuvula kwabasilumamba banu, 14 nkondo ilamusikila nkabela zikwabilizyo zyanu zyoonse ziyoomwaika. Ciyookozyanya abuzuba buya mwami Syalumani naakoola munzi mupati wa Betabelu muciindi cankondo, eelyo bakaintu abana babo nibakalyataukwa akujaigwa. 15 Mbubonya oobo anywebo baku Beteli mboziyoocitika kulindinywe nkaambo kabubi bwanu bupati. Mbwiiyootalika buyo nkondo kubucedo mwami wa Isilayeli uyoojaigwa.”