Hosiya 9

Hosiya mbwaakaambilizya cisubulo ca Isilayeli

¹ Mutakondwi Nobaisilayeli. Mutatangali nomucita mapobwe aanu mbuli bamasi. Mwasiya Leza wanu mbuli mukaintu uutasyomeki. Mwalipa kuli Baali mbuli mwaamu mukuti mukajane butebuzi bunji. ² Kumbele ooko tamukooyoojana maila amafuta aaelede. Alimwi muyoobula awaini wakunywa. ³ Baisilayeli taakwe nibayookkala munyika ya Leza, pele bayoobweeda kubuzike ku Ijipiti, alimwi bayoolya zilyo zitondwa ku Asiliya. ⁴ Kwalo ooko tabakapi zituuzyo zyawaini ku Mwami Leza. Tabakakkomanini zipaizyo zyabo. Zilyo zyabo ziyooba mbuli bali adilwe, kufumbwa uulya zilyo eezyo uyoosofwaala. Zilyo eezyo ziyooba zyabo buyo, taakwe ziyoopaizigwa ku Mwami Leza. ⁵ Nkabela caakusika ciindi eeco ceelede cakubamba pobwe lya Mwami Leza, ino bayoocita buti? ⁶ Ciindi capenzi pati, bantu bayootijila ku Ijipiti, ooko bayoozikkilwa ku Memfisi. Zincenya ziyoomena azibiya zyabo zyansiliva, mumaanda aabo muyoomena mamvwa.

⁷ Ciindi cacisubulo casika, ciindi eeco bantu nibayoojana eeco ncobeelede. Aawo nibayooziba kuti eezi nzyamasimpe. Lino baamba kuti, “Musinsimi ooyu mmufuba-fuba, muntu ooyu unjidwe muuya, ulisondokede.” Baamba boobo nkaambo zibi zyabo nzinji, luzondo lwabo ndupati. ⁸ Musinsimi nguucenjezya bantu ba Efulemu, bantu ba Leza. Nikuba boobo kufumbwa nkwaya uliteedwe. Basinkondonyina balamukkalilila muŋanda ya Leza. ⁹ Bantu balabisya kapati mbuli zyakacitika ku Gibeya. Aboobo Leza takalubi kubisya kwabo, eelyo uyoobasubula.

Cinyonyoono ca Baisilayeli acisubulo caco

¹⁰ Lino Mwami Leza waamba kuti, “Ciindi nindakamusala Isilayeli, wakali mbuli nsaansa munkanda. Basikale babo ndakabakkomanina mbuli nkuyu yakusoloka. Pele bakaboola ku Baali Peyoli akulipa kuli Baali. Aboobo bakalisofwaazya busofweede mutuni ngubakali kuyanda. ¹¹ Bulemu bwa Baefulemu buyoomwaika mbuli bayuni. Tabakazyali limbi, bakaintu babo tabacimiti pe. ¹² Naa kuti bakazyale, njoobanyonyoona bana babo, kusikila bakamane doo. Maawe kubantu aaba ndaakubasiya.” Baefulemu bayooba mbuli banyama bajaigwa, Baefulemu bayootumwa kunkondo nkobayoojaigwa.

¹³ O Mwami Leza mbuli mukulanga kwangu bana ba Efulemu bayooba mbuli banyama bajaigwa. Baefulemu bayooaba bana babo kunkondo nkobayoojaigwa. ¹⁴ Ubape, O Mwami Leza, ani ubape nzi? Ubape kuti kabasowa, nkolo zyabo ziyume!

Lubeta lwa Leza kuli Efulemu

¹⁵ Mwami Leza wakaamba kuti, “Zibi zyabo zyoonse zyakalibonya ku Giligali. Nkukonya ooko nkwindakabasulaikila. Nkaambo kakuti bakabisya, ndilabatanda bazwe munyika yangu. Taakwe ninjoobayanda limbi pe, nkaambo abalo basololi babo boonse bandizangila. ¹⁶ Efulemu uli mbuli cisamu ciyumide, miyanda yayuma, tacikonzyi kuzyala micelo pe. Naa bakazyale bana, njoonyonyoona bana babo mbobayandisya.”

Musinsimi mbwaakaamba zya Baisilayeli

¹⁷ Leza wangu uyoobakaka bantu aaba nkaambo tabamuswiilili. Bayooba basimutuntuli akati kabamasi.