Ezekiyeli 3
1 Lino wakati kulindime, “Yebo omuntu, kolya eeco ncoopegwa, lya bbuku, omana uunke ukanane kumusyobo wa Isilayeli.”
2 Eelyo ndakaasama, kumane wakandipa bbuku kuti ndilye. 3 Mpawo wakati kulindime, “Yebo omuntu, kolya bbuku eeli ndindakupa kusikila ukkute ndilyo lyalo.” Aboobo ndakalilya, nkabela lyakali kulweela mbubonya mbuli buci.
4 Mpawo Leza wakati kulindime, “Yebo omuntu, koya lino kumusyobo wa Isilayeli ukabaambile majwi aangu. 5 Tootumwa kubantu baamba mulaka uumbi naa musyobo muyumu pe, pele kumusyobo wa Isilayeli. 6 Kutali kubantu banji baamba mulaka uumbi naa musyobo muyumu, baamba majwi ngotakonzyi kumvwa. Kasimpe kuti naa nkekutuma kulimbabo tiibali kunooyookuswiilila pe. 7 Pele bamusyobo wa Isilayeli tabayandi kukuswiilila nkaambo ambebo tabandiswiilili, kayi musyobo woonse wa Isilayeli muyumu moyo ngusicinguni. 8 Pele njookucita kuti ukazumanane akukuyumya mbuli mbobabede balo. 9 Njookuyumya ukabe mbuli bbwe, ukainde bbwe luuma. Utabayoowi nokuba kukongwa ambabo, nokuba kuti mmusyobo uuzangide.”
10 Leza wakati kulindime, “Yebo omuntu kondiswiililisya alimwi majwi oonse ngekwaambila waajatisye. 11 Koya lino kuli basicisinyoko, bali mubwaange ukakanane kulimbabo kuti, ‘Mwami waamba boobu aboobu, nkobakuswiilila ankobatakuswiilili.’”
12 Mpawo Muuya wa Leza wakandinyamuna, ndakamvwa muzunzumina waguwo kusule lyangu. Mwami Leza atembaulwe mubusena bwakwe mwakombelwa! 13 Muzumo waakugumana kwamababa aazilenge eezi amuzunzumina wazikwiliba wakali kulimvwisya kumbali aanzizyo wakali muzunzumina mupati. 14 Eelyo Muuya wa Leza wakandinyamuna akundigwisya ooko, mane ndakainka nkandilutide amoyo kuucisa nkesolwedwa ajanza lya Mwami Leza. 15 Eelyo ndakasika kubaange bakali kukkala ku Teliavivi kumbali amulonga wa Kebaa. Lino ooko nkobakali kukkala, ndakakkala akati kabo kwamazuba aali ciloba nkegambidwe kapati.
Mwami Leza mbwaakabikka Ezekiyeli kuba mulindizi
16 Lino mazuba aali ciloba naakamana majwi aa Mwami Leza akandisikila akuti, 17 “Yebo omuntu, ndakucita kuti ube mulindizi wamusyobo wa Isilayeli, nkaako swiilila majwi ngendaamba ubacenjezye anzyendaamba. 18 Kuti ndaambila sizibi kuti, ‘Ulafwa ncobeni.’ Kwamana yebo tomucenjezyi, nokuba kumulaya kuti asiye nzila zyakwe zibi kutegwa atafwi, muntu sizibi ooyo uyoofwa akaambo kazinyonyoono zyakwe, pele mulandu wabulowa bwakwe uyoopegwa nduwe. 19 Pele kuti naa wamucenjezya muntu sizibi ooyo, kwamana tasiyi zinyonyoono zyakwe, noziba nzila zyakwe zibi, uyoofwa akaambo kazinyonyoono zyakwe, yebo tojisi mulandu pe.
20 “Lino kuti muntu uululeme wasiya bululami bwakwe akucita zibi, ndamubikkila cilebyo uyoofwa. Lino mukuti tookamucenjezya, walo uyoofwa akaambo kazinyonyoono zyakwe. Zintu ziluleme eezyo nzyaakacita tazikayeeyegwi limbi, pele yebo njookupa mulandu akaambo kabulowa bwakwe. 21 Pele kuti naa wacenjezya muntu uululeme kuti atabisyi, kwamana tabisyi ncobeni, ooyo uyoopona nkaambo kakuti waccilila kucenjezya ooko, ayebo tojisi mulandu pe.”
Ezekiyeli mbwaakaba cimuumu
22 Lino ooko janza lya Mwami Leza lyakandijata, wakati kulindime, “Nyamuka uunke kucibanda, ooko njookanana kulinduwe.”
23 Aboobo ndakanyamuka akuunka kucibanda. Bulemu bwa Mwami Leza bwakali kooko, bwakali bulemu mbuli bobuya mbundakabwene kumbali aamulonga wa Kebaa, ndakavuntama ansi. 24 Aawo Muuya wa Leza wakandiboolela akundinyamuna. Leza wakakanana kulindime akuti, “Koya ukalijalile muŋanda yako. 25 Eelyo yebo omuntu, uyooangwa antambo, uyooangwa cakuti tokooyookonzya kuunka akati kubantu. 26 Ndiyoocita kuti ukabe cimuumu, kutegwa koyooumwide, utakakonzyi kubatapatila nokuba kuti mmusyobo uuzangide.” 27 Pele ndaakukanana kulinduwe, njoocita kuti ukakonzye kukanana, nkaako uyooti kulimbabo, “Mwami Leza waamba boobu aboobu. Kufumbwa ooyo uuyooswiilila, akaswiilile, kufumbwa ooyo uuyookaka akakake, mukuti mmusyobo uuzangide.”