Ezekiyeli 37
Kkuti yamafuwa aakayuma
1 Janza lya Mwami Leza lyakali aandime, nkabela Muuya wakanditola ku kkuti, lyakazwide mafuwa. 2 Wakandeenzeenzya akati kawo, ndakabona mafuwa manji ansi mukkuti, mafuwa aakali mayumu kapati. 3 Wakandibuzya kuti, “Yebo omuntu, sena mafuwa aaya inga akonzya kupona?”
Eelyo mebo ndakati, “O Mwami Leza, yebo olikke nduwe oozi.”
4 Mpawo Mwami Leza wakati kulindime, “Sinsima, waaambile kuti, ‘Nomafuwa mayumu, amuswiilile majwi aa Mwami Leza!’ 5 Mboobu Mwami Leza mbwaambila mafuwa aaya ulati, ‘Ndacita kuti muuya umunjile, eelyo mulaba baumi alimwi.’ 6 Ndacita kuti mube amilambi alimwi, akucita kuti nyama yamubili iboole alindinywe ivumbwe alukanda, njoomupa muuya, eelyo mulaba baumi. Ndendilyo nimuyooziba kuti ndendime Mwami Leza.”
7 Aboobo ndakasinsima mbubonya mbuli mbundakalaililwa. Lino kandisinsima, kwakamvwigwa muzunzumina, muzunzumina uubbubbula, aawo mafuwa akaswaangana alimwi, fuwa afuwanyina. 8 Ndakalanga alimwi ndakajana kuti milambi anyama zyakali amafuwa aayo, eelyo lukanda lwakaavumba, pele tiikwakali muuya mulingawo.
9 Mpawo Mwami Leza wakati kulindime, “Sinsima muuya, sinsima, yebo omuntu, waambilizye kuti, mboobu mbwaamba Mwami Leza ulati, ‘Boola omuuya uzwide kuzyooko zyone zyanyika, unjile muli baaba bajaidwe kuti bapone alimwi.’” 10 Aboobo ndaasinsima mbubonya mbuli mbundakalaililwa, muuya wakanjila mulimbabo, bakaba baumi, bakanyamuka. Baima bakali banji kapati.
11 Mpawo Mwami Leza wakati kulindime, “Yebo omuntu, mafuwa aaya mmusyobo wa Isilayeli woonse. Balati, ‘Mafuwa eesu akayuma, tunyina lulangilo, twanyonyoonwa.’ 12 Nkaako sinsima, waambe kuti kulimbabo, mboobu mbwaamba Mwami Leza ulati, ‘Nywebo nobantu bangu, ndiyanda kujalula zyuumbwe zyanu kuti ndimugwisye mulinzizyo, ndamuboozya kunyika ya Isilayeli. 13 Eelyo nywebo nobantu bangu, muyooziba kuti ndendime Mwami Leza, ndaakujalula zyuumbwe zyanu akumugwisya kuzwa mulinzizyo. 14 Njoomubikka Muuya wangu, aboobo muyoopona, njoomupilusya munyika yanu. Eelyo muyooziba kuti mebo nde Mwami Leza ndime ndaamba, alimwi ndime ndacicita, mbwaamba Mwami Leza.’”
Zisi zya Juda a Isilayeli zyaba cisi comwe
15 Majwi aa Mwami Leza akandisikila akuti, 16 “Yebo omuntu, bweza kasako ulembe alinkako kuti nkika Juda a Baisilayeli aabo bamvwana anguwe. Wamana ubweze kasako kambi ulembe alinkako kuti nkasako ka Efulemu nkika Josefa abamusyobo wa Isilayeli boonse bamvwana anguwe. 17 Tuswaanganye kuti tube kasamu komwe mujanza lyako. 18 Basicisinyoko bakubuzya kuti, ‘Ino totitwaambile na kuti eeci caamba nzi?’ 19 Yebo ubaambile kuti, mboobu mbwaamba Mwami Leza ulati, ‘Ndiyanda kubweza kasako ka Josefa, kali mujanza lya Efulemu, amisyobo imwi ya Isilayeli bamvwana anguwe, ndikaswaanganye akasako ka Juda, tube kasako komwe, nkaako kalaba komwe mujanza lyangu.’ 20 Jata tusako ooto ntoolemba, utujate boonse kababwene, 21 ubaambile kuti, Mboobu mbwaamba Mwami Leza ulati, ‘Ndiyoogwisya Baisilayeli kuzwa muzisi oomo mobabede. Ndiyoobayobolola kuzwa mumabazu oonse akubaboozya kunyika yabo beni. 22 Ndiyoobacita musyobo omwe munyika, muzilundu zya Isilayeli. Kuyooba mwami omwe wabo boonse, tabakabi misyobo yobilo limbi pe, nokuba kwaandaanyizigwa muzisi zyobilo pe. 23 Tabaciyoolisofwaazyi limbi beni amituni azikozyanyo zibi, noziba nsotoko zyabo, mukuti ndiyoobafutula kuzwa mukuleya kwabo koonse kwakubisya, ndiyoobasalazya. Bayooba bantu bangu, ambebo njooba Leza wabo.’
24 “Mubelesi wangu Devedi uyoobeendelezya, boonse banoojisi mweembezi omwe. Bayootobela milawo yangu, alimwi bayoobamba malailile aangu. 25 Bayookkala munyika eeyo njindakapa Jakobo mubelesi wangu, nyika eeyo yakakkede basikale banu. Balo abana babana babo bayookkala oomo kwalyoonse alyoonse, eelyo Devedi mubelesi wangu nguuyoobalela kwalyoonse alyoonse. 26 Ndiyoopanga cizuminano caluumuno ambabo, ciyooba cipangano citakamani pe. Ndiyoobakkazika akuyoobavuzya, ndiyooyaka busena bwangu busalala akati kabo kwalyoonse alyoonse. 27 Busena bwangu buyooba akati kabo, ndiyooba Leza wabo abalo bayooba bantu bangu. 28 Eelyo bamasi bayooziba kuti mebo nde Mwami Leza ndime eecita kuti Baisilayeli basalale, busena bwangu busalala bwanooli akati kabo kwalyoonse alyoonse.”